ပေႃႈႁိူၼ်းၼုမ်ႇ ၸေႊလၢၼ်ႉ ၵေႃႉၼိုင်ႈ ၵိၼ်ႁွႆသေ ပဵၼ်ၶီႈႁၢၵ်ႈသွင်ႁူၼ် လႆႈႁၢမ်သူင်ႇယူတ်းယႃတူဝ်တီႈဝဵင်းမူႇၸေႊ သဵင်ႈၵႂႃႇ တီႈႁူင်းယႃ။

ပူၼ်ႉမႃး မိူဝ်ႈဝၼ်းတီႈ 22/4/2023 ၼၼ်ႉ ၸၢႆးဢၢႆႈႁၢၼ် ဢႃယု 35 ပီ ပေႃႈႁိူၼ်းၼုမ်ႇ ၼႂ်းဝၢၼ်ႈၸေႊလၢၼ်ႉ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၵိၼ်ႁွႆသေ ပဵၼ်ႁၢၵ်ႈသွင်ႁူင်ႁႅင်း တၼ်းလႆႈသူင်ႇယူတ်းယႃ တီႈႁူင်းယႃဝဵင်းမူႇၸေႊ ၶိုၼ်းၼိုင်ႈ သေ လႆႈလူႉသဵင်ႈၵႂႃႇ ၼႆယဝ်ႉ။

ၵူၼ်းၸေႊလၢၼ်ႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ မၼ်းၵိၼ်ႁွႆသေ ပဵၼ်ၶီႈႁၢၵ်ႈသွင်ႁူၼ် ။ တၼ်း ဢဝ် ၵႂႃႇႁူင်းယႃ ၼွၼ်းၶိုၼ်ႈၼိုင်ႈၵူၺ်း လႆႈလူႉသဵင်ႈၵႂႃႇ။ ယွၼ်ႉပဵၼ်ႁႅင်းလႄႈ ဢၢၼ်းတေသူင်ႇယူတ်းယႃတူဝ် တီႈမၼ်းတလေး ၵူၺ်း ဢမ်ႇတၼ်းလႆႈဢဝ်ၵႂႃႇၶႃႈ။ မၼ်းၸၢႆးသမ်ႉ မီးတၢင်းပဵၼ်ပၢင်ႈ ၸဵမ်လဵၵ်ႉ ႁဵတ်းၼႆဝႆႉၶႃႈဢေႃႈ။ ထႅင်ႈ လွင်ႈၼိုင်ႈ ယၢမ်းၼႆႉသမ်ႉ ပဵၼ်ၶၢဝ်းမႆႈၵေႃႈၸႂ်ႈလႄႈ လွင်ႈၵိၼ်ယႅမ်ႉၼႆႉ လူဝ်ႇလႆႈၾၢင်ႉသတိၵၼ်ၵိၼ်ၽွင်ႈ ပေႃးၵိၼ်ဢမ်ႇ မႅၼ်ႈၼႆ ၸၢင်ႈပဵၼ်တွင်ႉႁႄႈတွင်ႉၵႂႃႇ ၸၢင်ႈပဵၼ်သွင်ႁူၼ် ၶႃႈဢေႃႈ ”- ဝႃႈၼႆ။

ထိုင်မႃး မိူဝ်ႈဝႃး ဝၼ်းတီႈ 26/4/2023 ၼႆႉ ယူႇတီႈ လုၵ်ႈလၢင်းၼၢင်းမေး ပေႃႈမႄႈပီႈၼွင်ႉ လႆႈဢဝ်တူဝ်ၸၢႆးဢၢႆႈႁၢၼ် လုမ်းလႃးသၢင်းၵဵဝ်ႇလီငၢမ်းယဝ်ႉ ဝႃႈၼႆ။

ၸၢႆးဢၢႆႈႁၢၼ်ၼႆႉ မီးဝႆႉမေးၼၢင်းလႄႈ လုၵ်ႈဢွၼ်ႇလဵၵ်ႉ ဢႃယုမွၵ်ႈ 8-9 ၶူပ်ႇ ဝႆႉၵေႃႉၼိုင်ႈ ၵူၼ်းပိုၼ်ႉတီႈ ၸေႊလၢၼ်ႉ လၢတ်ႈ။