ၵူၼ်းမိူင်းတႆး ၸူမ်ၼမ်ႉတၢႆ ၽွင်းသွၼ်းၼမ်ႉၼႆႉ ဢမ်ႇယွမ်း 6 ၵေႃႉ

ၽွင်းသၢင်းၵျၢၼ်ႇ/ လိူၼ်ႁႃႈ (သွၼ်းၼမ်ႉ) ပီၼႆႉ ၵူၼ်းမိူင်းတႆး ပွတ်းႁွင်ႇ ၵမ်ႈၼမ် လူင်းလဵၼ်ႈၼမ်ႉသေ ထိုင်တီႈၸူမ် ၼမ်ႉတၢႆ ဢမ်ႇယွမ်း 6 ၵေႃႉယဝ်ႉ ၼႂ်းၼၼ်ႉ ပႃးဢွၼ်ႇၸၢႆး ဢႃယု 8 ၶူပ်ႇ ၵေႃႉၼိုင်ႈ။

ပူၼ်ႉမႃး မိူဝ်ႈဝၼ်းတီႈ 16/4/2023 ၼၼ်ႉ တူၵ်းမႅၼ်ႈဝၼ်းသၢင်းၵျၢၼ်ႇၶိုၼ်ႈ ၼုမ်ႇၸၢႆး ဢႃယု 17 ပီ ၵေႃႉၼိုင်ႈ လူင်း လဵၼ်ႈၼမ်ႉ ၼႂ်းမႄႈၼမ်ႉလၢၼ်းသေ ၸူမ်ၼမ်ႉတၢႆ တီႈႁိမ်းဝၢၼ်ႈၸၢင်ႉ ၾၢႆႇတူၵ်းဝဵင်း ယၢၼ်ဝဵင်းမွၵ်ႈ 1 လၵ်း ၼႂ်းၸႄႈ ဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ ဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ၵႂႃႇလဵၼ်ႈၼမ်ႉၸွမ်းၵၼ် 4-5 ၵေႃႉ ၼႆဝႃႇၼၼ်ႉ။ သမ်ႉၵႂႃႇ လဵၼ်ႈတီႈလိုၵ်ႉၼၼ်ႉၵႂႃႈ ထိုင်တီႈ ပေႃးၸူမ်ၼမ်ႉတၢႆ ႁဵတ်းၼၼ်။ ၵူၼ်းၼုမ်ႇၼႆႉ ႁဵတ်းၵႃႈပွင်ႇၵႃႈပဵၼ်ၼေႈ၊ ၶဝ်ဢမ်ႇၵူဝ် လိပ်းၵူဝ်တၢႆသင်။ တီႈလႂ်ထုၵ်ႇလီၵႂႃႇ ဢမ်ႇထုၵ်ႇလီၵႂႃႇၵေႃႈ ၶဝ်ဢမ်ႇႁူႉ။ ၵမ်းၼႆႉ မိူၼ်ႁၼ်ယူႇၼႆႉၼႃႇ လူႉတၢႆယဝ်ႉ သေး လၢႆၵေႃႈ ဢမ်ႇၸၢင်ႈႁဵတ်းႁိုဝ်”- ဝႃႈၼႆ။

ၼႂ်းဝၼ်းတီႈ 16 ၼၼ်ႉၵေႃႈ ၼုမ်ႇၸၢႆး ဢႃယု 15 ပီ ၵူၼ်းၵျွၵ်ႉမႄး ၵႂႃႇလဵၼ်ႈၼမ်ႉတူႇသေ ၸူမ်ၼမ်ႉတၢႆ ၵေႃႉၼိုင်ႈ။

မိူဝ်ႈဝၼ်းတီႈ 15/4/2023 မႅၼ်ႈဝၼ်းၼဝ်ႈ(ႁိုဝ်) ဝၼ်းသၢင်းၵျၢၼ်ႇၵျၢပ်ႈၼၼ်ႉ ၵူၼ်းဝဵင်းမူႇၸေႊ ၵႂႃႇလဵၼ်ႈၼမ်ႉသေ ၸူမ်ၼမ်ႉတၢႆ ၼႂ်းၼမ်ႉမၢဝ်း 3 ၵေႃႉ။ ၼႂ်းဝၼ်းၼၼ်ႉ ဢွၼ်ႇၸၢႆး ဢႃယု 8 ၶူပ်ႇ ၵေႃႉၼိုင်ႈ တီႈဝဵင်းသီႇပေႃႉ ၼၼ်ႉၵေႃႈ ၸူမ်ၼမ်ႉတူႈတၢႆ ၼႆယဝ်ႉ။

ၵွၼ်ႇပႆႇထိုင် ၶၢဝ်းသွၼ်းၼမ်ႉၼႆႉ မိူဝ်ႈဝၼ်းတီႈ 10/4/2023 ၼၼ်ႉ ၸဝ်ႈသၢင်ႇဢွၼ်ႇ ပၢႆႈၽေးသိုၵ်း တူၼ်ၼိုင်ႈ ၸူမ် ၼမ်ႉလွၼ်ႇၵႂႃႇ တီႈၼမ်ႉတူၵ်း ႁိမ်းဝၢၼ်ႈၶူဝ်တႅၼ်း ၸႄႈဝဵင်းၵျွၵ်ႉမႄး။ မိူဝ်ႈဝၼ်းတီႈ 6/4/2023 ၼၼ်ႉသမ်ႉ ၵူၼ်းပိုၼ်ႉ တီႈဝဵင်းသီႇပေႃႉ ၸူမ်ၼမ်ႉတၢႆ ၵေႃႉၼိုင်ႈ။

ၽူႈၶဝ်ႈၸုမ်း တူင်ႉၼိုင်ၸွႆႈထႅမ်တူင်ႇဝူင်းၵူၼ်း ဝဵင်းသီႇပေႃႉ (နယ်စည်းမခြား ပရဟိတ သီပေါ) လၢတ်ႈတီႈၽူႈတွႆႇႁွၵ်ႈ ဝႃႈ -“ပီၼႆႉ ၵူၼ်းမိူင်းလူႉတၢႆ ယွၼ်ႉၸူမ်ၼမ်ႉ ၽွင်းၶၢဝ်းသၢင်းၵျၢၼ်ႇၼႆႉ ၶႂ်ႈဝႃႈ ၼမ်လိူဝ်ၵူႈပီ။ ၵူၼ်းၼုမ်ႇ ႁဝ်းၼႆႉ ဢဝ် တၢင်းပျေႃႇပဵၼ်ယႂ်ႇသေ လူႉသုမ်းသၢႆၸႂ် ၵႂႃႇၸိူင်ႉၼႆ ပဵၼ်ဢၼ်လီသေးလၢႆၸၢတ်ႈပၢၼ်ၶဝ်ၼႃႇ မႅၼ်ႈၽွင်းတိုၵ်ႉလီႁႃ ႁဵတ်းၵၢၼ် တႃႇၶိုၼ်ႈယႂ်ႇတူဝ်ၵဝ်ႇယူႇ”- ဝႃႈၼႆ။

ၵွပ်ႈၼႆလႄႈ ပေႃးထိုင်မႃးၶၢဝ်းသၢင်းၵျၢၼ်ႇ လိူၼ်ႁႃႈသွၼ်းၼမ်ႉၼႆႉ ၵူၼ်းမိူင်းတႆး ဢွၼ်ၵၼ်လဵၼ်ႈၼမ်ႉ/ ႁူတ်းၼမ်ႉ ၵၼ်ၼမ် လိူဝ်ၼၼ်ႉ ၵိၼ်လူၼ်ႉပျေႃႇမူၼ်ႈၼႃႇဢႃးၼမ်လႄႈ ထိုင်တီႈပေႃးလႆႈၸူမ်ၼမ်ႉတၢႆ လူႉသုမ်းသၢႆၸႂ်မႃးမီးၵူႈပီ။ လွင်ႈၼႆႉ ၵူၼ်းမိူင်းတႆး လူဝ်ႇလႆႈမီးလွင်ႈၾၢင်ႉသတိယႂ်ႇၼမ် ၼင်ႇႁိုဝ် ပေႃးတေၸၢင်ႈႁႄႉၵင်ႈလႆႈလႄႈ ဢမ်ႇထိုင်တီႈ လူႉတၢႆထႅင်ႈၼၼ်ႉ ၵူၼ်းၼုမ်ႇ ပိုၼ်ႉတီႈ ဝဵင်းသီႇပေႃႉ ၵေႃႉၼိုင်ႈလၢတ်ႈၼင်ႇၼႆ။