မၢဝ်ႇၼုမ်ႇတႆး ၵူၼ်းဝဵင်းၼမ်ႉၶမ်း ၵေႃႉၼိုင်ႈ ၵႂႃႇသူင်ႇၸူႉႁၵ်ႉမၼ်းပွၵ်ႈႁိူၼ်းၶိုၼ်းတီႈထုင်ႉလွႆႁူဝ်သိူဝ်သေ ပွၵ်ႈႁိူၼ်း ႁၢႆၵႂႃႇၼႂ်းၵႄႈၼမ်ႉၶမ်း – ထုင်ႉလွႆႁူဝ်သိူဝ် ႁိုင် 15 ဝၼ်း ၸင်ႇထူပ်းႁၼ်တူဝ်ၶိုၼ်း ယၢမ်းလဵဝ် ႁွတ်ႈၽႅဝ်ၶိုၼ်းႁိူၼ်းယေး လီငၢမ်း လႆႈႁူႉဝႃႈၺႃးတီႉ ။

မိူဝ်ႈဝႃး ဝၼ်းတီႈ 9/4/2023 ယၢမ်းဝၢႆးဝၼ်း 2 မူင်း ၵူၼ်းပိုၼ်ႉတီႈ ထူပ်းႁၼ် ၸၢႆးမၢဝ်းလႅင်း ဢႃယု 21 ပီ ၼႂ်းတူင်ႈ ၼႃး ႁိမ်းမၢၼ်ႈၼွင် – မၢၼ်ႈႁူဝ်သၢႆး ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ဢၼ် ႁၢႆၵႂႃႇ ၼႂ်းၵႄႈၼမ်ႉၶမ်း – ထုင်ႉလွႆႁူဝ်သိူဝ် မိူဝ်ႈႁၢင်လိူၼ်မၢတ်ႊၶျ် ပူၼ်ႉမႃးၼႆႉ ဝႃႈၼႆ။

ၼၢင်းပိင်း ၵေႃႉပဵၼ်မႄႈ ၸၢႆးမၢဝ်းလႅင်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ယၢမ်းဝၢႆးဝၼ်း ပီႈၼွင်ႉႁဝ်းၶႃႈ ထူပ်း ႁၼ်မၼ်း ၸၢႆး ၼႂ်းတူင်ႈၼႃး ႁိမ်းမၢၼ်ႈၼွင် – ႁူဝ်သၢႆးၼၼ်ႉသေ ၵပ်းၾူၼ်းမႃးလႄႈ ၶႃႈႁဝ်း ၼႅတ်ႈဢွၼ်ၵၼ် ၵႂႃႇႁပ်ႉမႃးၶႃႈ။ ရူတ်ႉ ၶိူင်ႈမၼ်းၸၢႆးတႄႉ ဢမ်ႇလႆႈမႃးယဝ်ႉ။ လႆႈၾူၼ်း မႃးၶိုၼ်းၵူၺ်း။ ႁဝ်းၶႃႈ ထၢမ်မၼ်းၸၢႆးယူႇ ပဵၼ်ၽႂ် ၸုမ်းလႂ် ဢဝ်ၵႂႃႇ။ မၼ်း ၸၢႆး ဢမ်ႇယွမ်းလၢတ်ႈၼႄႁဝ်းၶႃႈ တေႃႇထိုင်ယၢမ်းလဵဝ်ၼႆႉ။ ၸွမ်းတူဝ်မၼ်းၸၢႆးတႄႉ ဢမ်ႇ ႁၼ်မီးႁွႆးပေႃႉထုပ်ႉသင်။ ၵူၺ်း ၵႃႈ တီႈၵွၵ်းႁူဝ်မၼ်းၸၢႆးတႄႉ ႁၼ်ပဵၼ်တုမ်ႇလႅင်လႅင်ဝႆႉ ပဵၼ်သင်ၶူပ်းတႄႉ ဢမ်ႇ ႁူႉ။ ၸူမ်းတႄႉၸူမ်းဝႃႈယဝ်ႉ လႆႈႁၼ်လုၵ်ႈ ၸၢႆးၶႃႈႁဝ်း ႁွတ်ႈထိုင်ၶိုၼ်းႁိူၼ်းလီငၢမ်း”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 25/3/2023 ယၢမ်းဝၢႆးဝၼ်း 2 မူင်းၶိုင်ႈ ၸၢႆးမၢဝ်းလႅင်း ဢႃယု 21 ပီ လုၵ်ႉတီႈႁိူၼ်း ၸူႉႁၵ်ႉမၼ်းၸၢႆး တီႈထုင်ႉလွႆႁူဝ်သိူဝ် ၼႂ်းၸႄႈမိူင်းၶၢင်(လႅၼ်လိၼ်တႆး-ၶၢင်) ၼၼ်ႉသေ ပွၵ်ႈၶိုၼ်းႁိူၼ်း တီႈဝဵင်းၼမ်ႉၶမ်း။ ႁၢႆၵႂႃႇၼႂ်းၵႄႈၼမ်ႉ ၶမ်း – ထုင်ႉလွႆႁူဝ်သိူဝ် ႁိုင် 15 ဝၼ်းယဝ်ႉ ၸင်ႇထူပ်းႁၼ်ၶိုၼ်း။ လႆႈႁူႉဝႃႈၺႃးတီႉၼႆသေတႃႉ ပဵၼ်ၽႂ်ၸုမ်းလႂ်တီႉၵႂႃႇပႆႇလႆႈႁူႉၸွမ်း။ ၵူၺ်းၵႃႈဢိင်ၼိူဝ်ပိူင်ပဵၼ်ၼႆႉသေ ၵူၼ်းပိုၼ်ႉတီႈတႄႉ ဢွၼ်ၵၼ်မႆႈၸႂ် လွင်ႈႁူမ်ႇလူမ်ႈ။

ၼႂ်းၸႄႈဝဵင်းၼမ်ႉၶမ်းၼႆႉ မီးဝႆႉ ၸုမ်းယိပ်းၵွင်ႈၵၢင်ႇ တူင်ႉၼိုင်ယူႇဝႆႉ မိူၼ်ၼင်ႇ သိုၵ်းမၢၼ်ႈ၊ သိုၵ်း TNLA, သိုၵ်း KIA လႄႈ သိုၵ်း SSPP ၸိူဝ်းၼႆႉ။ ၸုမ်းပျီႇတူႉၸိတ်ႉသမ်ႉ မိူၼ်ၼင်ႇ မဵဝ်ႉမ၊ ပၢၼ်းသေးလႄႈ တႃၵွၼ်ႈ ၸိူဝ်းၼႆႉ။

ၸၢႆးမၢဝ်းလႅင်း ဢႃယု 21 ပီၼႆႉ ပဵၼ်လုၵ်ႈၸၢႆး ၵေႃႉထူၼ်ႈ 3 ၶိင်းမွင်ႇၸူဝ်ႇလႄႈ ၼၢင်းပိင်း ယူႇမၢၼ်ႈၶမ်း ပွၵ်ႉ 1 ဝဵင်း ၼမ်ႉၶမ်း။

တၢင်းဝဵင်းၼမ်ႉၶမ်းၼႆႉ ပူၼ်ႉမႃးမွၵ်ႈ 10 ပီ ၵူၼ်းၼုမ်ႇၸုမ်းၼိုင်ႈ ၶီႇၵႃးလမ်းၼိုင်ႈဢၢၼ်းလူင်းလႃႈသဵဝ်ႈ- ဝဵင်းလိူဝ်ႇ ၊ ယၢမ်ႈႁၢႆ တင်းၵူၼ်းတင်းၵႃး တေႃႇထိုင်ယၢမ်းလဵဝ် ဢမ်ႇႁူႉၶၢဝ်ႇႁူႉငၢဝ်း ၽႂ်တီႉၵႂႃႇၵေႃႈဢမ်ႇႁူႉ။