ၾႆးမႆႈဝတ်ႉၵျွင်းလင်ၼိုင်ႈတီႈဝဵင်းလွၵ်ႉၸွၵ်ႇ သင်ႇၶႃႇလူႉလွၼ်ႇၸွမ်းတူၼ်ၼိုင်ႈ

ၾႆးမႆႈဝတ်ႉၵျွင်းလင်ၼိုင်ႈတီႈဝၢၼ်ႈၽြႃးၽိူၵ်ႇ ၸႄႈဝဵင်းလွၵ်ႉၸွၵ်ႇ သင်ႇၶႃႇလူႉလွၼ်ႇၸွမ်းတူၼ်ၼိုင်ႈ။

မိူဝ်ႈဝႃးဝၼ်းတီႈ 19/4/2023 ယၢမ်းၵၢင်ၶမ်ႈ 9 မူင်းၼၼ်ႉ ၾႆးမႆႈဝတ်ႉလင်ၼိုင်ႈ တီႈဝၢၼ်ႈၽြႃးၽိူၵ်ႇ ဢိူင်ႇပႃႇၶႅၼ်( ဖောင်းတောအုပ်စု) ၸႄႈဝဵင်းလွၵ်ႉၸွၵ်ႇ သင်ႇၶႃႇတူၼ်ၼိုင်ႈ ၺႃးၾႆးမႆႈလူႉလွၼ်ႇၸွမ်း။

ၽူႈၶဝ်ႈၸုမ်းၸွႆႈ မိတ်ႉၸိမ( မဇ္စျိမ လူမူကူညီရေးအသင်း ) ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ပဵၼ်ၵျွင်းသွင်ၸၼ်ႉဢေႃႈၼၼ်ႉ။ ၼႂ်းၵျွင်းၼၼ်ႉ မီးမုၼ်ၸဝ်ႈ 2 တူၼ်ၼွၼ်းဝႆႉဢေႃႈၼၼ်ႉ။ လွၼ်ႇၵႂႃႇပႃးၼိုင်ႈၼၼ်ႉၼႃႇၼေႃႈ ၼႂ်းၾႆးၼၼ်ႉ ။ တႃႇပႃးၼိုင်ႈတႄႉ ဝႅၼ်တူၵ်းၵျွင်း ၶႃပေႃးႁၵ်း ဢေႃႈ ။ပႃးဢၼ်လွၼ်ႇၵႂႃႇၼႆႉတႄႉ ထဝ်ႈယဝ်ႉၼႃႇ မၼ်းဢမ်ႇတၼ်းလႅၼ်ႈပူၼ်ႉၾႆးၼၼ်ႉၵႂႃႈ ” – ဝႃႈၼႆ။

သင်ႇၶႃႇဢၼ်လူႉလွၼ်ႇၵႂႃႇၼႂ်းၾႆးၼႆႉ ၸိုဝ်ႈ ၸဝ်ႈၵျီးပၢႆႇ (ဉီးဇင်းဂျီးပိုင်) ဢႃယု 70 ပီ ။ ၼႂ်းၾႆးမႆႈၼၼ်ႉ လူႉသုမ်းငိုၼ်း သႅၼ်ႁွမ်း 240 သႅၼ်ပျႃး လႄႈ ၶိူင်ႈၶူဝ်းၸႂ်ႉသွႆ ၼႂ်းဝတ်ႉဝႃးတင်းၼမ်။

ၽူႈၶဝ်ႈၸုမ်းၸွႆႈ မိတ်ႉၸိမ( မဇ္စျိမ လူမူကူညီရေးအသင်း ) ၵေႃႉၼိုင်ႈသိုပ်ႇလၢတ်ႈဝႃႈ – “ မိူဝ်ႈႁဝ်းၵႂႃႇထိုင်ၼၼ်ႉ ၾႆးပေႃးမႆႈ ဢမ်ႇၶႂ်ႈၵိုတ်းသင်ယဝ်ႉ။ မုၼ်ၸဝ်ႈဢၼ်ၾႆးမႆႈၼၼ်ႉၵေႃႈ ပေႃးၶႂ်ႈပဵၼ်ၽဝ်ႇမူတ်းယဝ်ႉဢေႃႈ။ ၵျွင်းၼႆႉသမ်ႉ ၵႆႁိူၼ်းၵူၼ်းဝၢၼ်ႈဝႆႉတၢၼ်ႇတၢၼ်ႇလႄႈ ဢမ်ႇတၼ်းလႆႈၶႄၶိုတ်းၶၢဝ်းယၢမ်းသေဢိတ်း ။ မႆႈယွၼ်ႉ ၾႆးတဵၼ်းၽြႃးၵွႆးၼႆဢေႃႈ ။ ၾႆးမႆႈႁႅင်းၼႃႇလႄႈ မွၵ်ႈ ၶိုင်ႈၸူဝ်ႈမွင်းၼႆႉၵွႆး မႆႈပႅတ်ႈမူတ်း ” – ဝႃႈၼႆ။

ဝတ်ႉၵျွင်းဢၼ်ၾႆးမႆႈၼႆႉ ပဵၼ်ဝတ်ႉသိူဝ်ႇပႅၼ်ႈၵင်ႈပႅၼ်သေ မီးဝႆႉ ၼႂ်းဝၢၼ်ႈၽြႃးၽိူၵ်ႇ ဢိူင်ႇပႃႇၶႅၼ် (ဖောင်းတောအုပ်စု) ၸႄႈဝဵင်းလွၵ်ႉၸွၵ်ႇ။မိူဝ်ႈၼႆႉ ဝၼ်းတီႈ 20/4/2023 ၸုမ်းသင်ႇၶႃႇၼႃယၵ ၾၢႆႇလူလွမ်သႃႇသၼႃႇ ဝဵင်းလွၵ်ႉၸွၵ်ႇ လူင်းပိုၼ်ႉတီႈ ထတ်းတူၺ်းလွင်ႈလူႉသုမ်းဝႆႉယူႇၼႆယဝ်ႉ။

မိူဝ်ႈဝၼ်းတီႈ 3/4/2023 ၼၼ်ႉၵေႃႈ ၾႆးမႆႈႁိူၼ်းလင်ၼိုင်ႈ တီႈပွၵ်ႉ 4 ဝဵင်းၼမ်ႇၸၢင် ၸိုင်ႈတႆးပွတ်းၸၢၼ်း ၼၢင်းယိင်းၵေႃႉၼိုင်ႈ လူႉတၢႆၵိုၵ်းႁိူၼ်း။

ယၢမ်းလဵဝ် ထိုင်ၶၢဝ်းမႆႈယဝ်ႉလႄႈ လွင်ႈသႂ်ႇၽိုၼ်း၊ သႂ်ႇထၢၼ်ႇ ၸိူဝ်းၼႆႉၵေႃႈ ႁႂ်ႈဢွၼ်ၵၼ်ဝႆႉသတိ သင်ဝႃႈ တေၵႂႃႇ ႁဵတ်းၵၢၼ်တၢင်းၼွၵ်ႈႁိူၼ်းယေး ၸိူဝ်းၼႆႉ ႁႂ်ႈမွတ်ႇၾႆးၽိုၼ်းၾႆးထၢၼ်ႇၵၼ်ယဝ်ႉ ၸင်ႇၵႂႃႇယဝ်ႉၵေႃႈ ႁႂ်ႈလူင်းဝႆႉ မဵင်း ၾႆးၾႃႉ ၸိူဝ်းၼႆႉၵၼ်ယဝ်ႉ ၸင်ႇဢွၵ်ႇၵႂႃႇႁိူၼ်း ၵႂႃႇႁဵတ်းၵၢၼ်ၼႆ တေတိူဝ်းလီ ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈ။