မိူဝ်ႈၼႆႉ ဝၼ်းတီႈ 20/4/2023 ယၢမ်းၵၢင်ၼႂ်ၼၼ်ႉ ၵူၼ်းၸၢႆး 3 ၵေႃႉ ၶဝ်ႈၸူၼ်ႁၢၼ်ႉၶၢႆၶမ်းပျေႉဝ ႁိမ်းၵၢတ်ႇလူင်ဝဵင်းၼမ်ႉလၼ်ႈ  ၺႃးၺွပ်း 1 ၵေႃႉ ပၢႆႈလွတ်ႈ 2 ၵေႃႉ  ။

ၵူၼ်းၼႂ်းပိုၼ်ႉတီႈ ဝဵင်းၼမ်ႉလၼ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ပဵၼ်ၵႂႃႇမိူဝ်ႈၵၢင်ၼႂ်ၼၼ်ႉ ဢေႃႈၼၼ်ႉ သႅင်ႇၶဝ်မီးၸဵင်ႇၸၢၼ်းဝၼ်းဢွၵ်ႇၵၢတ်ႇၼၼ်ႉဢေႃႈ။ မႅၼ်ႈမိူဝ်ႈၶဝ်တေပိုတ်ႇသႅင်ႇၶမ်းၶဝ်ၼၼ်ႉၵႂႃႈ ။ ၸူၼ်ၸိူဝ်းၼၼ်ႉၵေႃႈ ပႂ်ႉငွႆးၶဝ်ပိုတ်ႇႁၢၼ်ႉ ႁဵတ်းၼႆၶႃႈၵႂႃႈ။ ပႃးၵွင်ႈမႃးႁေၼႆဢေႃႈ။ၸဝ်ႈသႅင်ႇလႄႈ ၵူၼ်းႁိမ်းႁွမ်း ႁူမ်ႈၵၼ်ႁေ လမ်းၺွပ်းလႄႈ တီႉလႆႈ ၵေႃႉၼိုင်ႈ တႃႇ 2 ၵေႃႉၼၼ်ႉတႄႉ ပၢႆႈလွတ်ႈ ။ ၶမ်းတႄႉဢမ်ႇတၼ်းလႆႈသင်ၼင်ႇၵဝ်ႇ။ ၵေႃႉဢၼ်ၺွပ်းလႆႈဝႆႉၼၼ်ႉၵေႃႈ ဢၢပ်ႈပၼ်ပလိၵ်ႈယဝ်ႉၶႃႈ” – ဝႃႈၼႆ။

ႁၢၼ်ႉၶၢႆၶမ်းဢၼ်ၺႃးၸူၼ်ၼႆႉ ၸိုဝ်ႈႁွင်ႉ ႁၢၼ်ႉၶမ်းပျေႉဝ( ပြည့်ဝ ရွှေဆိုင်) မီးၸဵင်ႇၸၢၼ်းဝၼ်းဢွၵ်ႇ ၵၢတ်ႇလူင် သေ ယူႇၼႂ်းပွၵ်ႉၸၢၼ်း ၸႄႈဝဵင်းၼမ်ႉလၼ်ႈ။

ၵူၼ်းၼႂ်းပိုၼ်ႉတီႈ ဝဵင်းၼမ်ႉလၼ်ႈၵေႃႉၼိုင်ႈသိုပ်ႇလၢတ်ႈဝႃႈ – “  မိူဝ်ႈထဵတ်ႈထၢမ်တူၺ်း ၵေႃႉဢၼ်ၺွပ်းလႆႈၼၼ်ႉ  လႆႈႁူႉဝႃႈၸိုဝ်ႈမၼ်းပဵၼ် ဢၢႆႈၶမ်း ယူႇဝဵင်းၵေးသီး။   မၼ်းလၢတ်ႈဝႃႈ မၼ်းႁဵတ်းၵၢၼ်တီႈပၢမ်ႉၼမ်ႉမၼ်း  ထူၺ်းၶမ်း ၼိူဝ်သဵၼ်ႈတၢင်းလူင် ၼမ်ႉလၼ်ႈ ၼွင်ဝူဝ်း၊ ၾၢႆႇၸၢၼ်းၼမ်ႉလၼ်ႈ ၼၼ်ႉၼႆဝႃႇ ။ တလဵဝ် ပၢမ်ႉ ၼမ်ႉမၼ်း ၼၼ်ႉ လႄႈတင်းႁိူၼ်းၸဝ်ႈပၢမ်ႉ ဢၼ်မီးၾၢႆႇႁွင်ႇဝဵင်းၼၼ်ႉ ပလိၵ်ႈၵႂႃႇၵမ်ဝႆႉမူတ်းယဝ်ႉ။ မႄႈလဵင်ႉပၢမ်ႉ ၼမ်ႉမၼ်း ၼၼ်ႉတႄႉ ပၢႆႈဝႆႉယူဝ်ႉထၢင်ႇတႄႉ ဢမ်ႇႁၼ်တူဝ် ” – ၵူၼ်းၼုမ်ႇဝဵင်းၼမ်ႉလၢၼ်ႈ  လၢတ်ႈၼင်ႇၼႆ။ 

လွင်ႈၼႆႉ ယူႇတီႈၽူႈတွႆႇႁွၵ်ႈ တိတ်းတေႃႇ ႁႃၸူးပၢမ်ႉၼမ်ႉမၼ်းထူၺ်းၶမ်း ဢမ်ႇလႆႈလႄႈ ဢမ်ႇလႆႈႁူႉႁူဝ်ယွႆႈ တႅတ်ႈတေႃး။

တီႈဝဵင်းၼမ်ႉလၼ်ႈ – သီႇပေႃႉၼႆႉ ၵႆႉမီးလွင်ႈၸူၼ်ႁၢၼ်ႉၶမ်းမႃးၶိူဝ်းယႂ်း။ ၵူၼ်းမိူင်းၼမ်ႉလၼ်ႈတႄႉဝႃႈ ၸူၼ်ၵမ်းၼႆႉၵေႃႈ လႅပ်ႈပဵၼ်သၢႆလဵဝ်ၵၼ်တင်း ဢၼ်ၸူၼ်ႁၢၼ်ႉၶမ်း တိတ်ႉသၢၼ်း  လႄႈ ဢၼ်ၸူၼ် တီႈႁၢၼ်ႉၶမ်း ယီႇသျိၼ်းဝဵင်းသီႇပေႃႉ မိူဝ်ႈႁူဝ်ပီၼႆႉ ဝႃႈၼႆသေတႃႉ ထႅင်ႈ 2 ၵေႃႉတိုၵ်ႉပၢႆႈ လွတ်ႈဝႆႉလႄႈ ပႆႇႁူႉၶေႃႈတွပ်ႇ တႅတ်ႈတေႃး။

မိူဝ်ႈဝၼ်းတီႈ 20/1/2023 ၼၼ်ႉ မီးၵူၼ်းၸၢႆး 2 ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်လမ်းၼိုင်ႈ ၶဝ်ႈၸူၼ် ႁၢၼ်ႉၶၢႆၶမ်း “တိတ်ႉသၢၼ်း” တၢင်းႁွင်ႇၵၢတ်ႇလူင် ဝဵင်းၼမ်ႉလၼ်ႈ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး လႆႈ ၵႂႃႇငိုၼ်းတင်းၶမ်း မွၵ်ႈ 300 သႅၼ်ပျႃး။

လိူဝ်ၼၼ်ႉ မိူဝ်ႈဝၼ်းတီႈ 21/2/2023 ၼၼ့်ၵေႃႈ ၸဝ်ႈႁၢၼ့်ၶၢႆၶမ်းယီႇသျိၼ်း တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၺႃးၸူၼ်ပဵၼ်ပွၵ်ႈၵမ်းသွင် ပႃးၶမ်းၵႂႃႇ 6 ၸွႆႉပၢႆ။

ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ မီးၽူႈလၵ်ႉၸၵ်ႉၶုတ်ႈလိူင်ႇၼမ်ႁႅင်း ႁဵတ်းႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ၵူၼ်းပိုၼ်ႉတီႈ ၵႆႉၺႃးၸူၼ်ႁၢၼ်ႉၾူၼ်း၊ ၺႃးလၵ်ႉရူတ်ႉၵႃး ၶူဝ်းႁိူၼ်းယေး ၸိူဝ်းၼႆႉ မႃးၶိူဝ်းယႂ်း။