မိူဝ်ႈၼႆႉ ဝၼ်းတီႈ 30/3/2023 ယၢမ်းၵၢင်ၼႂ် 10 မူင်းပၢႆ ထိုင် 12 မူင်းၵၢင်ဝၼ်း သိုၵ်းတဢၢင်း TNLA ထႅမ်ႁႅင်းသိုၵ်း တူင်ႉၼိုင်ၵႂႃႇမႃး ၸွမ်းသၢပ်ႇဝဵင်း လႄႈၵူၼ်းမိူင်းဢမ်ႇႁတ်းၵႂႃႇမႃးၸွမ်းႁိမ်းမၢၼ်ႈၶမ်း ၼိူဝ်သဵၼ်ႈတၢင်းလူင် ၼမ်ႉၶမ်း – မူႇၸေႊ ၼႂ်းၸႄႈဝဵင်းၼမ်ႉၶမ်း ၸိူဝ်းၼႆႉ။

ၵူၼ်းဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းတဢၢင်းသမ်ႉ မႃးၼွၼ်းယူႇထင် ၸွမ်းႁိူၼ်းယေး ၵူၼ်းဝၢၼ်ႈ (တႆး) တၢင်းၾၢႆႇဢွၵ်ႇဝဵင်း ၼႂ်းၵႄႈၼမ်ႉၶမ်း – မူႇၸေႊ တၢင်းဝၢၼ်ႈၸေႊႁႆး၊ ၵုင်းသႃႇ၊ ဝၢၼ်ႈၵၢင်ႈ၊ ၵွင်းဝဵင်း၊ ၼွင်ၶၢင် ၸိူဝ်းၼႆႉ။ မီးမႃးၶၢဝ်းတၢင်း 20 ဝၼ်းပၢႆယဝ်ႉ။ မိူဝ်ႈၼႆႉ ၶဝ်တူင်ႉၼိုင်ၵႂႃႇတၢင်းဝၢၼ်ႈၼမ်ႉမ ၾၢႆႇတူၵ်းဝဵင်း ဢဵၼ်ႁႅင်းပၢၵ်ႇပၢႆ လႄႈ တီႈၵဵၵ်ႉၵူတ်ႇထတ်း တၢင်းၶဝ်ႈဢွၵ်ႇဝဵင်း တီႈမၢၼ်ႈၶမ်း မုၵ်ႉဢူးၼၼ်ႉ လႆႈထုၵ်ႇပိၵ်ႉဢိုတ်း ႁၢမ်ႈၵူၼ်းမိူင်းၵႂႃႇမႃးပႅတ်ႈ ၵမ်ႉၼိုင်ႈ”- ဝႃႈၼႆ။

ထိုင်မႃး ယၢမ်းၵၢင်ဝၼ်းမွၵ်ႈ 12 မူင်းၼႆႉ သိုၵ်းတဢၢင်း ၸင်ႇထွႆထွၼ် ဢွၵ်ႇၼႂ်းပိုၼ်ႉတီႈ ၸိူဝ်းၼၼ်ႉၶိုၼ်း ၵမ်ႈၽွင်ႈလႄႈ တီႈၵဵၵ်ႉၵူတ်ႇထတ်းတၢင်းၶဝ်ႈဢွၵ်ႇဝဵင်း (ၽၵ်းတူဝဵင်း) ၼၼ်ႉ ၸင်ႇတေပိုတ်ႇပၼ် ၵူၼ်းမိူင်းၶဝ်ႈဢွၵ်ႇၵႂႃႇမႃးၶိုၼ်း။ တီႈလၢၼ်ႇၵူတ်ႇထတ်းၼၼ်ႉ တေမီးသိုၵ်းမၢၼ်ႈ၊ ပလိၵ်ႈလႄႈ ပျီႇတူႉၸိတ်ႉ ႁူမ်ႈၵၼ်ပႂ်ႉၵူတ်ႇထတ်း ဝႆႉ ဝႃႈ ၼႆ။  

“ႁဝ်းၶႃႈ ၵူၼ်းမိူင်းမႆႈၸႂ် ၵူဝ်ၶဝ်ပဵၼ်ပၢင်တိုၵ်းၵၼ်ၶႃႈဢေႃႈ။ လွင်ႈသိုၵ်းတဢၢင်းမႃးမူၵ်းယူႇ ၼႂ်းဝၢၼ်ႈၼႂ်းသူၼ်ၸိူင်ႉၼႆ ၵူၼ်းဝၢၼ်ႈၵူၼ်းမိူင်းၵေႃႈ ယူႇယၢပ်ႇၵိၼ်းၸႂ် ဢမ်ႇထၢင်ႇႁၢင်ႈယူႇလွတ်ႈလႅဝ်း ႁဵတ်းႁႂ်ႈႁဝ်းၶႃႈ ၵူၼ်းမိူင်း ဢမ်ႇမီးလွင်ႈႁူမ်ႇ လူမ်ႈ။ လွင်ႈၶဝ်မႃးယူႇၵိၼ်ၼႂ်းဝၢၼ်ႈ ၸွမ်းႁူင်းႁဵၼ်း ၸိူဝ်းၼႆႉ မၼ်းဢမ်ႇသၢင်ႇထုၵ်ႇၶႃႈ ရူတ်ႉၵႃးၵႂႃႇမႃး ၼႂ်းၵႄႈၼမ်ႉၶမ်း – မူႇၸေႊ ၸိူဝ်းၼႆႉၵေႃႈ ၶဝ်ႁေႉၵိုတ်းၵူတ်ႇထတ်း ယွၼ်းငိုၼ်း ၵေႃႈမီးမႃး”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈ ၼႄၼင်ႇၼႆ။

ဢိင်ၼိူဝ် လွင်ႈသိုၵ်းတဢၢင်း တူင်ႉၼိုင်ၵႂႃႇမႃး ၸွမ်းသဵၼ်ႈတၢင်းလူင် ၼမ်ႉၶမ်း – မူႇၸေႊၼႆႉ မီးမႃးၶၢဝ်းတၢင်း ၽၢၵ်ႇပီယဝ်ႉ ။ ဢၼ်မႃးမူၵ်းယူႇၸွမ်းႁိူၼ်းယေး ၵူၼ်းဝၢၼ်ႈလႄႈ ၸွမ်းႁူင်းႁဵၼ်းၼွင်ၶၢင် ၸိူဝ်းၼႆႉသမ်ႉ တိုၵ်ႉမီးမႃး ၶၢဝ်းတၢင်းၼႂ်း လိူၼ် မၢတ်ႊၶျ်ၼႆႉၵူၺ်း ဝႃႈၼႆ။

ယၢမ်းလဵဝ် သိုၵ်းတဢၢင်း TNLA ၼႆႉ တိုၵ်ႉတူင်ႉၼိုင်ယူႇဝႆႉ တၢင်းဝၢၼ်ႈလွႆလိၼ်ၵၢင်၊ ႁူဝ်ပုင်ႇ၊ ၼမ်ႉမ ၸိူဝ်းၼႆႉယူႇ ပႆႇထွႆ ဢဵၼ်ႁႅင်းတေမီးမွၵ်ႈ 100 ၼႆႉ ဝႃႈၼႆ။