ၾႆးမႆႈႁိူၼ်းၵူၼ်းမိူင်း 47 လင်တီႈ ဝၢၼ်ႈ 12 လၵ်း ဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ လူဝ်ႇတၢင်းၸွႆႈထႅမ်တႃႇယူႇသဝ်း။
မိူဝ်ႈဝၼ်းတီႈ 7/5/2023 ယၢမ်းၵၢင်ၶိုၼ်း 11 မူင်းၼၼ်ႉ ၾႆးၾိုၼ်းလၢမ်းမႆႈႁိူၼ်းယေး 47 လင်ဝၢၼ်ႈ 12 လၵ်း ဢိူင်ႇၼမ်ႉၽၵ်းၵႃ ၼႂ်းၸႄႈဝဵင်းၵူတ်ႉၶၢႆ ဢၼ်မီးၼိူဝ်သဵၼ်ႈတၢင်း ၼမ်ႉၽၵ်းၵႃ – ၼမ်ႉၶမ်း ။
လုင်းလႅင်ႇဢေး ႁူဝ်ပဝ်ႈၸုမ်းၸွႆႈတူင်ႇဝူင်းၵူၼ်း(လက်ဖက်ညွန့်လူမှုကူညီရေးအသင်း) လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ လုၵ်ႉတီႈၾႆးၽိုၼ်းသေလၢမ်းမႆႈၵႂႃႇႁိူၼ်း 47 လင်ဢေႃႈ။ ဢၼ်ၺႃးၾႆးမႆႈသေ ယၢပ်ႇၽိုတ်ႇယူႇယၢမ်းလဵဝ်ပဵၼ် 21 မုင်ႉႁေႃႁိူၼ်း ။ ႁူဝ်ၵူၼ်းမီးၵႃႈႁိုဝ်တႄႉတႄႉပႆႇႁူႉ ။ မိူဝ်ႈလဵဝ် လူဝ်ႇၶူဝ်းၼုင်ႈလႄႈ လူဝ်ႇတၢင်းၸွႆႈထႅမ် တႃႇတေ သၢင်ႈႁိူၼ်းပၼ်ၶဝ်ယူႇၶိုၼ်းၼၼ်ႉဢေႃႈ။လွင်ႈၵိၼ်လွင်ႈယႅမ်ႉတႄႉ မီးၵူၼ်းမႃးၸွႆႈဝႆႉယူႇၽွင်ႈ ” – ဝႃႈၼႆ။
ႁိူၼ်းၵူၼ်းဝၢၼ်ႈဢၼ်ထုၵ်ႇၾႆးမႆႈၸိူဝ်းၼႆႉ ၵမ်ႈၼမ်ပဵၼ်ႁိူၼ်းသိူဝ်ႇပႅၼ်ႈၵင်ႈပႅၼ်ႈ ၊ သိူဝ်ႇၽၢၵ်ႈၵင်ႈၽၢၵ်ႈ တင်းမူတ်းမႆႈၵႂႃႇ 47 လင်။ ၼႂ်းဝၢၼ်ႈၼႆႉ လင်ႁိူၼ်းမီး ဢမ်ႇယွမ်း 80 လင် မိူဝ်ႈလဵဝ် ၵူၼ်းထူပ်းၽေးၾႆးမႆႈ ႁူမ်ႈၵၼ်ယူႇဝႆႉ တီႈႁူင်းႁဵၼ်းဝၢၼ်ႈမႆလွမ်ႉ(မိုင်လွမ့်) ၸႄႈဝဵင်းၵူတ်ႉၶၢႆ ။
လုင်းလႅင်ႇဢေး ႁူဝ်ပဝ်ႈၸုမ်းၸွႆႈတူင်ႇဝူင်းၵူၼ်း(လက်ဖက်ညွန့်လူမှုကူညီရေးအသင်း) သိုပ်ႇလၢတ်ႈဝႃႈ – “ မႆႈတင်းဝၢၼ်ႈၼႆတႄႉၵေႃႈ ဢမ်ႇၸႂ်ႈၼင်ႇၵဝ်ႇၶႃႈ။ၼႂ်းဝၢၼ်ႈၼႆႉ မီးမွၵ်ႈ 80 ၸိူဝ်းၼႆႉဢေႃႈ။ မႆႈၵႂႃႇမွၵ်ႈ ၶိုင်ႈၼိုင်ႈၼႆႉၼၼ်ႉယဝ်ႉ။ၵမ်ႈၼမ် ပဵၼ်ၸၢဝ်းလီႇသူႇယူႇဝႆႉ။ၵွပ်ႈဢမ်ႇမီး တီႈယူႇလႄႈ မိူဝ်ႈလဵဝ် ၵႂႃႇယူႇဝႆႉတီႈ ႁူင်းႁဵၼ်းၼၼ်ႉဢေႃႈ။ၵွပ်ႈၼၼ် ၶႂ်ႈယွၼ်းတၢင်းၸွႆႈထႅမ် ပီႈၼွင်ႉ တီႈၸမ်ၵႆ ႁူမ်ႈၸွႆႈပၼ် တႃႇတေသၢင်ႈႁိူၼ်းပၼ်ၶဝ်ၶိုၼ်းဢေႃႈ ၵႃႈၼင်ႇပွင်ပဵၼ်လႆႈၼၼ်ႉၼႃႇၼေႃႈ” ဝႃႈၼႆ။
ပေႃးမီးၽူႈမီးၼမ်ႉၸႂ် ၶႂ်ႈၸွႆႈၵမ်ႉထႅမ်ၼႆၸိုင် ၵပ်းသိုပ်ႇတွင်ႈထၢမ်ႁူဝ်ယွႆႈ လႆႈတီႈ လုင်းလႅင်ႇဢေး(လုင်းဢေးလႅင်ႇ ႁူဝ်ပဝ်ႈၸုမ်းၸွႆႈတူင်ႇဝူင်းၵူၼ်း(လက်ဖက်ညွန့်လူမူ့ရေးကူရေးအသင်း) မၢႆၾူၼ်း 09 252 933 566 ။
လုင်းလႅင်ႇဢေး ႁူဝ်ပဝ်ႈၸုမ်းၸွႆႈတူင်ႇဝူင်းၵူၼ်းသင်ႇလၢတ်ႇဝႃႈ –“ ပေႃးပဵၼ်လႆႈတႄႉ ဝႆႉသတိဝီရိယၼၵ်းၼႃတႄႉလီဢေႃႈ ပေႃးထူပ်းၽေးၾႆးမႆႈယဝ်ႉၼႆ မၼ်းထူပ်းတင်းယၢပ်ႇၵူႈၵေႃႉၶႃႈယဝ်ႉ။ပေႃးမိူၼ်ၼၼ်မႃး ဢမ်ႇမီးၽႂ်မႃးၸွႆႈႁဝ်းလႆႈတေႉတေႉဝႃႈဝႃႈ။တႃႇတေႁႂ်ႈ ၸုမ်းၸွႆႈတူင်ႇဝူင်းၵူၼ်းမႃးၸွႆႈမႃးထႅမ်ၼႆၵေႃႈ ဢမ်ႇငၢႆႈငၢႆႈ ။ ၵႃႈလႆႈ လူႇၶၢမ်ႇ ၵူၼ်းမိူင်းႁေ ၸွႆႈၵၼ်ၶိုၼ်းၵူၺ်းၼၼ်ႉယဝ်ႉ” – ဝႃႈၼႆ။
မိူဝ်ႈဝၼ်းတီႈ 3/4/2023 ၼၼ်ႉ ၾႆးမႆႈႁိူၼ်းလင်ၼိုင်ႈ တီႈပွၵ်ႉ 4 ဝဵင်းၼမ်ႇၸၢင် ၸိုင်ႈတႆးပွတ်းၸၢၼ်း ၼၢင်းယိင်းၵေႃႉၼိုင်ႈ လူႉတၢႆၵိုၵ်းႁိူၼ်း။
ၵူႈပွၵ်ႈပူၼ်ႉမႃးၾႆးမႆႈႁိူၼ်းၼႆႉ ၵမ်ႈၼမ်ပဵၼ်ယွၼ်ႉ ၾႆးတဵၼ်း ၾႆးၽိုၼ်း ၵူၺ်းသေတႃႉ ယၢမ်းလဵဝ်ၼႂ်းၶၢဝ်းတၢင်း 2 ပီမႃးၼႆႉ ဢိင်ၼိူဝ်ၾႆးၾႃႉဢမ်ႇမႃးမၢၼ်ႇ၊ ႁႅင်းၾႆးၾႃႉဢမ်ႇမၢၼ်ႇလႄႈ ႁဵတ်းႁႂ်ႈၵူၼ်းမိူင်းထူပ်းၽေးၾႆးထပ်းၵၼ်မႃး ဢမ်ႇထၢတ်ႇ ၶႂ်ႈဝႃႈၵူႈဝဵင်းၼႂ်းၸိုင်ႈတႆး။