ပၢင်ၾိုၵ်းၽွၼ်ႉမေႃသွၼ် လိၵ်ႈတႆး တီႈဝဵင်းၵျွၵ်ႉမႄးၼႆႉ ဢမ်ႇလႆႈၸတ်းႁဵတ်းမႃး မီးၶၢဝ်းတၢင်း 3 ပီယဝ်ႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်းလႄႈ ပီၼႆႉ တေၸတ်းၶိုၼ်း။

ပၢင်ၾိုၵ်းၽွၼ်းၼႆႉ တႄႇၸတ်းႁဵတ်း ၼႂ်းဝၼ်းတီႈ 30/3/2023 တေႃႇထိုင် 1/4/2023 တႃႇၶၢဝ်းတၢင်း 3 ဝၼ်း ယူႇတီႈ ၵေႃလိၵ်ႈလၢႆးလႄႈ ၾိင်ႈငႄႈတႆး တေဢွၼ်ႁူဝ်ၸတ်းႁဵတ်း တီႈႁူင်းႁေႃ ၵေႃလိၵ်ႈလၢႆး ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ တႃႇၾိုၵ်းလိူမ်ႉယုၵ်ႉမုၼ်းၼမ်ႉ ၵတ်ႉလႄႈ ႁႂ်ႈပဵၼ်တီႈမႃးႁူပ်ႉထူပ်းပၼ်ႁႅင်းၸႂ်ၵၼ် တီႈလႆႈၶၢတ်ႇယၢၼ်ၵၼ်ၵႂႃႇၶၢဝ်းတၢင်းႁိုင် 3 ပီၼႆႉ ဝႃႈၼႆ။

ၸၢႆးလႅင်းႁၢၼ် ႁူဝ်ပဝ်ႈ ၵေႃလိၵ်ႈလၢႆး ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ဢမ်ႇလႆႈၸတ်းႁဵတ်းမႃး ၸဵမ်မိူဝ်ႈပီ 2020 ပုၼ်ႉယဝ်ႉ။ ဢၼ်ႁဝ်းၶႃႈ ၸတ်းပၢင်ၾိုၵ်းၽွၼ်ႉၶိုၼ်းၼႆႉ ၶႂ်ႈႁူႉဝႃႈ ၼႂ်းဝဵင်းႁဝ်းၼႆႉ တေမီးဢဵၼ်ႁႅင်းမေႃသွၼ်ၵႃႈႁိုဝ် ယဝ်ႉၵေႃႈ မွၵ်ႇႁွင်ႉမေႃသွၼ် ႁဝ်းၶႃႈ မႃးထူပ်းၵၼ် ပၼ်ႁႅင်းၸႂ်ၵၼ် တီႈဢၼ်မေႃသွၼ်ႁဝ်းၶႃႈ ႁၢင်ႇၵႆၵၼ် ဢမ်ႇလႆႈၶဝ်ႈဢွၵ်ႇၵၼ်ၵေႃႈႁိုင်ယဝ်ႉလႄႈ ပၢင်သွၼ်ၼႆႉ တေၸတ်းတႃႇၶၢဝ်းတၢင်း 3 ဝၼ်း။ ပိူင်လူင်မၼ်း ဢမ်ႇၶႂ်ႈႁႂ်ႈၾိင်ႈဢၼ်ႁဝ်းၶႃႈ ၵႆႉၸတ်းႁဵတ်းပၢင်ၾိုၵ်းၽွၼ်ႉမႃး ပၢၼ်သိုပ်ႇပၢၼ်ၼႆႉ ဢမ်ႇၶႂ်ႈႁႂ်ႈမၼ်းႁၢႆ”- ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ ၵေႃလိၵ်ႈလၢႆး ဝဵင်းၵျွၵ်ႉမႄး ဢွၵ်ႇဝႆႉတႄႉ ပၢင်ၾိုၵ်းၽွၼ်ႉမေႃသွၼ်လိၵ်ႈတႆးၼႆႉ တေၸတ်းႁဵတ်းတႃႇ 3 ဝၼ်း။ တႄႇဢဝ်ၶၢဝ်းယၢမ်းၵၢင်ၼႂ် 9 မူင်း ထိုင် 4 မူင်းဝၢႆးဝၼ်း။ မေႃသွၼ်ၵေႃႉလႂ် ၶႂ်ႈမႃးၶိုၼ်ႈႁွတ်ႈလဵပ်ႈ ႁဵၼ်း ၼႂ်းပၢင်ၾိုၵ်းၽွၼ်းၼႆႉၸိုင် ႁႂ်ႈပၼ်သဵၼ်ႈၸိုဝ်ႈ ဝၼ်းတီႈ 29/3/2023 မိူဝ်ႈၼႆႉ ပဵၼ်ဝၼ်းလိုၼ်းသုတ်း ဝႃႈၼႆ။

“ၼႂ်းပၢင်သွၼ်ၼႆႉ တေၶိုၼ်းၽွၼ်ႉပၼ် လိၵ်ႈတႆးသေဢမ်ႇၵႃး တေပၼ်ပႃး တၢင်းႁူႉၼမ်တၢင်းႁၼ်ၵႂၢင်ႈ။ လွင်ႈၵမ်ႉထႅမ်တႄႉ ပႆႇမီးၸုမ်းလႂ် လိူဝ်သေ ၵေႃလိၵ်ႈလၢႆးၵူၺ်း ပေႃးႁဵတ်းပၢင်သွၼ်ယဝ်ႉတႄႉ ၶႄးတေမီးၸဝ်ႈတႃႇၼ ၵမ်ႉထႅမ်ၵေႃႉဢိတ်းၵေႃႉဢွတ်းၵၼ်ၶဝ်ႈမႃးယူႇၶႃႈယူဝ်ႉ”- လုင်းၸၢႆးလႅင်းႁၢၼ် သိုပ်ႇလၢတ်ႈၼႄၼင်ႇၼႆ။

မေႃသွၼ် ဢၼ်တေမႃးၾိုၵ်းၽွၼ်ႉပၼ် တီႈႁူင်းႁေႃၵေႃလိၵ်ႈလၢႆးၼႆႉ တေပဵၼ် မေႃသွၼ် လုင်းၸၢႆးဢူးၶမ်း၊ မေႃသွၼ် ၼၢင်းမူဝ်ၼူၼ်း လႄႈ မေႃသွၼ် ၼၢင်းၶမ်းလူႇ ၸိူဝ်းၼႆႉ။

ပူၼ်ႉမႃး မိူဝ်ႈဝၼ်းတီႈ 26-31/3/2023 ၼႆႉ ၸုမ်းၵူၼ်းၼုမ်ႇတႆး တၢင်းထုင်ႉလိၼ်ပဵင်း ၸႄႈတွၼ်ႈတွင်ႁူႇ (တွင်ႇငူႇ) ၼႂ်းတိူင်းပႃႇၵိူဝ်ၼၼ်ႉ ၸတ်းႁဵတ်း ပၢင်ၾိုၵ်းၽွၼ်ႉ မေႃသွၼ်လိၵ်ႈလၢႆးတႆးမႃး တႃႇပူင်သွၼ်ၼႂ်းႁူင်းႁဵၼ်းလူင်ပွင်ၸိုင်ႈလႄႈ ပၢင်သွၼ်လိၵ်ႈလၢႆးတႆး ၶၢဝ်းမႆႈ ၸဵမ်ၸိူဝ်းၼႆႉ။