ၵူၼ်းမွၵ်ႇမႆႇ 3 ၵေႃႉ ၵႂႃႇႁႃၽၵ်းၶဵဝ်ၼႂ်းထိူၼ်ႇသေ ယဵပ်ႇၺႃးမၢၵ်ႇမႅင်းၾင်လိၼ် ၼႂ်းၼၼ်ႉ ပႃးဢွၼ်ႇယိင်း ဢႃယု 8 ၶူပ်ႇ ၵေႃႉၼိုင်ႈ လႆႈတိူဝ်ႉမၢတ်ႇၸဵပ်းၸွမ်း ႁၢဝ်ႈႁႅင်း။

မိူဝ်ႈဝႃး ဝၼ်းတီႈ 18/4/2023 ယၢမ်းၵၢင်ၼႂ် ၼၢင်းၵေႃး ဢႃယု 31 ပီ၊ ၼၢင်းၶျေႃး ဢႃယု 23 ပီႈလႄႈ ၼၢင်းဢဵင်ႈၶမ်း ဢႃယု 8 ၶူပ်ႇ ၵူၼ်းဝၢၼ်ႈယၢၼ်ႇၵျိၼ်း ဢွၼ်ၵၼ် ၵႂႃႇႁႃၽၵ်းၶဵဝ် ၼႂ်းထိူၼ်ႇသေ ယဵပ်ႇၺႃးမၢၵ်ႇမႅင်းၾင်လိၼ် ႁိမ်းဝၢၼ်ႈၼမ်ႉပႃတႅပ်း ၼႂ်းဢိူင်ႇၵိူၼ်ႇတူလူင် ၸႄႈဝဵင်းမွၵ်ႇမႆႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း လႆႈတိူဝ်ႉမၢတ်ႇၸဵပ်း တင်းသၢမ် ၼႆယဝ်ႉ။

ၵူၼ်းပိုၼ်ႉတီႈ ဝဵင်းမွၵ်ႇမႆႇ လၢတ်ႈတီႈၽူႈတွႆႇႁွၵ်ႈဝႃႈ -“ ၸႂ်ႈဢေႃႈ ၶဝ်ၵႂႃႇႁႃ ၽၵ်းႁႃၶဵဝ်ၼႂ်းထိူၼ်ႇလႄႈ ၵႂႃႇယဵပ်ႇၺႃးမၢၵ်ႇ။ ဢွင်ႈတီႈၶဝ် ၽႃႇၺႃးၼၼ်ႉ ဢမ်ႇပေႃးၵႆတင်းဝၢၼ်ႈၼမ်ႉပႃတႅပ်း။ ၶဝ်ၵႂႃႇၸွမ်းၵၼ် 3 ၵေႃႉ ၼႂ်းၼၼ်ႉ ၵေႃႉ ၼိုင်ႈယဵပ်ႇၺႃးဢွၼ်တၢင်း ထႅင်ႈသွင်ၵေႃႉ သမ်ႉ ၺႃးၸၢၵ်ႇၸွမ်း။ ဢၼ်ၺႃးၸၢၵ်ႇမၢၵ်ႇၼႆႉ ပႃးလုၵ်ႈဢွၼ်ႇ ဢႃယု 8 ၶူပ်ႇ။ ၵူၼ်းလူင် 2 ၵေႃႉၼၼ်ႉတႄႉ တိူဝ်ႉၸွမ်းၵုမ်ႇၵူၼ်ႈလႄႈ ဢႅဝ် ။ လုၵ်ႈဢွၼ်ႇသမ်ႉ တိူဝ်ႉတီႈၵွၵ်းႁူဝ်။ မိူဝ်ႈလဵဝ် သိုၵ်း PNLO မႃးဢဝ်ၵႂႃႇယူတ်းယႃဝႆႉယဝ်ႉ”- ဝႃႈၼႆ။

ဢွင်ႈတီႈ ၵူၼ်းမိူင်း 3 ၵေႃႉ ၵႂႃႇယဵပ်ႇၺႃးမၢၵ်ႇၼၼ်ႉ ပဵၼ်တီႈသိုၵ်း RCSS တင်း PNLO တူင်ႉၼိုင်ၵႂႃႇမႃး ယၢမ်းလဵဝ် သိုၵ်းတင်း 2 ၾၢႆႇ ၼႆႉ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ဝႃႈၼႆ။

“ဢွင်ႈတီႈ ၵူၼ်းမိူင်းၵႂႃႇယဵပ်ႇၺႃးမၢၵ်ႇၼၼ်ႉ ပဵၼ်တီႈသိုၵ်း RCSS တင်း PNLO တူင်ႉၼိုင်ႈဝႆႉၶႃႈဢေႃႈ။ ၵူၺ်းၼႃႇ မၢၵ်ႇဢၼ်တႅၵ်ႇသႂ်ႇ ၵူၼ်းမိူင်းၼၼ်ႉ ပဵၼ်ၸုမ်းလႂ်ႁၢင်ႈၵၢင်ဝႆႉတႄႉ ဢမ်ႇႁူႉၶႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 3/4/2023 ၼၼ်ႉ သိုၵ်း PNLO တင်း RCSS ပဵၼ်ပၢင်တိုၵ်းၵၼ် ႁိမ်းဝၢၼ်ႈၼမ်ႉပႃတႅပ်း ၼႂ်း ဢိူင်ႇၵိူၼ်ႇတူလူင် ၼႆႉသေ တင်းသွင်ၾၢႆႇမီးလွင်ႈမၢတ်ႇၸဵပ်းလူႉတၢႆ ၼင်ႇၵၼ်။

RCSS တင်း PNLO ၼႆႉ ပဵၼ်ၸုမ်း လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ဝႆႉၼင်ႇၵၼ်သေဢမ်ႇၵႃး ယဝ်ႉၵေႃႈ ပဵၼ်လုၵ်ႈ ၸုမ်း ၼႂ်း PPST ဝႆႉ ၼင်ႇၵၼ်ထႅင်ႈ။