ၵူၼ်းၼုမ်ႇထုင်ႉၼွင်ႁၢႆးယႃႈ 8 ၵေႃႉၺႃးသိုၵ်းမၢၼ်ႈယိုတ်းမိူင်းတီႉၺွပ်းၵုမ်းၶင် ထိုင်မိူဝ်ႈလဵဝ်ပႆႇလွတ်ႈၶိုၼ်း။

မိူဝ်ႈႁူဝ်လိူၼ် ဢေႊပရိူဝ်ႊ ပီ 2023 ၼႆႉ ၵူၼ်းၼုမ်ႇထုင်ႉၼွင်ႁၢႆးယႃႈ 8 ၵေႃႉ ၺႃးမၢပ်ႇၼႄးဝႃႈ ၵွင်ႉၵၢႆႇၵၼ်တင်း NLD၊ NUG၊ PDF ၼႆသေ ထုၵ်ႇသိုၵ်းမၢၼ်ႈတီႉၺွပ်းၵုမ်းၶင်တူဝ်ဝႆႉ ထိုင်မိူဝ်ႈလဵဝ်ပႆႇလွတ်ႈၶိုၼ်း။

ၵူၼ်းၼႂ်းပိုၼ်ႉတီႈထုင်ႉၼွင်ႁၢႆးယႃႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မိူဝ်ႈတႄႇမၼ်းတႄႉ ၺွပ်းၵႂႃႇၵေႃႉလဵဝ်ၵွႆး သိုၵ်းမၢၼ်ႈၼေးမၼ်းဝႃႈ ၵပ်းသိုပ်ႇၵၼ်တင်း PDF ၼႆသေၺွပ်းၵႂႃႇ။ ဝၢႆးၼၼ်ႉ မႃးၺွပ်းၵႂႃႇထႅင်ႈ   4 ၵေႃႉဢေႃႈ ။ ၼႂ်းၼၼ်ႉ ပႃးၵႂႃႇၽူဝ်မေး ၵူႈၼိုင်ႈဢေႃႈ။ ၺွပ်းဝႆႉတီႈ ႁူင်းပလိၵ်ႈဝၢၼ်ႈၼမ်ႉပၼ်ႇၼၼ်ႉဢေႃႈ။ ပေႃးသွၼ်ႇတူၺ်း ၵူၼ်းဢၼ်ၺႃးၺွပ်း မီးမွၵ်ႈ 8 ၵေႃႉၼႆႉ။ တေဢဝ်ငိုၼ်းၵႂႃႇထုတ်ႇဢဝ်ၶိုၼ်းၼႆၵေႃႈ ၶဝ်ဢမ်ႇယွမ်းပွႆႇ”- ဝႃႈၼႆ။

ၵူၼ်းၸိူဝ်းၺႃးသိုၵ်းမၢၼ်ႈ တီႉၺွပ်းၵုမ်းၶင်ၼႆႉ ပဵၼ်သႅၼ်းဢႃယု ၼႂ်းၵႄႈ 25-30  ။ ၼႂ်းၼၼ်ႉ  သွင်ပူႇဢွၵ်ႇ ပဵၼ် ၵူဝ်ႇမဵဝ်းတင်းၶၢႆႇသႃႇဝိၼ်း ၊ သမ်ႉထႅင်ႈ ၵူဝ်ႇဢွင်ႇငူၺ်ႇတူဝ်း ၊ လိၼ်းၸူဝ်းၸိၼ်ႇ ထႅင်ႈ 3 ၵေႃႉတႄႉ ပႆႇႁူႉၸိုဝ်ႈ ၵူၼ်းပိုၼ်ႉတီႈသိုပ်ႇလၢတ်ႈၼင်ႇၼႆ။

မိူဝ်ႈဝၼ်းတီႈ 15 လႄႈ17/4/2023 ၼၼ်ႉၵေႃႈ ၵူၼ်းၼုမ်ႇ 3 ၵေႃႉ တီႈဢိၼ်းတဵင်ႇ ထုင်ႉၼွင်ႁၢႆးယႃႈ ထုၵ်ႇသိုၵ်းမၢၼ်ႈတီႉၺွပ်းသေ ၸႂ်ႉဢဝ်ငိုၼ်း 14 သႅၼ်ထုတ်ႇတူဝ်ၶိုၼ်း။ လိူဝ်ၼၼ်ႉ ႁႂ်ႈဢဝ်ၵႆႇဢဝ်ပဵတ်း ၵႂႃႇလႅၵ်ႈဢဝ်ၶိုၼ်းၵေႃႈမီးၼႆယဝ်ႉ။

ဢိင်ၼိူဝ်လွင်ႈၼႆႉသေ ၵူၼ်းၼႂ်းပိုၼ်ႉတီႈသိုပ်ႇလၢတ်ႈဝႃႈ – “ တႃႇၵေႃႉၼိုင်ႈတႄႉ လူဝ်ႇၸႅတ်ႈလူဝ်ႇထၢမ်ၼႆသေ ႁွင်ႉၵႂႃႇ မွၵ်ႈၵၢင်ၶမ်ႈ 9 မူင်းၼႆဢေႃႈ။ၵၢင်ၶိုၼ်း 11 မူင်းၸင်ႇပွႆႇမႃးၶိုၼ်းဢေႃႈ။ငိၼ်းမၼ်းဝႃႈတႄႉ လႆႈပၼ်ငိုၼ်း 14 သႅၼ်ၼႆဢေႃႈ။ထႅင်ႈသွင်ၵေႃႉတႄႉ ထူဝ်းလၢတ်ႈၽူႈၵွၼ်းပွၵ်ႉႁေ ႁႂ်ႈဢဝ် ပဵတ်းၶဝ် ၵႆႇၶဝ်ၸိူဝ်းၼႆႉ ၵႂႃႇလႅၵ်ႈမႃးၼႆဢေႃႈ။မိူဝ်ႈလဵဝ် သိုၵ်းမၢၼ်ႈၶဝ်ၼႆႉ ၶႂ်ႈယွၼ်းငိုၼ်းၵူၼ်းမိူင်းၸိူင်ႉႁိုဝ်ၵေႃႈ ယွၼ်းလူင်ၵႂႃႇႁဵတ်းၼႆ ဢမ်ႇမီးပၵ်းမီးပိူင် လႆႈမႆႈၸႂ်ႁႅင်းဝႆႉဢေႃႈ။ၶႂ်ႈၺွပ်းၽႂ်ၵေႃႈၺွပ်းသေ တဵၵ်းယွၼ်းငိုၼ်းၵူၼ်းမိူင်း မၢင်ၵေႃႉ 5 မိုၼ်ႇ မၢင်ၵေႃႉ ပဵၼ်သႅၼ်  ” – ဝႃႈၼႆ။

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆႉ ၵူၼ်းမိူင်းႁူမ်ႈတုမ် ဢၼ်ၺႃးတီႉၺွပ်း ႁူဝ်ၵူၼ်းမီး 21,467 ၵေႃႉသေ ၵူၼ်းၸိူဝ်းၺႃးၶႃႈလူႉတၢႆ မီး 3,422 ၵေႃႉၼႆ ၸုမ်းလူလွမ်ၵူၼ်းတူၵ်းၶွၵ်ႈၵၢၼ်မိူင်း AAPP ဢွၵ်ႇဝႆႉ မိူဝ်ႈဝၼ်းတီႈ 20/4/2023 ။