ၼၢင်းယိင်းၵေႃႉၼိုင်ႈ တီႈၸႄႈဝဵင်းဢွင်ႇပၢၼ်း ႁၢႆၵႂႃႇႁိုင် 9 ဝၼ်း ၸင်ႇႁၼ်ၶိုၼ်းၶၢပ်ႈတူဝ်တၢႆ လူၺ်ႈၺႃးပေႃႉထုပ်ႉႁဵတ်းႁၢႆႉဝႆႉ။

ၼၢင်းယိင်းၵေႃႉၼိုင်ႈ တီႈၸႄႈဝဵင်းဢွင်ႇပၢၼ်း ႁၢႆတူဝ်ၵႂႃႇ ၸဵမ်မိူဝ်ႈဝၼ်းတီႈ 1/4/2023 ၵၢင်ၼႂ် 10 မူင်း ထိုင်ဝၼ်းတီႈ 9/4/2023 ၵၢင်ၶမ်ႈ 7 မူင်း ၸင်ႇႁၼ်ၶၢပ်ႈတူဝ်တၢႆၶိုၼ်း။

ၸုမ်းၸွႆႈတူင်ႇဝူင်းၵူၼ်းဢွင်ႇပၢၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “  မၼ်းႁၢႆၵႂႃႇၸဵမ်မိူဝ်ႈဝၼ်းၼၼ်ႉႁေ ၽိူဝ်ႇႁၼ်ၶိုၼ်းၵေႃႈ လုပ်ႇၵွၵ်းႁူဝ်မၼ်းၸိူဝ်းၼႆႉ ၺႃးပေႃႉထုပ်ႉဝႆႉ ပေႃးလႅဝ်လူင်ဝႆႉဢေႃႈ။ၵႂႃႇႁၼ်ၶိုၼ်း တီႈၼႂ်းဝၢင်းႁိူၼ်းဢၼ်ၵူၼ်းဢမ်ႇယူႇဝႆႉၼၼ်ႉဢေႃႈ။ ၾၢႆႇလင် လုမ်း တေႃႇသူင်ႇ (ၵၺၼ) ၼၼ်ႉၼႃႇ။ တိၼ်မိုဝ်းမၼ်းၸိူဝ်းၼႆႉၵေႃႈ ၺႃးပေႃႉထုပ်ႉဝႆႉ ပေႃးႁၢၵ်းလႅဝ်ၵႂႃႇသဵင်ႈသေ ပေႃးၼဝ်ႈလၢၼ်ႈလူင်ဝႆႉ တေၵူတ်ႇထတ်းတူၺ်း ပေႃးဢမ်ႇၸၢင်ႈယဝ်ႉ ပဵၼ်ယွၼ်ႉသင်လႄႈၺႃးႁႅမ်ၸိူင်ႉၼႆတႄႉ ပႆႇႁူႉ” – ဝႃႈၼႆ။

ၼၢင်းယိင်းၵေႃႉဢၼ်ၺႃးၶႃႈႁႅမ်တၢႆၼႆႉ မီးဢႃယု 23 ပီ ပဵၼ်ၵူၼ်းႁဵတ်းၵၢၼ် တီႈႁၢၼ်ႉၶၢႆၾူၼ်း ပွၵ်ႉ 3 ၸႄႈဝဵင်းဢွင်ႇပၢၼ်းသေ ႁဵတ်းၵၢၼ်ၶၢႆၶွင်ဢွၼ်ႊလၢႆႊပႃး ။ ဢဝ်ၶၢပ်ႈတူဝ်ၵႂႃႇၵူတ်ႇထတ်းတီႈႁူင်းယႃလူင်ဢွင်ႇပၢၼ်းသေ ပူၼ်ႉၶၢပ်ႈတူဝ်ၼႂ်းဝၼ်းတီႈ 10/4/2023 ။

ၵူၼ်းပိုၼ်ႉတီႈၼၢင်းယိင်းၵေႃႉၼိုင်ႈလၢတ်ႈဝႃႈ  – “ ပိူၼ်ႈထူဝ်းၾူၼ်းႁႃမၼ်း သင်ႇၶွင် ၼႂ်းဢွၼ်ႊလၢႆႊၼႆသေလႄႈ ဢွၵ်ႇၵႂႃႇၼႆဢေႃႈ။ ၽိူဝ်ႇၵႂႃႇၵေႃႈ ပဵၼ်ၼႆၼၼ်ႉၶႃႈၼႃႇ။ပိူၼ်ႈဝႃႈတႄႉ ဢၼ်ၺႃးၺွပ်းၼႆႉ ဢမ်ႇၸႂ်ႈၵေႃႉလဵဝ်ၵူၺ်းၼႆဢေႃႈ။မွၵ်ႈ 2-3 ၵေႃႉၼႆႉၼႆဝႃႈ။ၵူၺ်းၼႃႇ ၼႂ်းၼၼ်ႉ ၼၢင်းယိင်းၵေႃႉၼႆႉတႄႉ ႁၼ်တူဝ်တၢႆဢွၼ်တၢင်းယဝ်ႉ” – ဝႃႈၼႆ။

ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆႉ လၢႆၸႄႈဝဵင်းၼႂ်းမိူင်းတႆး ၵူၼ်းၼုမ်ႇဢၼ်ၺႃးတီႉၺွပ်း မီးမႃးၶိူဝ်းယႂ်း ၵမ်ႈၽွင်ႈႁၢႆတူဝ်ၵႂႃႇ ႁိုင်ၶၢဝ်းတၢင်းဢၼ်ႇၼပ်ႉႁူဝ်လိူၼ် ။ မၢင်ၵေႃႉၵေႃႈ ၶိုၼ်းလွတ်ႈမႃးလႆႈ လွတ်ႈၽေးသေတႃႉ မၢင်ၸိူဝ်းထိုင်လူႉသုမ်းသၢႆၸႂ်။ပၼ်ႁႃၸိူဝ်းၼႆႉ ပႆႇမီးၸုမ်းလႂ် ႁႄႉၵင်ႈၵႄႈလိတ်ႈပၼ်လႆႈ။