မိူဝ်ႈၼႆႉ ဝၼ်းတီႈ 11/4/2023 ယၢမ်းၵၢင်ၼႂ်မွၵ်ႈ 10 မူင်းထိုင် 11 မူင်းၵၢင်ဝၼ်း သိုၵ်း RCSS တင်း SSPP ယိုဝ်းၵၼ် တၢင်းၾၢႆႇဢွၵ်ႇဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းပိုၼ်ႉတီႈ ဢွၼ်ၵၼ်ၵူဝ် ႁႅၼ်းၶူဝ်းပၢႆႈ ၶဝ်ႈဝဵင်း တင်းၼမ်။
ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ ပဵၼ်ႁိမ်းဝၢၼ်ႈမၢၵ်ႇလၢင်း ပဵၼ်သိုၵ်းၶူဝ်းၶဵဝ် – ၶူဝ်းလၢႆး ယိုဝ်းၵၼ် ၶဝ်ၸႂ်ႉပႃးမၢၵ်ႇလူင်ယိုဝ်းထႅင်ႈ။ ၵူၼ်းဝၢၼ်ႈ မၢင်ၸိူဝ်း တိုၵ်ႉမီးၼႂ်းသူၼ်ယူႇၼၼ်ႉ လႆႈငိၼ်းသဵင်ၵွင်ႈတႅၵ်ႇသေ ၼႅတ်ႈလႅၼ်ႈၶဝ်ႈဝၢၼ်ႈ မိူဝ်ႈၵႆႈၼႆႉ။ ယၢမ်းလဵဝ် ၵူၼ်းဝၢၼ်ႈမၢၵ်ႇလၢင်း၊ ဝၢၼ်ႈမွၼ်း၊ ဝၢၼ်ႈသၢင်း၊ ဝၢၼ်ႈၵၢင်းဢုၼ်၊ ဝၢၼ်ႈမၢၵ်ႇၵွၵ်ႇ၊ ဝၢၼ်ႈ ႁူဝ်ၼမ်ႉ ၸိူဝ်းၼႆႉ ႁႅၼ်းၶူဝ်းပၢႆႈၶဝ်ႈဝဵင်း ၵမ်ႈၽွင်ႈပၢႆႈမႃးသွၼ်ႈယူႇၸွမ်း ႁိူၼ်းယေးပီႈ ၼွင်ႉၽႂ်မၼ်းလႄႈ ၵျွင်းမုၼ်ၸဝ်ႈ ၸိူဝ်းၼႆႉ။ ႁူဝ်ၵူၼ်းမီးၵႃႈႁိုဝ်တႄႉ ပႆႇႁူႉ။ မၢင်ၸိူဝ်း တၢင်ႇၶဝ်ႈမႃး ယွၼ်းၾၢၵ်ႇဝႆႉ ၸွမ်းၶူၵ်ႉတမ်ၶဝ်ႈ ၼႂ်းဝဵင်း ၸိူဝ်းၼႆႉၵေႃႈမီးၼမ်”- ဝႃႈၼႆ။
ဢိင်ၼိူဝ် လွင်ႈၼႆႉ ယူႇတီႈ ၽူႈတွႆႇႁွၵ်ႈ ၵပ်းသိုပ်ႇ ၽူႈၶၢၼ်ပၢၵ်ႇတင်း SSPP လႄႈ RCSS ၵေႃႈ ဢမ်ႇလႆႈ။
“ဢၼ်ၶဝ်ပဵၼ်ပၢင်တိုၵ်းၵၼ်ၼႆႉ ႁဝ်းၶႃႈ ၵူၼ်းမိူင်းဢမ်ႇႁၼ်လီၸွမ်းၶႃႈ သင်ဝႃႈ ဢမ်ႇႁူမ်ႈၵၼ်လႆႈ မူႇဝႃႇတ ဢမ်ႇမိူၼ်ၵၼ် ၸိူဝ်းၼႆႉ ႁႂ်ႈၶဝ်ယူႇၼႂ်းၼႃႈတီႈၽႂ်မၼ်းသေ တူင်ႉၼိုင်တႄႉ တေလီၶႃႈဢေႃႈ။ ၵူၼ်းမိူင်းၵေႃႈ တေဢမ်ႇလႆႈတုၵ်ႉၶ။ ၶဝ်ပေႉ ၵၼ်လႆႈသေတႃႉၵေႃႈ ၶဝ်လႆႈလိၼ်ၵူၺ်း ၶဝ်ဢမ်ႇလႆႈၼမ်ႉၸႂ်ၵူၼ်းမိူင်း ဢမ်ႇလႆႈၵူၼ်း။ ဝၢၼ်ႈမိူင်းတႃႇတေၶိုၼ်ႈယႂ်ႇၵေႃႈ ဢမ်ႇမီး ယိုင်ႈၶႅၼ်းတူၵ်းတႅမ်ႇၵႂႃႇထႅင်ႈတိၵ်းတိၵ်းၵူၺ်းၶႃႈ”- ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ပၢင်တိုၵ်းၼႆႉ တင်းသွင်ၾၢႆႇ ပဵၼ်ၵၼ်ႁိုင် မွၵ်ႈ 1 ၸူဝ်ႈမူင်းၼႆႉသေ တီႈႁိမ်းၼၼ်ႉ မီးဝႆႉတပ်ႉသိုၵ်းမၢၼ်ႈ ပၵ်းတပ်ႉဝႆႉတီႈ ၶူဝ် ၼမ်ႉတဵင်း ႁိမ်းဝၢၼ်ႈမၢၵ်ႇလၢင်းဝႆႉ ပဵၼ်တပ်ႉၶမယ 515 လႄႈ ၶမယ 64 ၸိူဝ်းၼႆႉ။