Saturday, May 25, 2024

သိုၵ်းမၢၼ်ႈတင်း PDF တိုၵ်ႉသိုပ်ႇပဵၼ်ပၢင်တိုၵ်းႁၢဝ်ႈႁႅင်း တီႈဝဵင်းၼွင်ၶဵဝ်

Must read

ၶၢဝ်းတၢင်း 8 ဝၼ်းမႃးၼႆႉ သိုၵ်းမၢၼ်ႈတင်း TNLA, PDF ပဵၼ်ပၢင်တိုၵ်းၵၼ် ၼႂ်းၸႄႈဝဵင်းၼွင်ၶဵဝ် မႃးၶိူဝ်းယႂ်း ယၢမ်းလဵဝ် တင်းသွင်ၾၢႆႇ တိုၵ်ႉထႅမ်ႁႅင်းသိုၵ်းၼင်ႇၵၼ်ထႅင်ႈတင်းၼမ်။

ၶိူင်ႈမိၼ်သိုၵ်းမၢၼ်ႈ
Photo by – ၵူၼ်းပိုၼ်ႉတီႈ/ ၶိူင်ႈမိၼ်သိုၵ်းမၢၼ်ႈ တီႈဝဵင်းၼွင်ၶဵဝ်

မိူဝ်ႈဝႃး ဝၼ်းတီႈ 12/4/2023 ယၢမ်းၵၢင်ၼႂ် 6 မူင်းပၢႆ တေႃႇထိုင် 7 မူင်း ၶၢဝ်းတၢင်းမွၵ်ႈ 1 ၸူဝ်ႈမူင်းၼႆႉ သိုၵ်းမၢၼ်ႈတင်း သိုၵ်းတဢၢင်း TNLA, ၸုမ်းၵႅတ်ႇၶႄၵူၼ်းမိူင်း PDF ပဵၼ်ပၢင်တိုၵ်းၵၼ် ၾၢႆႇၸၢၼ်းဝၢၼ်ႈၼွင်လူင် (အင်းမကျေးရွာ) ၼႂ်း ၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇထႅင်ႈ ႁၢဝ်ႈႁႅင်း။  

- Subscription -

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်း မိူဝ်ႈဝႃးၼႆႉ ပဵၼ်တီႈၾၢႆႇၸၢၼ်းဝၢၼ်ႈၼွင်လူင်လႄႈ ၾၢႆႇ ဢွၵ်ႇဝၢၼ်ႈၵုင်းၸၢမ် လွင်ႈမၢတ်ႇၸဵပ်းလူႉတၢႆၶဝ်တႄႉ ဢမ်ႇလႆႈႁူႉၸွမ်း။ မိူဝ်ႈဝႃး ပွတ်းၼႂ် PDF လုၵ်ႉမၼ်းတလေး ထႅမ် ႁႅင်းၶိုၼ်ႈမႃး ဢဵၼ်ႁႅင်း 60 ပၢႆ။ ထိုင်မႃး ယၢမ်းႁူဝ်ၶမ်ႈ 7 မူင်းပၢႆ ၸုမ်း PDF ၼႆႉ လုၵ်ႉမၼ်းတလေး ထႅမ်ႁႅင်းသိုၵ်းၶိုၼ်ႈမႃး ထႅင်ႈ ယွၼ်ႉလပ်ႉသိင်ႇလႄႈ ဢမ်ႇလႆႈႁူႉဢဵၼ်ႁႅင်းၶဝ်။ ၾၢႆႇသိုၵ်းမၢၼ်ႈၵေႃႈ ထႅမ်မႃးထႅင်ႈၵႃး 3 လမ်း မႃးၶျႃႉၵူၼ်းၶဝ်ဝႆႉတီႈ ဝၢၼ်ႈသပ်ႉပေႇယေႇ”- ဝႃႈၼႆ။

ပၢင်တိုၵ်းသိုၵ်းမၢၼ်ႈတင်း TNLA, PDF ၼႂ်းၸႄႈဝဵင်းၼွင်ၶဵဝ်ၼႆႉ တႄႇပဵၼ်မႃး မိူဝ်ႈဝၼ်းတီႈ 5/4/2023 ၼၼ်ႉသေ ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈတိုၵ်ႉတႅၵ်ႇယူႇ ၶိူဝ်းယႂ်း ၼႆႉယဝ်ႉ။

ၵူၼ်းပိုၼ်ႉတီႈ ဢၼ်လႆႈပၢႆႈၽေးသိုၵ်းသမ်ႉ ပဵၼ်ၵူၼ်းဝၢၼ်ႈ ၼႂ်းဢိူင်ႇႁူဝ်ၶူဝ်၊ ဢိူင်ႇၵုင်းၵျီး၊ ဢိူင်ႇၵိဝ်ႇဢၢင်းလႄႈ ဢိူင်ႇ သၢၼ်ႇၽူဝ်ႇ ၸိူဝ်းၼႆႉ ႁူဝ်ၵူၼ်းဢမ်ႇယွမ်းႁဵင် ၼႆယဝ်ႉ။

ၸူဝ်ႈသိုၵ်းမၢၼ်ႈတင်း TNLA, PDF ယိုဝ်းၵၼ်မႃးၼႆႉ ႁိူၼ်းယေးၵူၼ်းဝၢၼ်ႈ လူႉၵွႆ ဢမ်ႇယွမ်း 6 လင် ၵမ်ႈၼမ် ပဵၼ်ႁိူၼ်း ၵူၼ်းဝၢၼ်ႈႁူဝ်ၶၢႆး။ ယဝ်ႉၵေႃႈ ႁိူၼ်းၵူၼ်းဝၢၼ်ႈသၢၼ်ႇၽူဝ်ႇ လင်ၼိုင်ႈ ထုၵ်ႇမၢၵ်ႇလူင် သိုၵ်းမၢၼ်ႈ ယိုဝ်းသႂ်ႇ လုၵ်ႈဢွၼ်ႇ ဢႃယု 11 လိူၼ် လူႉတၢႆ ၵေႃႉၼိုင်ႈ။ ဢႃယု 14 ပီ လူႉတၢႆ ၵေႃႉၼိုင်ႈလႄႈ ပေႃႈမႄႈလုၵ်ႈဢွၼ်ႇ သွင်ၽူဝ်မေးလႆႈတိူဝ်ႉ မၢတ်ႇၸဵပ်းႁႅင်း ၼႆယဝ်ႉ။

မိူဝ်ႈဝၼ်းတီႈ 5 ပူၼ်ႉမႃးၼႆႉၵေႃႈ ၵူၼ်းဝၢၼ်ႈၵုင်းၺွင်ႇ ၵႂႃႇတူၺ်းသူၼ်ဢွႆႈၼႆသေ ၽႃႇၺႃးမၢၵ်ႇမႅင်းၾင်လိၼ် ၶွင် PDF လႆႈတိူဝ်ႉမၢတ်ႇၸဵပ်း ၸွမ်းၵေႃႉၼိုင်ႈ။ လိူဝ်ၼၼ်ႉ မၢၵ်ႇလူင်သိုၵ်းမၢၼ်ႈ တူၵ်းတႅၵ်ႇၼႂ်းသူၼ်ဢွႆႈ ၵူၼ်းဝၢၼ်ႈ ထုၵ်ႇၾႆးမႆႈ ထႅင်ႈတင်းၼမ်။

ဢိင်ၼိူဝ် လွင်ႈပၢင်တိုၵ်းၼႆႉသေ ၾၢႆႇသိုၵ်းမၢၼ်ႈ လုၵ်ႉတၢင်းၼွင်ၶဵဝ် – ပၢင်ႇႁူႈ ထႅမ်ႁႅင်းသိုၵ်းၸူး ဢမ်ႇယွမ်း 500 ၵေႃႉ ယဝ်ႉၵေႃႈ ၸႂ်ႉၶိူင်ႈမိၼ် ၸိူဝ်းၼႆႉ တိုၵ်းၸွႆႈထႅင်ႈ။ ၾၢႆႇသိုၵ်းတဢၢင်း TNLA, PDF ၵေႃႈ ႁႅင်းသိုၵ်း ဢမ်ႇယွမ်း 500 ၼႆ ယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း