ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢထမ်ႇမ ယွၼ်းငိုၼ်းၵူၼ်းဝၢၼ်ႈ 3 သႅၼ်ပျႃးသေဢမ်ႇၵႃး ပၢႆယိုဝ်းၵိၼ်ၵႆႇ ၵူၼ်းဝၢၼ်ႈထႅင်ႈ ယိုဝ်းဢမ်ႇတိူဝ်ႉမႅၼ်ႈလႄႈ ယွၼ်းၶိုၼ်းၵႃႈမၢၵ်ႇၵွင်ႈ 1 လုၵ်ႈ 10,000 ပျႃး။
ပူၼ်ႉမႃး ဝၼ်းတီႈ 12/4/2023 ယၢမ်းၵၢင်ဝၼ်း ႁိူၼ်းၵူၼ်းဝၢၼ်ႈၼမ်ႉသေႃႉလင်ၼိုင်ႈ ၼႂ်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ထုၵ်ႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢဵၼ်ႁႅင်းမွၵ်ႈ 4 ၵေႃႉ မႃးဢထမ်ႇမ ယွၼ်းငိုၼ်း 3 သႅၼ် ဢမ်ႇလႆႈလႄႈ ယွၼ်းၵိၼ်ၵႆႇ ၸဝ်ႈၶွင်ႁိူၼ်းထႅင်ႈ ယိုဝ်းဢမ်ႇတိူဝ်ႉမႅၼ်ႈသေ ယွၼ်းႁႂ်ႈၸဝ်ႈႁိူၼ်း သၢႆႈတႅၼ်းပၼ်ၵႃႈမၢၵ်ႇ ၵွင်ႈၶဝ်ၶိုၼ်း တႃႇ 2 လုၵ်ႈ မႅၼ်ႈငိုၼ်း 20,000 ပျႃး ၼႆယဝ်ႉ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းတဢၢင်း TNLA လုၵ်ႉတၢင်းဝၢၼ်ႈပၢင် ၵေႃႈ ၶီႇရူတ်ႉၶိူင်ႈ လူင်းမႃး 2 လမ်း ဢဵၼ်ႁႅင်းၶဝ်မီး 4 ၵေႃႉ။ ၽူႈဢွၼ်ႁူဝ်ၶဝ်ၼၼ်ႉ ၸိုဝ်ႈႁွင်ႉ ၵျေႃႇတေး ၶဝ်ဢထမ်ႇမ မႃးယွၼ်းငိုၼ်း ၵူၼ်း ဝၢၼ်ႈၼမ်ႉသေႃႉ လင်ၼိုင်ႈ တႃႇငိုၼ်း 3 သႅၼ်။ ၵူၺ်းၵႃႈ ၸဝ်ႈႁိူၼ်း ၼၼ်ႉ ဢမ်ႇပၼ်လႆႈလႄႈ ၶဝ်ၶဝ်ႈသွၵ်ႈတဝ် ၽႅတ်းၽႃႈ ႁူမ်ႈၶူဝ်းၼွၼ်းသေ ထူပ်းႁၼ်ငိုၼ်း 1 သႅၼ် တီႈတႂ်ႈမွၼ်ႁူဝ် ၼၼ်ႉၵေႃႈ ဢဝ်ၵႂႃႇ။ ၵမ်း ၼႆႉ ၶဝ်ယွၼ်းၵိၼ်မူ ၸဝ်ႈႁိူၼ်း ဢမ်ႇယွမ်းပၼ် ၶိုၼ်းယွၼ်းၵိၼ်ၵႆႇ မိူဝ်ႈ ၽွင်းၶဝ်ယိုဝ်းၵႆႇၼၼ်ႉ ဢမ်ႇတိူဝ်ႉမႅၼ်ႈလႄႈ ယွၼ်းၶိုၼ်းၵႃႈမၢၵ်ႇၵွင်ႈၶဝ်ၶိုၼ်း 1 လုၵ်ႈ 10,000 ပျႃး တႃႇ 2 လုၵ်ႈ မႅၼ်ႈငိုၼ်း 20,000 ပျႃး”- ဝႃႈၼႆ။
ဢိင်ၼိူဝ်လွင်ႈၼႆႉ သိုၵ်းတဢၢင်းပၢႆတဵင်ၵႂၢမ်းဝႆႉထႅင်ႈ သင်ဝႃႈ ၶၢဝ်ႇလွင်ႈၼႆႉ ပိုၼ်ၽႄႈဢွၵ်ႇၵႂႃႇၸိုင် ၸဝ်ႈၶွင် ႁိူၼ်းၼၼ်ႉ တၵ်းတေၺႃးပၼ်တၢမ်ႇတၢင်းၽိတ်းဢမ်ႇႁၢင့် ဝႃႈၼႆ။ ၵဵဝ်ႇၵပ်းလွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူး တင်းၽူႈၶၢၼ်ပၢၵ်ႇ တပ်ႉသိုၵ်းတဢၢင်းၵေႃႈ ဢမ်ႇလႆႈ။
ဝၢၼ်ႈၼမ်ႉသေႃႉၼႆႉ ယူႇၼႂ်းဢိူင်ႇမိူင်းၵႅတ်ႈ မီးၾၢႆႇဢွၵ်ႇဝဵင်းလႃႈသဵဝ်ႈ တင်းမူတ်းမီးလင်ႁိူၼ်း 8 လင် ၵမ်ႈၼမ် ႁဵတ်းၵိၼ် ၵၢၼ်သူၼ်ႁႆႈၼႃး ၽုၵ်ႇၶဝ်ႈၵၢပ်ႇ(ၶဝ်ႈၶႄႇ) ၸိူဝ်းၼႆႉ။
“လွင်ႈၼႆႉ ႁဝ်းၶႃႈ ၵူၼ်းမိူင်းတႄႉ ၶႂ်ႈႁႂ်ႈမီးလွင်ႈၽဵင်ႇပဵင်းပဵၼ်ထမ်းလႄႈ မီးလွင်ႈႁူမ်ႇလူမ်ႈၶႃႈ။ လွင်ႈၶဝ်ႁဵတ်း ၸိူင်ႉၼႆ မၼ်းဢမ်ႇထုၵ်ႇ ၵွပ်ႈၼႆလႄႈ တုၵ်းယွၼ်းထိုင် ၶႂ်ႈႁႂ်ႈဢဝ်တၢင်းၽိတ်းပၼ် လွင်ႈၶဝ်မႃးပူၼ်ႉပႅၼ် တေႃႇၵူၼ်းမိူင်းႁဝ်းၶႃႈ ၸိူင်ႉၼႆဢေႃႈ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
သိုၵ်းတဢၢင်းၼႆႉ ပၵ်းတပ်ႉ တူင်ႉၼိုင်ယူႇဝႆႉ တၢင်းဝၢၼ်ႈပၢင်ၵေႃႈ ၼႂ်းဢိူင်ႇလွႆမေႃႇ တေယၢၼ်ၵႆၵၼ်တင်း ဝၢၼ်ႈၼမ်ႉသေႃႉ မွၵ်ႈ 1 ၸူဝ်ႈမူင်း (ပေႃးၶီႇရူတ်ႉၶိူင်ႈ) ဢွင်ႈတီႈတၢင်းၾၢႆႇပုၼ်ႉ ဢဵၼ်ႁႅင်းသိုၵ်းတဢၢင်း တူင်ႉၼိုင်ယူႇဝႆႉမွၵ်ႈ 60 ၼႆႉ။
