ၾူၼ်တူၵ်းလႄႈသဵၼ်ႈတၢင်းမိုၼ်ႈ ၵႃးႁူၵ်းလေႃႉလမ်းၼိုင်ႈပဵၼ်ၽေးၵိုင်ႉၵၢင်ႉ ပိၼ်ႈတူၵ်းတၢင်း တီႈၸႄႈဝဵင်းသီႇပေႃႉ ၵူၼ်းမၢတ်ႇၸဵပ်းဢမ်ႇယွမ်း 10 ၵေႃႉ။
မိူဝ်ႈဝၼ်းတီႈ 30/4/2023 ယၢမ်းၵၢင်ဝၼ်း 2 မူင်းၼၼ်ႉ ၾူၼ်တူၵ်းတၢင်းမိုၼ်ႈသေ ၵႃးႁူၵ်းလေႃႉ လမ်းၼိုင်ႈပဵၼ်ၽေးၵိုင်ႉၵၢင်ႉ သဵၼ်တူၵ်းၶၢင်ႈတၢင်း ၼႂ်းၵႄႈ ဝၢၼ်ႈၵုင်းမူင်ႈတင်းဝၢၼ်ႈၼမ်ႉဢုၼ်ႇ ၸႄႈဝဵင်းသီႇပေႃႉ ၵူၼ်းမၢတ်ႇၸဵပ်း ဢမ်ႇယွမ်း 10 ၵေႃႉ။
ၵူၼ်းၼုမ်ႇၼႂ်းၸုမ်းၸွႆႈတူင်ႇဝူင်းၵူၼ်းဝဵင်းသီႇပေႃႉၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ၸႂ်ႈဢေႃႈ တၢင်းမိုၼ်ႈသေယဝ်ႉၵေႃႈ ၵႃးၼႆႉ ဢမ်ႇၵုမ်းလႆႈတၢင်းဝႆးမၼ်း ႁဵတ်းၼႆဢေႃႈ ။လုတ်ႈတူၵ်းၶၢင်ႈတၢင်းၵႂႃႇဢေႃႈ ၵူၼ်းဢၼ်လူႉတၢႆတႄႉဢမ်ႇမီးၼင်ႇၵဝ်ႇ ။မၢတ်ႇၸဵပ်းတႄႉ မီး 10 ၵေႃႉၼႆႉဢေႃႈ ။ ဢၼ်လိူဝ်ၸႂ်သေပိူၼ်ႈ မီး 2 ၵေႃႉၶႃႈ ။ တူၺ်းတႄႉ လႅပ်ႈၶဝ်တေၵႂႃႇပွႆးၵိၼ်ပွႆးလူႇသေ တေပွၵ်ႈၶိုၼ်းႁိူၼ်းၸိူင်ႉၼႆၼေႈ “-ဝႃႈၼႆ။
ၼႂ်းၵႃးဢၼ်လုတ်ႈတူၵ်းၶၢင်ႈတၢင်းၼႆႉ မီးၵူၼ်းၸၢႆး 2 ၵေႃႉလႄႈ ၼၢင်းယိင်း 8 ၵေႃႉ ၼႂ်းၼၼ်ႉ ဢၼ်မၢတ်ႇၸဵပ်းႁၢဝ်ႈႁႅင်းသေပိူၼ်ႈ မီးၼၢင်းယိင်းၵေႃႉၼိုင်ႈလႄႈ ၵူၼ်းၸၢႆးၵေႃႉၼိုင်ႈ တင်းသဵင်ႈပဵၼ်ၵူၼ်းဝၢၼ်ႈၼမ်ႉမႃႉ ၸႄႈဝဵင်းသီႇပေႃႉ။
ၵူၼ်းၼုမ်ႇၼႂ်းၸုမ်းၸွႆႈတူင်ႇဝူင်းၵူၼ်းဝဵင်းသီႇပေႃႉၵေႃႉၼိုင်ႈ သိုပ်ႇလၢတ်ႈလၢတ်ႈ-“ တီႈၵႃးပိၼ်ႈၸိူဝ်းၼႆႉၵေႃႈ ပဵၼ်တီႈၵႆႉ ပဵၼ်လၢႆလၢႆၶႃႈယဝ်ႉ။ပဵၼ်ၸွမ်းသဵၼ်ႈတၢင်း ငွၵ်းငႅၵ်းၼၼ်ႉၼႃႇ။မိူဝ်ႈလဵဝ် တၢင်းသမ်ႉမိုၼ်ႈသေၼႆ ၶႅၼ်းပဵၼ်ငၢႆႈၶႃႈယဝ်ႉ။တၢင်းငွၵ်းတၢင်းလိမ်ႇၸိူဝ်းၼႆႉ ပေႃးၾူၼ်မႃးၼႆႉ မၼ်းမိုၼ်ႈဢေႃႈ သဵၼ်ႈတၢင်းၼႆႉ ပေႃးပႆႇယၢမ်ႈႁေႃႈသေပွၵ်ႈၵေႃႈ ဢမ်ႇလႆႈ မၼ်းတေဢမ်ႇႁူႉလႆႈဝႃႈ တေဝႄႈတေႁေႃႈၸိူင်ႉႁိုဝ်ႁႂ်ႈလွတ်ႈၽေး” – ဝႃႈၼႆ။
မိူဝ်ႈဝၼ်းတီႈ 29/4/2023 ၼၼ်ႉၵေႃႈ ၵႃးတင်းရူတ်ႉၶိူင်ႈၽႃႇၵၼ်သေ ၽူႈၸၢႆးႁေႃႈရူတ်ႉၶိူင်ႈၵေႃႉၼိုင်ႈလူႉတၢႆ ၼိူဝ်သဵၼ်ႈတၢင်း ၼႂ်းၵႄႈ ဝၢၼ်ႈၵုင်းသႃႇလႄႈ ဝၢၼ်ႈၸၢမ်လဝ်း ၸႄႈဝဵင်းသီႇပေႃႉ။
ၼႂ်းလိူၼ်ဢေႊပရိူဝ်ႊၼႆႉၵူၺ်း ၼိူဝ်သဵၼ်ႈတၢင်းလူင် တီႈၸႄႈဝဵင်းသီႇပေႃႉၼႆႉ ပဵၼ်ၽေးၵိုင်ႉၵၢင်ႉရူတ်ႉၵႃးၽႃႇၵၼ် ဢမ်ႇယွမ်း 8 ပွၵ်ႈသေ ၵူၼ်းမၢတ်ႇၸဵပ်း ဢမ်ႇယွမ်း16 ၵေႃႉ ။ မိူၼ်ၼၼ်ၼင်ႇၵဝ်ႇ ၼႂ်းၸႄႈဝဵင်းလႃႈသဵဝ်ႈၼႆႉၵေႃႈ ၼႂ်းလိူၼ်ၼႆႉၵူၺ်း ပဵၼ်ၽေးရူတ်ႉၵႃးၽႃႇၵၼ် ဢမ်ႇယွမ်း 10 ပွၵ်ႈသေ မီးၵူၼ်းလူႉတၢႆ 6 ၵေႃႉ မၢတ်ႇၸဵပ်း 26 ၼႆယဝ်ႉ။
