ၽူႈၸၢႆး ၵေႃႉၼိုင်ႈ ၵူၼ်းတၢင်ႉယၢၼ်း ၵႂႃႇဢႅဝ်ႇထိူၼ်ႇၺႃးသိူဝ်ၶူပ်း ယၢမ်းလဵဝ် သူင်ႇယူတ်းယႃတူဝ် ဝႆႉတီႈႁူင်းယႃယဝ်ႉ ဝႃႈၼႆ။

ဝၼ်းတီႈ 4/5/2023 ယၢမ်းၵၢင်ဝၼ်း ၽူႈၸၢႆး ဢႃယု 30 ပၢႆ ၵေႃႉၼိုင်ႈ ၵူၼ်းဝၢၼ်ႈမိူင်းၵႅင် ဢိူင်ႇမိူင်းၵႅင် ၸႄႈဝဵင်းတၢင်ႉ ယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၵႂႃႇဢႅဝ်ႇထိူၼ်ႇ ၺႃးသိူဝ်ၶူပ်း ၸွမ်းၶႃ ၸွမ်းမိုဝ်း မၢတ်ႇၸဵပ်း ႁၢဝ်ႈႁႅင်း။

ၵူၼ်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆးၵႂႃႇဢႅဝ်ႇထိူၼ်ႇဢေႃႈ။ ႁဵတ်းႁိုဝ်လႄႈ သိူဝ်ၶူပ်းမၼ်း တႄႉၵေႃႈ ဢမ်ႇႁူႉ။ သိူဝ်ၼၼ်ႉ ၶူပ်းၸွမ်းၶႃ ၸွမ်းမိုဝ်းမၼ်းၸၢႆး လႆႈမၢတ်ႇၸဵပ်းႁၢဝ်ႈႁႅင်းဝႆႉ။ ၵတ်းၵႃႈ မၼ်းပႃးဢူၺ်း ၵေႃႉၵႂႃႇၸွမ်းၵွၼ်ႇဢိူဝ်ႈ။ ဢူၺ်းၵေႃႉမၼ်းတႄႉ ဢမ်ႇတၼ်းၺႃး။ ၶႃႁၼ်ပႃးမီ ၵွၼ်ႇၼႆဢေႃႈ။ ထၢင်ႇတႄႉ ၶဝ်တေၵႂႃႇဢႅဝ်ႇထိူၼ်ႇလိုၵ်ႉလႄႈ ၺႃးသိူဝ် ၶူပ်းၶႃႈဢေႃႈ”- ဝႃႈၼႆ။

ၵူၼ်းဝၢၼ်ႈမိူင်းၵႅင် ဢၼ်ထုၵ်ႇသိူဝ်ၶူပ်းၼႆႉ မၼ်းၸၢႆး ထုၵ်ႇၶူပ်း တီႈၶႃၾၢႆႇၶႂႃလႄႈ မိုဝ်းၾၢႆႇသၢႆႉ ၸိူဝ်းၼႆႉ လႆႈမၢတ်ႇ ၸဵပ်းႁၢဝ်ႈ ႁႅင်းသေ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈ ႁူင်းယႃတၢင်ႉယၢၼ်းယဝ်ႉ။

“မၢင်ပွၵ်ႈမၢင်လႂ် ၵူၼ်းၵႂႃႇဢႅဝ်ႇထိူၼ်ႇၶဝ် ၵႆႉထူပ်းႁၼ်သိူဝ်သေ မႃးၶႂ်ႈၼႄၵၼ်ယူႇ။ ၵူၺ်းၵႃႈ လွင်ႈသိူဝ်ၶူပ်းၸိူင်ႉၼႆတႄႉ ပႆႇ ယၢမ်ႈမီးမႃး။ ယဝ်ႉၵေႃႈ မူႇထိူၼ်ႇ ၸိူဝ်းၼၼ်ႉၵေႃႈ ထူပ်းႁၼ်။ ဢွင်ႈတီႈထိူၼ်ႇ ဢၼ်ၶဝ်ၵႂႃႇဢႅဝ်ႇၼၼ်ႉ တေပဵၼ်ဢွင်ႈတီႈ တူဝ်သတ်း ယူႇၼမ်ၵေႃႈ ပဵၼ်လႆႈ”- ၵူၼ်းပိုၼ်ႉတီႈ ဝဵင်းတၢင်ႉယၢၼ်း သိုပ်ႇလၢတ်ႈၼႄၼင်ႇၼႆ။

ၼင်ႇႁိုဝ် ပေႃးတေႁၵ်ႉသႃ ထိင်းသိမ်းပႃႇထိူၼ်ႇလႄႈ တူဝ်သတ်း ပေႃးတေဢမ်ႇလူႉ ဢမ်ႇၵွႆၼၼ်ႉ ယဝ်ႉၵေႃႈ ၸိူဝ်းပဵၼ် တူဝ် သတ်း ၸိူဝ်းၼၼ်ႉ တေဢမ်ႇမႃးပၼ်ၽေးတႃႇၵူၼ်းမိူင်း ၸိူင်ႉၼႆၼၼ်ႉ ယူႇတီႈ ၽူႈမီးပုၼ်ႈၽွၼ်းၶဝ် ထုၵ်ႇလီတူၺ်း ထိုင် ၶပ်ႉၶိုင်ၵႅတ်ႇၶႄႁႄႉၵင်ႈပၼ်ယူႇ ဝႃႈၼႆ။

ၽူႈတူင်ႉၼိုင် တူင်ႇဝူင်းၵူၼ်း ဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “သင်ဝႃႈ ႁၢမ်ႈၵၼ် ယႃႇၵႂႃႇဢႅဝ်ႇထိူၼ်ႇ ၼႆ တႃႇ ႁႃၵိၼ်လဵင်ႉတွင်ႉ ၵူၼ်းမိူင်းသမ်ႉ တေထူပ်းတၢင်းယၢပ်ႇၽိုတ်ႇ။ မၢင်ၸိူဝ်းၵႂႃႇဢႅဝ်ႇထိူၼ်ႇသမ်ႉ တေၵႂႃႇၶုတ်း ၼေႃႇ၊ ႁႃၽၵ်း ၸိူဝ်းၼႆႉမႃး။ မၢင်းၸိူဝ်း တေၵႂႃႇလိုပ်ႈတူဝ်ထိူၼ်ႇ ၸိူင်ႉၼႆလႄႈ ယႃႇပေၵႂႃႇဢႅဝ်ႇထိူၼ်ႇၼႆ ႁဝ်းၶႃႈလၢတ်ႈၶဝ်ဢမ်ႇလႆႈ။ ၵွပ်ႈ ၼႆလႄႈ ၶႂ်ႈၾၢၵ်ႇထိုင်တႄႉ ပေႃးၵႂႃႇၼႆ ယႃႇပေၶဝ်ႈၵႂႃႇၼႂ်းထိူၼ်ႇလိုၵ်ႉႁႅင်း ၼႆၵူၺ်းယဝ်ႉၶႃႈ”- ဝႃႈၼႆ။

ပူၼ်ႉမႃး မိူဝ်ႈလိူၼ်ၼူဝ်ႊဝႅမ်ႊပိူဝ်ႊ 2018 ၼၼ်ႉ ၽူႈၸၢႆး 3 ၵေႃႉ ၵူၼ်းတၢင်ႉယၢၼ်း ၵူၺ်းၼင်ႇၵဝ်ႇ ၵႂႃႇဢႅဝ်ႇထိူၼ်ႇသေ ထုၵ်ႇသိူဝ်ၶူပ်းၼင်ႇၵဝ်ႇ။

ၼႂ်းမိူင်းႁူမ်ႈတုမ်ၼႆႉပႃႇမႆႉ လူတ်းယွမ်းမႃးၵူႈမိုဝ်ႉၵူႈဝၼ်း။ ပိုၼ်ႉတီႈတႃႇသိူဝ်ယူႇသဝ်းႁႃၵိၼ်လဵင်ႉတွင်ႉၵေႃႈလူတ်းယွမ်းမႃးၵူႈမိုဝ်ႉၵူႈဝၼ်း။ တၢင်းၵႂၢင်ႈတေၵိုတ်းမွၵ်ႈ 7 % ပေႃးဢဝ်ဢေႊၶိူဝ်ႊဝႃႈၼႆၸိုင် တေမီး 12 လၢၼ်ႉဢေႊၶိူဝ်ႊပၢႆ ယူႇတီႈ ႁွင်ႈၵၢၼ်ၾၢႆႇပႃႇမႆႉ မိူင်းမၢၼ်ႈ ပိုၼ်ၽၢဝ်ႇဝႆႉ ၼင်ႇၼႆ။