ၼုမ်ႇၸၢႆး 2 ၵေႃႉ ၵႂႃႇဢႅဝ်ႈၸွမ်းၵၼ်သေ ၽွင်းပွၵ်ႈႁိူၼ်းၼၼ်ႉ ႁၢႆၵႂႃႇၵၢင်တၢင်းႁိုင် 2 လိူၼ်ယဝ်ႉ ပႆႇထူပ်းႁၼ်တူဝ်ၶိုၼ်း ယူႇတီႈ ပေႃႈမႄႈပီႈၼွင်ႉ တင်းလင် မႆႈၸႂ် ပဵၼ်ၼမ်ႉႁူၼမ်ႉတႃ။

မိူဝ်ႈဝၼ်းတီႈ 4/3/2023 ယၢမ်းႁူဝ်ၶမ်ႈ 6 မူင်း ၸၢႆးၸိုၼ်ႈ ဢႃယု 27 ပီတင်း ၸၢႆးသွၼ် ဢႃယု 22 ပီ ႁၢႆၵႂႃႇၼႂ်း ၵႄႈဢိူင်ႇၼႃးတဵတ်ႇ လႄႈ ဢိူင်ႇသၼဵၼ်း ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း ႁၢၼ်ႉတေႃႇထိုင်ယၢမ်းလဵဝ်ၸမ် 2 လိူၼ်ယဝ်ႉ ပႆႇထူပ်းႁၼ်တူဝ်ၶိုၼ်း တၢႆႁိုဝ်လိပ်းႁိုဝ် ပႆႇႁူႉ ဝႃႈၼႆ။

ၵူၼ်းပိုၼ်ႉတီႈ ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလိူၼ်ထူၼ်ႈသၢမ်ၼၼ်ႉ ၸၢႆးၸိုၼ်ႈၼႆႉၵႂႃႇဢႅဝ်ႈတီႈဝၢၼ်ႈပၢင်ႁူႈ ဢိူင်ႇၼႃးတဵတ်ႇ။ ၽိူဝ်ႇမၼ်းပွၵ်ႈမႃးၶိုၼ်းႁိူၼ်းဝၢၼ်ႈပၢင်ႇ ပဵင်းၼႆႉမႃးႁၢႆပႅတ်ႈၼႂ်းၵႄႈ ဢိူင်ႇၼႃးတဵတ်ႇ တင်း ဢိူင်ႇသၼဵၼ်း ။ ၼႂ်းၵႄႈၼၼ်ႉ မီးဝႆႉၵဵၵ်ႉ/ လၢၼ်ႇ သိုၵ်းဝႃႉပႂ်ႉဝႆႉ တီႈၼိုင်ႈ။ ၵမ်းၼႆႉ ၵူၼ်းဝၢၼ်ႈၵႂႃႇထၢမ်တီႈၵဵၵ်ႉၼၼ်ႉ ပဵၼ်တႆးပႂ်ႉဝႆႉ ၸိုဝ်ႈႁွင်ႉ ၸဝ်ႈႁၢၼ်သေႃး ။ မၼ်းၵေႃႈဝႃႈ ဢမ်ႇလႆႈႁူႉ ၼႆၶႃႈဢေႃႈ။ မိူဝ်ႇတႄႇတႄႉ ၵူၼ်းလူင်ၶဝ်ဝႃႈ တေၵႄႈၶႆလႆႈယူႇ လွင်ႈၼႆႉၼႆသေ ႁၢၼ်ႉတေႃႇထိုင်ယၢမ်းလဵဝ် ပႆႇလႆႈၶၢဝ်ႇ သင်ၶႃႈ”- ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈႁူဝ်ၼႃႈသိုၵ်းၵူၼ်းမိူင်း ၸုမ်းပျီႇတူႉၸိတ်ႉပဢူဝ်း ပႃးၸဵမ် ၵၢင်ႉၵႄႇဝၢၼ်ႈဢိူင်ႇ ၵေႃႈၸွႆႈႁႃတူဝ် ၸၢႆးၸိုၼ်ႈ ယူႇ ၵူၺ်းၵႃႈ တေႃႇထိုင်ယၢမ်းလဵဝ် ဢမ်ႇမီးၶၢဝ်ႇငၢဝ်းၶိုပ်ႈၼႃႈသင် – ၵူၼ်းၼႂ်းဝၢၼ်ႈလၢတ်ႈၼင်ႇၼႆ။

“မိူဝ်ႈဝၼ်းၼၼ်ႉ ဢၼ်ပဵၼ်ပျီႇတူႉၸိတ်ႉပဢူဝ်းလႄႈၵူၼ်းလူင်ဝၢၼ်ႈဢိူင်ႇ ၸွႆႈၵၼ်ႁႃယူႇဢေႃႈ။ ၶတ်းၸႂ်ၵႂႃႇယွၼ်းႁူပ်ႉသိုၵ်းဝႃႉတီႈလၢၼ်ႇၼၼ်ႉယူႇ ။ ၵူၺ်းၵႃႈႁူဝ်ၼႃႈသိုၵ်းဝႃႉတီႈၼၼ်ႉ ဢမ်ႇယွမ်းထူပ်း။ ၵႂႃႇထၢမ် ၸဝ်ႈႁၢၼ်သေႃးၵေႃႈ မၼ်းၸဝ်ႈၵေႃႈဝႃႈ ႁႂ်ႈၵႂႃႇထူပ်းတီႈသိုၵ်းဝႃႉ ၼႆသေ ဢီးၵႂႃႇဢီးၶိုၼ်းၸိူင်ႉၼၼ်ၵူၺ်း ဢမ်ႇလႆႈလွင်ႈၶိုပ်ႈၼႃႈသင် ။ ပေႃးပဵၼ်ၸိူင်ႉၼႆတႄႉ လွင်ႈႁူမ်ႇလူမ်ႈၵူၼ်းမိူင်းဢမ်ႇမီးသင်သေဢိတ်းယဝ်ႉ ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။  

ၸၢႆးၸိုၼ်ႈ ဢႃယု 27 ပီၼႆႉ ပဵၼ်ၵူၼ်းဝၢၼ်ႈပၢင်ႇပဵင်း ၼႂ်းဢိူင်ႇသၼဵၼ်း ဝဵင်းပၢင်လူင် ၸၢႆးသွၼ် ဢႃယု 22 ပီသမ်ႉ ပဵၼ် ၵူၼ်း ဝၢၼ်ႈပၢင်ႁူႈ ယူႇဢိူင်ႇၼႃးတဵတ်ႇ ၸႄႈဝဵင်းလွႆလႅမ်။ ယၢမ်းလဵဝ် တင်းသွင်ၵေႃႉ ႁၢႆတူဝ်ဝႆႉ ပႆႇထူပ်းႁၼ် တၢႆႁိုဝ် လိပ်း ႁိုဝ် ပႆႇႁူႉ။ ပေႃႈမႄႈပီႈၼွင်ႉၵူၼ်းႁိူၼ်းၵေႃႈ ပဵၼ်ဢၼ်မႆႈၸႂ် ၼမ်ႉႁူၼမ်ႉတႃၵူႈဝၼ်း။

သင်ဝႃႈ မီးၽႂ် ၵေႃႉလႂ် ထူပ်းႁၼ် ၶႃသွင်ၵေႃႉၼႆၸိုင် ၶႅၼ်းတေႃႈၵပ်းသိုပ်ႇ မႃးတီႈမၢႆၾူၼ်း 09979456939 ၼႆႉသေၵမ်း။ သင်ဝႃႈၺႃးတီႉၺွပ်းၼႆၵေႃႈ ၽူႈမီးပုၼ်ႈၽွၼ်းၶဝ် ၶႅၼ်းတေႃႈပွႆႇပၼ်ၶိုၼ်းသေၵမ်း ပေႃႈမႄႈပီႈၼွင်ႉတုၵ်းယွၼ်းၼင်ႇၼႆ။