ၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶဝ်ႈပၢင်သဝ်းၵူၼ်းပၢႆႈၽေးသိုၵ်း ၼေႇဝုၼ်းၼီႇ ၸႄႈဝဵင်းၼမ်ႉၶမ်း ဢႅဝ်ႇႁႃတီႉၺွပ်း လုၵ်ႈဢွၼ်ႇၸၢႆးၼုမ်ႇၼႂ်းပၢင်သဝ်း၊ ပေႃးဢမ်ႇလႆႈလုၵ်ၸၢႆး သမ်ႉဢဝ်ၵေႃႉပဵၼ်ပေႃႈ ၵႂႃႇ၊ ပေႃးဢဝ်လုၵ်ႈၸၢႆးမႃးလႅၵ်ႈ ၸင်ႇပွႆႇပၼ်ပေႃႈၶိုၼ်းဝႃႈၼႆ။
ဝၼ်းတီႈ 20/03/2023 ယၢမ်းၵၢင်ၶမ်ႈ 7 မူင်း ၸုမ်းသိုၵ်းတဢၢင်း TNLA ၶဝ်ႈတီႉၺွပ်းၵူၼ်းၼႂ်းပၢင်သဝ်း ၵူၼ်းပၢႆႈၽေးသိုၵ်း ၼေႇဝုၼ်းၼီႇ ၸႄႈဝဵင်းၼမ်ႉၶမ်း တႃႇဢဝ်ၵႂႃႇႁဵတ်းသိုၵ်းမႂ်ႇ၊ လႆႈၵႂႃႇၵူၼ်းထဝ်ႈ 10 ပၢႆ ။ ပေႃႈမႄႈ ဢွၼ်ႈဝွၼ်း ႁႂ်ႈလုၵ်ႈလၢင်းလႆႈႁဵၼ်းလိၵ်ႈ ၊ လႆႈႁဵတ်းၵၢၼ်ၵွၼ်ႇၼႆၵေႃႈ ဢမ်ႇၽွမ်ႉ လႆႈၽႂ်ဢဝ်ၵႂႃႇၵေႃႉၼၼ်ႉ – ႁႂ်ႈဢဝ်လုၵ်ႈလၢင်းမႃးလႅၵ်ႈဢဝ်ၶိုၼ်း ဝႃႈၼႆ။
ၵူၼ်းပၢႆႈၽေးသိုၵ်းၼႂ်းပၢင်သဝ်းလၢတ်ႈဝႃႈ-“ ၶဝ်မႃးၵဵပ်းသိုၵ်း ၵူၼ်းဢၼ်ပႃးသဵၼ်ႈမၢႆ မၼ်းဝႆႉ ၶဝ်ဝႃႈၼႆၶႃႈဢေႃႈ။ မိူဝ်ႈၶဝ်မႃး ၵဵပ်းၼၼ်ႉ မႅၼ်ႈမိူဝ်ႈလုၵ်ႈဢွၼ်ႇၼႆႉ ၵႂႃႇႁဵတ်းၵၢၼ်။လုၵ်ႈဢွၼ်ႇလူဝ်ႇႁဵတ်းၵၢၼ် လူဝ်ႇၶိုၼ်ႈၵျွင်းၼႆၵေႃႈ လၢတ်ႈဢမ်ႇလႆႈ။ၶဝ်ၵေႃႈ တီႉဢဝ်ၵူၼ်းထဝ်ႈၵူၼ်းၵႄႇၵႂႃႇၶႃႈဢေႃႈ။ ပေႃးဢဝ်ၵူၼ်းၼုမ်ႇၵႂႃႇလႅၵ်ႈဢဝ် ၸင်ႇပွႆႇပၼ်ၵူၼ်းထဝ်ႈၶိုၼ်းဢေႃႈ ”- ဝႃႈၼႆ။
ၵူၼ်းပၢႆႈၽေးသိုၵ်း 13 ၵေႃႉဢၼ်ၺႃးတီႉၺွပ်းၵႂႃႇ မိူဝ်ႈဝၼ်းတီႈ 20/3/2023 ၼၼ်ႉပဵၼ် ၼၢင်းယိင်း 3 ၵေႃႉ လႄႈ ၵူၼ်းၸၢႆး 10 ၵေႃႉ ။ ပဵၼ်ၵူၼ်းသႅၼ်းထဝ်ႈ ဢႃယု 50 ပၢႆ လႄႈ ဢႃယု 80 ပၢႆၸိူဝ်းၼႆႉ။ မိူဝ်ႈလႂ်မီး ၵူၼ်းၼုမ်ႇ ၵႂႃႇပုတ်ႈတႅၼ်း ၸင်ႇပွႆႇပၼ်ၶိုၼ်း – ဝႃႈၼႆ။
ဢိင်ၼိူဝ်လွင်ႈၼႆႉသေ ၼၢင်းယိင်းၵူၼ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- “ ပေႃးၽႂ်မီး လုၵ်ႈလၢၼ် ပဵၼ်ၵူၼ်းၼုမ်ႇၵူၼ်းၵမ်ၵေႃႈ ဢွၼ်ၵၼ်ၵႂႃႇပုတ်ႈတႅၼ်းပၼ် ၵူၼ်းထဝ်ႈၶဝ် လွတ်ႈဢွၵ်ႇမႃးၶိုၼ်းဢေႃႈ။ပေႃးဢမ်ႇမီးၽႂ် ၵႂႃႇပုတ်ႈတႅၼ်းလႃးလႃးၵေႃႈ ၵႃႈလႆႈယူႇႁဵတ်းၼၼ်ယဝ်ႉ။ ”- ဝႃႈၼႆ။
ၵူၼ်းၼုမ်ႇၸိူဝ်းၵႂႃႇ ပုတ်ႈတႅၼ်းပၼ်ၶိုၼ်းၼၼ်ႉ မီး 10 ၵေႃႉ ။ ပဵၼ်ၵူၼ်းၼုမ်ႇသႅၼ်းဢႃယု 18 ပီ လႄႈ 20 ပီ ၸိူဝ်းၼႆႉ။
ၼၢင်းယိင်းၵူၼ်းပၢႆႈၽေးသိုၵ်းၵေႃႉၼိုင်ႈလၢတ်ႈဝႃႈ – “ မိူဝ်ႈသိုၵ်းၶဝ် မႃးၺွပ်းၵူၼ်းထဝ်ႈၵူၼ်းၵႄႇႁဝ်းၸိူဝ်းၼႆႉ ၶႃႈတူၵ်းၸႂ်ပေႇၸႂ် ပေႃးသၼ်ႇယဝ်ႉ။လွင်ႈၸိူင်ႉၼႆ ၸူဝ်ႈႁဝ်းပၢႆႈၽေးမႃးၶၢဝ်းတၢင်း 10 ပီပၢႆၼႆႉ တိုၵ်ႉၺႃးပွၵ်ႈၼႆႉယဝ်ႉ” – ဝႃႈၼႆ။
ၵဵဝ်ႇၵပ်းလွင်ႈၵူၼ်းပၢႆႈၽေးၺႃးတီႉၺွပ်းၼႆႉသေ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး ၸဝ်ႈႁၢၼ် တႃႉဢၢႆႈၵျေႃႇ ၽူႈၶၢၼ်ပၢၵ်ႇသိုၵ်းတဢၢင်း လၢႆပွၵ်ႈယဝ်ႉသေတႃႉ ပႆႇႁပ်ႉတွပ်ႇလၢတ်ႈသင်။
ပၢင်သဝ်းၵူၼ်းပၢႆႈၽေးသိုၵ်း ၼေႇဝုၼ်းၼီႇၼႆႉ ပဵၼ်ပၢင်သဝ်းၵူၼ်းပၢႆႈၽေးသိုၵ်း ၶၢင်၊ မၢၼ်ႈ၊တႆး ယူႇႁူမ်ႈၵၼ်။ ပၢႆႈၽေးသိုၵ်း ပၢင်တိုၵ်းၼႂ်းၵႄႈသိုၵ်းၶၢင်လႄႈသိုၵ်းမၢၼ်ႈ ႁိုင်မႃးၶၢဝ်းတၢင်း 10 ပီပၢႆယဝ်ႉၵေႃႈပႆႇၸၢင်ႈပွၵ်ႈၶိုၼ်းႁိူၼ်းယေး။
