ႁႅင်းၵၢၼ်ယၢၼ်မိူင်းၵေႃႉၼိုင်ႈ ပေႃႉထုပ်ႉလုၵ်ႈမေးလူႉတၢႆသေပၢႆႈပႅတ်ႈ

ႁႅင်းၵၢၼ်ယၢၼ်မိူင်းၵေႃႉၼိုင်ႈ တီႈဝဵင်းလမ်းပုၼ်း ၸိုင်ႈထႆး ပေႃႉထုပ်ႉလုၵ်ႈမေးတၢႆသေ ဢွၵ်ႇပၢႆႈပႅတ်ႈ။

မိူဝ်ႈဝၼ်းတီႈ 8/4/2023 ယၢမ်းႁူဝ်ၼႂ် 2 မူင်း ၼၼ်ႉ ႁႅင်းၵၢၼ်ယၢၼ်မိူင်းၵေႃႉၼိုင်ႈ တီႈဝၢၼ်ႈႁူဝ်ၾၢႆ ဢိူင်ႇၼွင်ၸၢင်ႉၶိုၼ်ႊ ၸႄႈဝဵင်းလမ်းပုၼ်း ၸိုင်ႈထႆး ပေႃႉထုပ်ႉလုၵ်ႈလၢင်းၼၢင်းမေး ထိုင်တီႈလူႉတၢႆသေ ဢွၵ်ႇပၢႆႈပႅတ်ႈၼႆယဝ်ႉ။

ၵူၼ်းယူႇၸမ်တီႈၵိူတ်ႇႁဵတ်ႇၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ပဵၼ်ၸဵမ်မိူဝ်ႈၶမ်ႈဝၼ်းသဝ်ၼၼ်ႉယဝ်ႉဢေႃႈၼၼ်ႉ။ မၼ်းႁႅမ်လုၵ်ႈမေးမၼ်းသေယဝ်ႉၵေႃႈ ဢဝ်ရူတ်ႉဢွၵ်ႇၵႂႃႇမွၵ်ႈ 3 မူင်းၵၢင်ၼႂ်ၼၼ်ႉၵႂႃႈ။ႁဝ်းၵေႃႈ ဢမ်ႇႁူႉဝႃႈ မၼ်းၶႃႈလုၵ်ႈမေးမၼ်း။ထိုင်မိူဝ်ႈဝႃးၼႆႉ ၸင်ႇငိၼ်းဢၢႆၼဝ်ႈ ဢၢႆႈတူႇ မႅင်းမူၼ်းၵေႃႈ ၼမ်။ ၸင်ႇၵႂႃႇလၢတ်ႈၸဝ်ႈၶွင်ႁွင်ႈထႅဝ် မႃးတူၺ်းၼၼ်ႉၶႃႈၼႃႇ။ ႁွင်ႉပႃးပလိၵ်ႈၶဝ်မႃးၵူတ်ႇထတ်းတူၺ်း ၸင်ႇႁၼ်ဝႃႈ သွင်မႄႈလုၵ်ႈ ၺႃးၶႃႈတၢႆဝႆႉ ဢေႃႈ။ ၼႂ်းႁွင်ႈၼၼ်ႉ ႁၼ်မီး ၶွၼ်ႉၸွၵ်း ၊ မႆႉ ၸိူဝ်းၼႆႉ မၢၵ်ႇမိူဝ်လူင်ဝႆႉဢေႃႈ။ မႄႈလုၵ်ႈသွင်ၵေႃႉၼၼ်ႉတႄႉ ၺႃးပေႃႉထုပ်ႉၸွမ်းၵွၵ်းႁူဝ် ၸိူဝ်းၼႆႉၼႃႇ” – ဝႃႈၼႆ။

သွင်မႄႈလုၵ်ႈ ဢၼ်ၺႃးၶႃႈလူႉတၢႆၼႆႉ ၸိုဝ်ႈၼၢင်းဢုင်ႇ ဢႃယု 30 ပၢႆ ၊လုၵ်ႈၸၢႆး ၸၢႆးမိူင်း ဢႃယု 4 ၶူပ်ႇပၢႆ ပဵၼ်ၵူၼ်းမိူင်း ဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း။ ၵေႃႉဢၼ်ပူၼ်ႉပႅၼ်ၼၼ်ႉ ၸိုဝ်ႈ ၸၢႆးထေႃႇ ဢႃယု 37 ပီ ပဵၼ်ၵူၼ်းမိူင်း ဝဵင်းၵျွၵ်ႉမႄး ၸိုင်းတႆး မိူဝ်ႈလဵဝ် တိုၵ်ႉပၢႆႈလွတ်ႈဝႆႉယူႇၼႆယဝ်ႉ။

ၸၢႆးတႆးထိူၼ်ႇ ၽူႈၸွႆႈထႅမ်ႁႅင်းၵၢၼ်လၢတ်ႈတီႈၽူႈတွႆႇႁွၵ်ႈဝႃႈ “ ၸိူင်ႉၼႆဢေႃႈ ပေႃးတႄႇၼႃႈႁိူၼ်း ဢမ်ႇဝူၼ်ႉၼႃႈဝူၼ်ႉလင်ၵေႃႈ ၸၢင်ႈပဵၼ်ၼႆ။ၶႂ်ႈသင်ႇလၢတ်ႈဝႃႈ ပီႈၼွင်ႉတႆးႁဝ်း ႁႂ်ႈမေႃႁႃမေႃလိူၵ်ႈ ယႃႇႁႂ်ႈၺႃးၸိူင်ႉၼႆ။ယႃႇပေတူၺ်း ၼႂ်းၾဵတ်ႉၼႂ်းလၢႆးသေ ဢဝ်ၵၼ်လူင်ၵႂႃႇႁဵတ်းၼၼ်ႉ မၼ်းဢမ်ႇႁူႉၸႂ်ၵၼ်လႆႈ ပေႃးပဵၼ်ၼႆမႃး ၽႂ်ဢမ်ႇၸၢင်ႈၸွႆႈၽႂ်လႆႈ ။ပီႈၼွင်ႉၶွင်ၵူၼ်းလူႉတၢႆၵႂႃႇၼႆႉၵေႃႈ သမ်ႉပႆႇတိတ်းတေႃႇလႆႈတၢင်းလႂ်ထႅင်ႈၵွၼ်ႇၼႆႉ” – ဝႃႈၼႆ။

သင်ဝႃႈ မီးၵေႃႉလႂ်ႁူႉၸၵ်း ၵူၼ်းဢၼ်လူႉတၢႆၵႂႃႇလႄႈသင် ၵူၼ်းၵေႃႉဢၼ်ပူၼ်ႉပႅၼ်ၼၼ်ႉလႄႈသင် ၵပ်းသိုပ်ႇမႃးလႆႈတီႈ ၸၢႆးတႆးထိူၼ်ႇ မၢႆၾူၼ်း(ထႆး) 083 582 1902 ။

ၵူၼ်းယူႇၸမ်တီႈၵိူတ်ႇႁဵတ်ႇၵေႃႉၼိုင်ႈသိုပ်ႇလၢတ်ႈဝႃႈ- “ ႁႃတိတ်းတေႃႇ တၢင်းလႂ်ၵေႃႈ ပိူၼ်ႈဢမ်ႇႁူႉၸၵ်းၼႆဝႃႈ တေဝႃႈ ၵုမ်ႇပႂ်ႉပီႈၼွင်ႉမၼ်းယူႇၵေႃႈ တေဢမ်ႇပဵၼ်ပူၼ်ႉၶၢပ်ႈတူဝ်သွင်မႄႈလုၵ်ႈၼႆႉသေပွၵ်ႈ။ၵႃႈလႆႈ ႁူမ်ႈၸွႆႈၵၼ်သေ ႁႅၼ်းလူႇႁႅၼ်းတၢၼ်းပၼ်ၵူၺ်းယဝ်ႉၶႃႈ ” -ဝႃႈၼႆ။