မိူဝ်ႈၼႆႉ ဝၼ်းတီႈ 27/4/2023 ယၢမ်းၵၢင်ၼႂ် 8 မူင်းၶိုင်ႈ မီးၽူႈၸၢႆးဢမ်ႇႁူႉၾၢႆႇ ၵေႃႉၼိုင်ႈ ၶဝ်ႈယိုဝ်း ႁူဝ်ၼႃႈ ပျီႇတူႉ ၸိတ်ႉ လူင်ထၢင် တၢႆထင်တီႈ ၼႂ်းႁၢၼ်ႉၶၢႆၼမ်ႉၼဵင်ႈၸဵမ်း (မင်းထိပ်ခေါင်) တီႈပွၵ်ႉပၢႆးၸၢၵ်ႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပျီႇတူၸိတ်ႉၼႆႉသမ်ႉ ၼင်ႈၵိၼ်ဝႆႉတီႈၼႂ်းလၢၼ်ႉၼမ်ႉၼဵင်ႈၼၼ်ႉ မီး ၽူႈၸၢႆးၵေႃႉၼိုင်ႈ ႁဵတ်းမိူၼ်ၵူၼ်းမႃးသိုဝ်ႉတၢင်းၵိၼ်ၼႂ်းလၢၼ်ႉၼၼ်ႉသေ ၸူၵ်းၵွင်ႈယိုဝ်းသႂ်ႇ တီႈၵွၵ်းႁူဝ်ပျီႇတူႉၸိတ်ႉၼၼ်ႉ လုၵ်ႈ ၼိုင်ႈ။ ပျီႇတူႉၸိတ်ႉၼၼ်ႉ တၢႆထင်တီႈ ၼႂ်းႁၢၼ်ႉၼၼ်ႉၵမ်းလဵဝ်။ ပျီႇတူႉၸိတ်ႉၼၼ်ႉ ၶဝ်မႃးသွင်ၵေႃႉၽူဝ်မေး။ ၸၼ်ႉသိုၵ်းမၼ်းၼၼ်ႉ ပဵၼ်ၸၼ်ႉသင်တႄႉ ဢမ်ႇႁူႉတႅတ်းတေႃး။ တေပဵၼ်ၸၼ်ႉႁူဝ်မူႇႁႃႉ၊ ႁူဝ်ထႅဝ်ႁႃႉတႄႉ ဢမ်ႇႁူႉ”- ဝႃႈၼႆ။

ၵူၼ်းမႃးယိုဝ်းၼၼ်ႉ ပဵၼ်ၽႂ် ၼမ်ႉမိုဝ်းၽႂ် မႃးယိုဝ်းဢၼ်ဝႃႈၼၼ်ႉတႄႉ တေႃႇထိုင်ယၢမ်းလဵဝ် ပႆႇႁူႉ ပႆႇတီႉၺွပ်းလႆႈ ဝႃႈၼႆ။

“မိူဝ်ႈၽွင်းၼၼ်ႉ လႆႈႁူႉဝႃႈ ပျီႇတူႉၸိတ်ႉ ၶႃသွင်ၽူဝ်မေးၼႆႉ ၶဝ်ပေႃးၵိၼ်ၶဝ်ႈယဝ်ႉယဝ်ႉ ပႂ်ႉဢဝ်ငိုၼ်းထွၼ်းသေ လူဝ်ႇမိူဝ်း ၵူၺ်း။ ႁဵတ်းၼၼ်သေ ၺႃးယိုဝ်းတၢႆ။ ၵူၼ်းမႃးယိုဝ်းၼၼ်ႉ လႅပ်ႈတေပႂ်ႉငွႆးတူၺ်းၸွမ်းလင်မၼ်းမႃးႁိုင်ယဝ်ႉႁိုဝ် ဢမ်ႇႁူႉ ႁဝ်းၶႃႈ ထၢင်ႇတႄႉ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တူဝ်တၢႆ ပျီႇတူႉၸိတ်ႉ လူင်ထၢင်ၼၼ်ႉ လႆႈသူင်ႇၵူတ်ႇထတ်းဝႆႉတီႈ ႁူင်းယႃလူင် ဝဵင်းမူႇၸေႊဝႆႉယဝ်ႉ ဝႃႈ ၼႆ။

မိူဝ်ႈဝၼ်းတီႈ 31/3/2023 ယၢမ်းၵၢင်ဝၼ်း မွၵ်ႈ 12 မူင်း ၼၼ်ႉၵေႃႈ ပျီႇတူႉၸိတ်ႉ မဵဝ်ႉမ ဢၼ်ပႂ်ႉဢဝ်ႁူမ်ႇလူမ်ႈဝႆႉတီႈ တႃႈ ရူတ်ႉၵႃး (သိန်းသန်းချီကားကွင်း) ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇၼၼ်ႉ ထုၵ်ႇၵူၼ်းဢမ်ႇႁူႉၾၢႆႇ ၶဝ်ႈ ယိုဝ်း လူႉတၢႆထင်တီႈ 2 ၵေႃႉ မၢတ်ႇၸဵပ်းႁၢဝ်ႈႁႅင်း 3 ၵေႃႉ။