ၾူၼ်တူၵ်းလူမ်းႁႅင်း မၢၵ်ႇႁဵပ်းတူၵ်း လၢႆဝၼ်းထပ်းၵၼ် တီႈၸႄႈဝဵင်းသီႇသႅင်ႇ ႁိူၼ်းၵူၼ်းပၢႆႈၽေးသိုၵ်းလူႉ ၵွႆတင်းၼမ်။
တႄႇဢဝ်ဝၼ်းတီႈ 22 ထိုင် 24/4/2023 ၾူၼ်တူၵ်းလူမ်းႁႅင်း မၢၵ်ႇႁဵပ်းတူၵ်းၽတ်ႉလႄႈ ႁိူၼ်းၵူၼ်းပၢႆႈၽေးသိုၵ်း တီႈၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း လူႉၵွႆတင်းၼမ် လူဝ်ႇတၢင်းၸွႆႈထႅမ် တႃႇၶိုၼ်းမႄးမုင်း/ၵင်ႈ။
သိုဝ်ႇၶၢဝ်ႇ ၶမ်းသႃးငၢဝ်း ဢွၵ်ႇဝႆႉဝႃႈ မၢၵ်ႇႁဵပ်းလုၵ်ႈယႂ်ႇမွၵ်ႈ 2 ၼိဝ်ႉ တူၵ်းၽတ်ႉသႂ်ႇႁိူၼ်းယေး ၵူၼ်းပၢႆႈၽေးသိုၵ်းလႄႈ လင်ၶႃးႁိူၼ်း ဢၼ်ပွင်ႇၵႂႃႇၵေႃႈမီး ဢၼ်ပိၼ်ႈလူမ်ႉၵူၼ်ႇပင်းၵေႃႈမီး၊ လူႉသုမ်းၵႂႃႇတင်းၼမ် ဝႃႈၼႆ။
ၵူၼ်းပိုၼ်ႉတီႈလၢတ်ႈဝႃႈ – “ မၢၵ်ႇႁဵပ်းႁူၺ်ႇယႂ်ႇၼႃႇလႄႈ ယႃႇဝႃႈသုမ်ႉၵူၼ်းပၢႆႈၽေးလႃႈ ႁိူၼ်းၵူၼ်းမိူင်းၵေႃႈ ၵွႆဢေႃႈ။ မၢင်ႁိူၼ်းၵေႃႈ လဵၵ်းမုင်းႁိူၼ်းပေႃးပိၼ်ႈပေႃးပူၵ်း မၢင်ႁိူၼ်းၵေႃႈ လင်ၶႃးႁိူၼ်းပွင်ႇၸိူဝ်းၼႆႉဢေႃႈ မိူဝ်ႈလဵဝ်တီႈၵူၼ်းပၢႆႈၽေးၸိူဝ်းၼႆႉတႄႉ လူဝ်ႇတၢင်းၸွႆႈထႅမ်တႃႇမႄးၵုမ်းႁိူၼ်းၶဝ်ၶိုၼ်းယူႇဢေႃႈ ” – ဝႃႈၼႆ။
ၵမ်ႈၼမ် ၵူၼ်းပၢႆႈၽေး တီႈသီႇသႅင်ႇၼႆႉ ပဵၼ်ၵူၼ်းမိူင်း တီႊမေႃႊသူဝ်ႊ ၊ ၾၢႆၶုၼ်၊ မိူင်းပၢႆး ထိုင်မိူဝ်ႈလဵဝ် ငဝ်းလၢႆးၵၢၼ်ဝၢၼ်ႈၵၢၼ်မိူင်း ပႆႇၼိမ်သဝ်းလႄႈ ပႆႇၸၢင်ႈပွၵ်ႈၶိုၼ်းႁိူၼ်း။
မိူဝ်ႈဝၼ်းတီႈ 21/4/2023 ၼၼ်ႉၵေႃႈ ၾူၼ်တူၵ်းလူမ်းႁႅင်းလႄႈ တူၼ်ႈမႆႉႁုင်းလူင် ၵူၼ်ႇလူမ်ႉၽတ်ႉသႂ်ႇ ၼႂ်းဝၢင်းႁူင်းႁႅမ်းလၢႆႇၵုၼ်း(လိုင်ကွန်း) ဢၼ်မီးၼႂ်းဝၢၼ်ႈၵၢတ်ႇၵူႇ ၸႄႈဝဵင်းတူၼ်ႈတီးၼၼ်ႉ မီးလွင်ႈလူႉသုမ်းၵမ်ႈၽွင်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ