ႁႅင်းၵၢၼ်ၼုမ်ႇၸၢႆးၵေႃႉၼိုင်ႈ ၸူမ်ၼမ်ႉလူႉတၢႆ တီႈဝဵင်းမူႇၸႄႊ လႅၼ်လိၼ် တႆး-ၶႄႇ ။

မိူဝ်ႈဝၼ်းတီႈ 24/3/2023 ၵၢင်ဝၼ်း12 မူင်းၼၼ်ႉ ႁႅင်းၵၢၼ်ၼုမ်ႇၸၢႆးၵေႃႉၼိုင်ႈ ၸူမ်ၼမ်ႉလူႉတၢႆ တီႈၵႄးၼမ်ႉမၢဝ်း ႁိမ်းဝၢၼ်ႈႁူဝ်သွင် ၸႄႈဝဵင်းမူႇၸေႊ လႅၼ်လိၼ် တႆး-ၶႄႇ။

ၸုမ်းၸွႆႈတူင်ႇဝူင်းၵူၼ်းမူႇၸေႊ (နှလုံးလှ လူမှုကူညီရေး) လၢတ်ႈတီႈၽူႈတွႆႇႁွၵ်ႈဝႃႈ- “ ၸႂ်ႈယဝ်ႉ ဢၼ်ၸူမ်တႄႉ ၸူမ်ၵႂႃႇမိူဝ်းဝၼ်းထိ 24 ၼၼ်ႉဢေႃႈ ၸင်ႇမႃးႁၼ်တူဝ်တၢႆမၼ်းမိူဝ်ႈဝၼ်းတီႈ 25 ၵၢင်ၼႂ်ၼႆႉ။ၶဝ်ၵႂႃႇလဵၼ်ႈၼမ်ႉၸွမ်းၵၼ်ၼၼ်ႉၼႃႇ ၵူၼ်းၼုမ်ႇၶဝ်။ၵႂႃႇမွၵ်ႈ 4-5 ၵေႃႉၼႆႉ။ၽိူဝ်ႇဝႃႈ ၸူမ်ၼမ်ႉၵေႃႉၼိုင်ႈယဝ်ႉၼႆၵေႃႈ ၶဝ်ဢွၼ်ၵၼ်ႁႃၶိုၼ်းယူႇ။သမ်ႉၵူဝ်ႁႅင်းၼမ်ႉၸႅဝ်ႈၵေႃႈပိူင်ၼိုင်ႈလႄႈ ဢမ်ႇႁၼ်။ၸင်ႇထူဝ်းမႃးလၢတ်ႈၸုမ်းႁဝ်းၶႃႈၵႂႃႇၸွႆႈႁႃပၼ်ဢေႃႈ။ႁဝ်းၵႂႃႇႁႃတင်းႁၢင်ႈၵေႃႈ ဢမ်ႇႁၼ် ထိုင်မိူင်းလႅင်းမႃးထႅင်ႈဝၼ်းၸင်ႇႁၼ်ၼၼ်ႉၶႃႈၼႃႇ တိုၵ်ႉပဵၼ်ၵူၼ်းၼုမ်ႇၵွႆးဢေႃႈၼၼ်ႉ လုၵ်ႉတၢင်ႇတီႈ မႃးႁႃႁဵတ်းၵၢၼ်တၢင်းၼႆႉဝႆႉၼႆၼေႈ” – ဝႃႈၼႆ။

ၵေႃႉဢၼ်လူႉတၢႆၵႂႃႇၼႆႉ ၸိုဝ်ႈ ၸၢႆးဝၼ်းၼထုၼ်း ဢႃယု 18 ပီ တီႈယူႇ ဝၢၼ်ႈပၢၼ်းယႂႃႇ ဝဵင်းပလႄး ၼႂ်းတိူင်းၸႄႈၵႅင်း။မိူဝ်ႈလဵဝ် ၸုမ်းၸွႆႈတူင်ႇဝူင်းၵူၼ်း ပွင်ႇထိုင်ၵူၼ်းႁူမ်ႈႁိူၼ်းမၼ်းသေ ပူၼ်ႉၶၢပ်ႈတူဝ် မိူဝ်ႈၼႆႉဝၼ်းတီႈ 26/3/2023 ၼႆယဝ်ႉ။

ၸုမ်းၸွႆႈတူင်ႇဝူင်းၵူၼ်းမူႇၸေႊသိုပ်ႇလၢတ်ႈဝႃႈ – “ ႁႂ်ႈၵႂႃႇႁၢမ်ႈဝႃႈ ယႃႇပေမႃးလုၺ်းၼမ်ႉလဵၼ်ႈၼမ်ႉတီႈၼႆႈၼႆၵေႃႈ ဢမ်ႇၸၢင်ႈႁၢမ်ႈၽႂ်လႆႈတင်းသဵင်ႈ ။ ၵူဝ်ဢမ်ႇႁူႉၵေႃႈ လိၵ်ႈၵေႃႈ တႅမ်ႈသေ ႁၢမ်ႈဝႆႉယူႇတီႈၾင်ႇၼမ်ႉၼၼ်ႉယူႇလူးဝႃႈ ၼမ်ႉတီႈၼႆႈၼႆႉ မီးၽေးၼမ်ၼႆ ၵူၺ်းၼႃႇ ၽႂ်ၵေႃႈ ဢမ်ႇၸွမ်း။ပေႃးထိုင်မႃး ၶိင်ႇၼႆႉ ၶႅၼ်းၼႃႇယဝ်ႉၼႆႉ သၢင်းၵျၢၼ်ႇၵေႃႈ တေထိုင်ယဝ်ႉ ၵူၼ်းမႃးလဵၼ်ႈၶႅၼ်းတေၼမ်ယဝ်ႉ” – ဝႃႈၼႆ။

တႃႈၼမ်ႉတီႈႁႅင်းၵၢၼ်ၼုမ်ႇၸၢႆးၸူမ်ၼမ်ႉလူႉတၢႆၵႂႃႇၼႆႉ ၼိုင်ႈပီလႂ် မီးၵူၼ်းမႃးလဵၼ်ႈၼမ်ႉၸူမ်လူႉတၢႆ ဢမ်ႇယွမ်း 5 ၵေႃႉၼႆယဝ်ႉ။

မိူဝ်ႈဝၼ်းတီႈ 6/2/2023 ၼၼ်ႉၵေႃႈ ၵူၼ်းၼုမ်ႇၵေႃႉၼိုင်ႈ ၸူမ်ၼမ့်မၢဝ်းတၢႆ တီႈဝဵင်းမူႇၸေႊ ဢၼ်ယၢၼ်ၵၼ်တၢင်း မင်ႇၵလႃႇမူႇၸႄႈ မွၵ်ႈၼိုင်ႈလၵ်း။