သိုၵ်းမၢၼ်ႈ တင်း သိုၵ်း PDF ယိုဝ်းၵၼ်တီႈ ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၾၢႆႇသိုၵ်းမၢၼ်ႈတၢႆ ဢမ်ႇယွမ်း 100 ၼႂ်းၼၼ်ႉ ၽူႈမီးၸၼ်ႉၵေႃႈပႃးလၢႆလၢႆၵေႃႉ ။
မိူဝ်ႈဝၼ်းတီႈ 22/4/2023 ယၢမ်းႁူဝ်ၼႂ် 3 မူင်းၼၼ်ႉ ၸုမ်းသိုၵ်း MDY-PDF(မၢၼ်းတလေး ပီႊတီႊဢႅပ်ႉၾ်) ၶဝ်ႈလေႃႇတိုၵ်းယိုတ်းလႆႈ ပၢင်သဝ်းသိုၵ်းမၢၼ်ႈ ၊ ၾၢႆႇသိုၵ်းမၢၼ်ႈ တၢႆ ဢမ်ႇယွမ်း 100 ၼႂ်းၼၼ်ႉ ပႃး ၽူႈမီးၸၼ်ႉလၢႆၵေႃႉလူႉတၢႆၸွမ်းၼႆ MDY PDF ဢွၵ်ႇလိၵ်ႈပိုၼ်ၽၢဝ်ႇဝႆႉ ။
ၼႂ်းၶေႃႈပိုၼ်ၽၢဝ်ႇ ၼၼ်ႉပႃးဝႆႉဝႃႈ ၽူႈမီးၸၼ်ႉသိုၵ်းမၢၼ်ႈၼႆႉပဵၼ် ၸဝ်ႈသိုၵ်းလူင်ၼႂ်းတပ်ႉ ၶလယ 147 ၵေႃႉၼိုင်ႈ ၼႂ်းတပ်ႉ ၶလယ 258 ၵေႃႉၼိုင်ႈ ၼႂ်းတပ်ႉ ၶလယ 253 ၵေႃႉၼိုင်ႈ လႄႈ မၢတ်ႇၸဵပ်းထႅင်ႈတင်းၼမ်၊ ၾၢႆႇသိုၵ်း MDY-PDF တူၵ်းသုမ်း 11 ၵေႃႉ ၼႆယဝ်ႉ။
ၵူဝ်ႇဢေႃႇသမုၼ်ႇ ၽူႈမီးၸၼ်ႉၼႂ်း MDY PDF လၢတ်ႈဝႃႈ- “ ႁဝ်းၶဝ်ႈတိုၵ်းၼႂ်း ပၢင်သဝ်းၶဝ် မွၵ်ႈႁူဝ်ၼႂ် 3 မူင်းၼႆႉ။ ၸဝ်ႈသိုၵ်းလူင်ၶဝ်တႄႉႁွတ်ႈမႃး မွၵ်ႈၵၢင်ၼႂ်ၼႆႉ။ ၶီႇၵႃးၵူၼ်းႁိူၼ်းသေမႃး။ ႁဝ်းမုင်ႈႁၼ်ၶဝ် ၼုင်ႈသိူဝ်ႈၶူဝ်းသိုၵ်းမႃးယူႇ ၼႂ်းၵႃးၼၼ်ႉ။ ႁဝ်းႁႄႉတႃႇတေၵူတ်ႇထတ်းၵေႃႈ ၶဝ်ဢမ်ႇၽွမ်ႉ။ၵွပ်ႈၼၼ်လႄႈ ယိုဝ်းသႂ်ႇ။ ၸဝ်ႈသိုၵ်းလူင် ၶဝ်တၢႆထင်ၼႂ်းၵႃးၼၼ်ႉၵမ်းလဵဝ် ” – ဝႃႈၼႆ။
မိူဝ်ႈဝၼ်းတီႈ 22/4/2023 ၼၼ်ႉၵေႃႈ သိုၵ်း PDF ယိုတ်းလႆႈ ပၢင်သဝ်းသိုၵ်းမၢၼ်ႈတီႈၼိုင်ႈ ၼႂ်းၸႄႈဝဵင်းၵျွၵ်ႉမႄး။ ယိုတ်းလႆႈပႃး ၵွင်ႈ MA (3) 3 လဝ်း ၊ မၢၵ်ႇၵွင်ႈ 9 မမ 20 လုၵ်ႈ ၊ မၢၵ်ႈၵွင်ႈ (60)မမ 10 လုၵ်ႈ လႄႈ မၢၵ်ႇၵွင်ႈ 5.56 တင်းၼမ်သေဢမ်ႇၵႃး ယိုတ်းလႆႈပႃး ၶိူင်ႈၸႂ်ႉသွႆႈၼႂ်းၵၢၼ်တိုၵ်းထႅင်ႈတင်းၼမ် ၾၢႆႇ PDF ပိုၼ်ၽၢဝ်ႇ ဝႆႉၼင်ႇၼႆ။
မိူၼ်ၼၼ်ၼင်ႇၵဝ်ႇ မိူဝ်ႈဝၼ်းတီႈ 21/4/2023 ၼၼ်ႉၵေႃႈ သိုၵ်း PDF ၶဝ်ႈလေႃႇတိုၵ်း တပ်ႉသဝ်း ၶလယ 114 တင်း ၶလယ 115 ၼႂ်းၸႄႈဝဵင်းၼွင်ၶဵဝ်ၼၼ်ႉသေ ၾၢႆႇသိုၵ်းမၢၼ်ႈ လူႉတၢႆ ဢမ်ႇယွမ်း 5 ၵေႃႉ ၼႆယဝ်ႉ။
ပၢင်တိုၵ်းၼႆႉ ၸွင်ႇတေလၢမ်းထိုင် ၼႂ်းဝဵင်းၼွင်ၶဵဝ်ႁိုဝ်ဢၼ်ဝႃႈၼၼ်ႉ ၵူဝ်ႇဢေႃႇသမုၼ်ႇ ၽူႈမီးၸၼ်ႉၼႂ်း MDY-PDF ဢမ်ႇပၼ်လႆႈၶေႃႈတွပ်ႇ။
ပၢင်တိုၵ်းတီႈၸႄႈဝဵင်းၼွင်ၶဵဝ်ၼႆႉ တႄႇပဵၼ်မႃးမိူဝ်ႈဝၼ်းတီႈ 5 လိူၼ်ဢေႊပရိူဝ်ႊၼၼ်ႉသေ ၾၢႆႇသိုၵ်းမၢၼ်ႈ လၢမ်းလိမ်းယိုဝ်းၵွင်ႈလူင် တူၵ်းသႂ်ႇႁိူၼ်းၵူၼ်းဝၢၼ်ႈလႄႈ ၵူၼ်းမိူင်း လူႉတၢႆ ဢမ်ႇယွမ်း 7 ၵေႃႉ။
