ၼႂ်းလိူၼ်ဢေႊပရိူဝ်ႊ 2023 မႃးၼႆႉ ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ပဵၼ်ၽေးၵိုင်ႉၵၢင်ႉ ရူတ်ႉၶိူင်ႈ/ ၵႃးၽႃႇၵၼ် ဢမ်ႇယွမ်း 20 ပွၵ်ႈ မီးၵူၼ်းလူႉတၢႆၸွမ်း 3 ၵေႃႉ မၢတ်ႇၸဵပ်း 26 ၵေႃႉယဝ်ႉ ဝႃႈၼႆ။  

ၽူႈတူင်ႉၼိုင် ၼႂ်းၸုမ်းၵူၼ်းၼုမ်ႇဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈၵႃး/ ရူတ်ႉၶိူင်ႈၽႃႇၵၼ် ၼႆႉ ၵမ်ႈၼမ် တေပဵၼ်ၵူၼ်းတၢင်ႇတီႈသီႇလႅၼ် ၸိူဝ်းမႃးႁဵတ်းၵၢၼ် ယူႇတီႈၼႆႈ။ ယဝ်ႉၵေႃႈ ၵူၼ်းပိုၼ်ႉတီႈ ၵမ်ႈၽွင်ႈ။ ယၢမ်းလဵဝ် တီႈဝဵင်းလႃႈ သဵဝ်ႈၼႆႉ ၵူၼ်းၵေႃႈၵိုၼ်းၶွၼ်ႈမႃးၼမ် ရူတ်ႉၶိူင်း/ ၵႃးၸိူဝ်းၼႆႉၵေႃႈ ၼမ်ႁႅင်းလႄႈ လွင်ႈရူတ်ႉၽႃႇၵၼ် ပဵၼ်ၽေးၵိုင်ႉၵၢင်ႉၼႆႉ ၶႂ်ႈဝႃႈပဵၼ်ၵူႈဝၼ်းယဝ်ႉ”- ဝႃႈၼႆ။

လွင်ႈၽေးၵိုင်ႉၵၢင်ႉ ၼႂ်းၸႄႈဝဵင်းလႃႈသဵဝ်ႈ ဢမ်ႇယွမ်း 20 ပွၵ်ႈ ၼႂ်းလိူၼ်ဢေႊပရိူဝ်ႊ ပူၼ်ႉမႃးၼႆႉ ဢွင်ႈတီႈၵႆႉပဵၼ် ၽေးၵိုင်ႉၵၢင်ႉ ရူတ်ႉၽႃႇၵၼ်သမ်ႉ တေပဵၼ်ၼိူဝ်သဵၼ်ႈတၢင်းလူင် မိူင်းႁူမ်ႈတုမ် မိူၼ်ၼင်ႇ လႃႈသဵဝ်ႈ – သႅၼ်ဝီ၊ လႃႈသဵဝ်ႈ – သီႇပေႃႉလႄႈ လႃႈသဵဝ်ႈ – တၢင်ႉယၢၼ်း ၸိူဝ်းၼႆႉ။

“လွင်ႈရူတ်ႉၽႃႇၵၼ် ပဵၼ်မႃးၶိူဝ်းယႂ်း ၼႂ်းဝဵင်းလႃႈသဵဝ်ႈၼႆႉ ယွၼ်ႉၵူၼ်းႁဝ်း ဢမ်ႇႁဵတ်းၸွမ်းပိူင်ႁေႃႈရူတ်ႉ၊ ၵမ်ႈၽွင်ႈ မဝ်း လဝ်ႈသေႁေႃႈ၊ ၵမ်ႈၽွင်ႈ ႁေႃႈဝႆးပူၼ်ႉတီႈ ထိုင်တီႈၵုမ်းႁႅင်းရူတ်ႉဢမ်ႇလႆႈ။ ပိူင်လူင်မၼ်းတႄႉ ၵူၼ်းသွၼ်ႉ ၵူၼ်းႁေႃႈရူတ်ႉ ၶိူင်ႈၶဝ် ထုၵ်ႇလီတိုဝ်းမၢၵ်ႇႁူဝ်ရူတ်ႉၶိူင်ႈတႃႇသေႇ ပေႃးပဵၼ်မႃး တေဢမ်ႇလႆႈတိူဝ်ႉၺႃးတီႈၵွၵ်းႁူဝ်။ ၸဝ်ႈၵႃးၶဝ်ၵေႃႈ ထုၵ်ႇလီ ႁေႃႈၸွမ်းပၵ်းပိူင်လီလီယဝ်ႉ ၸင်ႇတေလွတ်ႈၽေးလီၼၼ်ႉၶႃႈယဝ်ႉ”- ၽူႈတူင်ႉၼိုင် ၼႂ်းၸုမ်းၵူၼ်းၼုမ်ႇဝဵင်းလႃႈသဵဝ်ႈ သိုပ်ႇ လၢတ်ႈၼႄၼင်ႇၼႆ။

လွင်ႈရူတ်ႉၽႃႇၵၼ် ၼႂ်းၸႄႈဝဵင်းလႃႈသဵဝ်ႈၼႆႉ ၵမ်ႈၼမ် တေပဵၼ်ၵူၼ်းႁေႃႈရူတ်ႉၶိူင်ႈၶဝ် လႆႈလူႉတၢႆၼမ် ယွၼ်ႉဢမ်ႇသႂ်ႇမၢၵ်ႇ ႁူဝ် ရူတ်ႉၶိူင်ႈၵၼ် ၼႆယဝ်ႉ။

မိူဝ်ႈဝႃး ဝၼ်းတီႈ 2/5/2023 ၼႆႉ ရူတ်ႉၶိူင်ႈလမ်းၼိုင်ႈ ပဵၼ်ၽေးၵိုင်ႉၵၢင်ႉ လူမ်ႉၼိူဝ်သဵၼ်ႈတၢင်းလူင် လႃႈသဵဝ်ႈ – သႅၼ်ဝီသေ ၽူႈၸၢႆး ၵေႃႉၼိုင်ႈ လႆႈမၢတ်ႇၸဵပ်းႁၢဝ်ႈႁႅင်း။ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင် လႃႈသဵဝ်ႈ။

ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 2 ပီၼႆႉ ၼႂ်းမိူင်းတႆး မိူၼ်ၼင်ႇ ဝဵင်းလူင်လႃႈသဵဝ်ႈ၊ မူႇၸေႊလႄႈ တႃႈၶီႈလဵၵ်း ၸိူဝ်းၼႆႉ။ မီးၵူၼ်းတၢင်ႇတီႇသီႇလႅၼ် မႃးႁဵတ်းၵၢၼ်ယူသဝ်းၼမ်လႄႈ လွင်ႈၽေးၵိုင်ႉၵၢင်ႉ ရူတ်ႉၽႃႇၵၼ်ၼႆႉ ပဵၼ်မႃးၶိူဝ်းယႂ်း၊ ၽူႈလၵ်ႉၸၵ်ႉၶုတ်ႈ၊ ၵူၼ်းသူႇသမ်းၵိၼ်ယႃႈမဝ်းၵမ်လႄႈ ပၢင်တေႃႇလွင်း ၸိူဝ်းၼႆႉၵေႃႈ ယိုင်ႈၶႅၼ်းတိူဝ်းၼမ်ထႅင်ႈ။