ၼႂ်းၸႄႈဝဵင်းၵူတ်ႉၶၢႆၼႆႉ လွင်ႈတႅပ်းၽဵဝ်ႈတူၼ်ႈမႆႉတူၼ်ႈတွၵ်ႇ  ၼမ်လိူဝ်မႃးၵူႈပီ ပႃႇမႆႉၸမ်မူၺ်ႉၵဵင်ႈဝၢႆးႁၢႆ ယွၼ်ႉၵၢၼ်ၽဝ်ထၢၼ်ႇၼမ်မႃးၵူႈမိုဝ်ႉၵူႈဝၼ်း။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ထိူၼ်ႇၸွမ်းႁိမ်းႁွမ်း ၵူတ်ႉၶၢႆ လႄႈ ၼမ်ႉၽၵ်းၵႃ ၸိူဝ်းၼႆႉ ပိူၼ်ႈဢွၼ်ၵၼ် တႅပ်းမႆႉ ၽဵဝ်ႈပႃႇၼမ်ၼႃႇ ။လွင်ႈၽဝ်ထၢၼ်ႇၵေႃႈ ၼမ်မႃးလိူဝ်ၵူႈပီ ။ၵမ်ႈၽွင်ႈၵေႃႈ သိုဝ်ႉဢွင်ႈတီႈ ဢၼ်မီး တူၼ်ႈမႆႉၼမ်ၼမ်သေ ႁဵတ်းၵၢၼ်ၽဝ်ထၢၼ်ႇၶၢႆ။ပေႃးတူၺ်း တူၼ်ႈမႆႉၵေႃႈ  ဢမ်ႇၶႂ်ႈၵိုတ်းယဝ်ႉ။ယွၼ်ႉၼၼ်လႄႈ မႆႈၵေႃႈမႆႈႁႅင်းၼႃႇယဝ်ႉ ”- ဝႃႈၼႆ။

ဢွင်ႈတီႈၽဝ်ထၢၼ်ႇ ၼႂ်းပႃႇထိူၼ်ႇ ႁိမ်းဝဵင်းၵူတ်ႉၶၢႆလႄႈ ၼမ်ႉၽၵ်းၵႃ ၼမ်မႃးလႄႈ ၾိင်ႈၾႃႉရႃႇသီႇလႅၵ်ႈလၢႆႈသေ လိူတ်ႇမႆႈႁၢဝ်ႈႁႅင်း ၼမ်ႉႁူၺ်ႈၼမ်ႉႁွင်ႈ လႄႈ ၼမ်ႉမေႃႇၸိူဝ်းၼႆႉ ႁႅင်ႈပႅတ်ႈတင်းၼမ်- ၵူၼ်းၵူတ်ႉၶၢႆ ၶၢင်းပွင်ႉၼင်ႇၼႆ။

ဢိင်ၼိူဝ်လွင်ႈၼႆႉသေ ၼၢင်းယိင်းၵူၼ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- “  ၶၢဝ်းမႆႈပီၼႆႉ ယွၼ်ႉပႃႇမႆႉ မူၺ်ႉဝၢႆးၼမ်လႄႈ ၵူၼ်းဝၢၼ်ႈမၢင်ဝၢၼ်ႈ ဢမ်ႇမီးၼမ်ႉတႃႇၸႂ်ႉလီလီ ၵွပ်ႈၼမ်ႉႁႅင်ႈ။ပေႃးသိုပ်ႇ တႅပ်းတူၼ်ႈမႆႉၼမ်ၵႂႃႇႁဵတ်းၼႆတိၵ်းတိၵ်းတႄႉ တုမ်ႉတိူဝ်ႉၾိင်ႈသၽႃႇဝဢေႃႈ။ယဝ်ႉၵေႃႈ ပေႃးၶၢဝ်းမႆႈၵေႃႈ တေလိူတ်ႇမႆႈမႃးလိူဝ်ၵဝ်ႇႁေ ပေႃးထိုင်ၶၢဝ်းၵတ်းၵေႃႈ တေၵတ်းႁႅင်းလိူဝ်ၵဝ်ႇ ” – ဝႃႈၼႆ။

ၼႂ်းပီ 2023 ၼႆႉ ႁိမ်းႁွမ်း မိူင်းယု ၊ ၼမ်ႉၽၵ်းၵႃ ဢၼ်ၵႆၵၼ်တင်း ဝဵင်းၵူတ်ႉၶၢႆ 8 လၵ်း ၼၼ်ႉ ဢွင်ႈတီႈၶွမ်ႊပၼီႊၶုတ်းၶမ်း မီးမႃးၼမ်လႄႈ ၵႄးၼမ်ႉမၢဝ်းႁႅင်ႈမႃးသေဢမ်ႇၵႃး ႁဵတ်းႁႂ်ႈၼမ်ႉၶုၼ်ႇၼမ်ႉဢူၼ်။ ၵူၼ်းဝၢၼ်ႈၸိူဝ်းပိုင်ႈၵႄးၼမ်ႉၼႆႉ မီးလၢႆလၢႆဝၢၼ်ႈ မိူၼ်ၼင်ႇ  ဝၢၼ်ႈလိၼ်လႅင် ၊ ဝၢၼ်ႈႁူဝ်ၶူဝ် ၊ ဢိူင်ႇမိူင်းယု ၊ ပၢင်လေႃႉ ၊ မၢၼ်ႈတူင်ႈ ၊ ဝၢၼ်ႈႁူဝ်ၼႃး ၸဵမ်ၸိူဝ်းၼႆႉ။

ၵူၼ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ- “ မၼ်းမီးလွင်ႈတုမ်ႉတိူဝ်ႉ ၾိင်ႈသၽႃႇဝၼမ်လႄႈ  တႃႇတေမီးလွင်ႈႁၢမ်ႈလွင်ႉႁေႉၶုတ်းၶမ်းၸိူဝ်းၼႆႉ သိုၵ်းမၢၼ်ႈယိုတ်းမိူင်းလႄႈ ၸုမ်းသိုၵ်းဢၼ်ယူႇတႂ်ႈꧠဝ် မိူၼ်ၼင်ႇ ပျီႇတုၸိတ်ႉၶဝ်ၸိူဝ်းၼၼ်ႉၵေႃႈ ဢမ်ႇႁၼ်တူင်ႉၼိုင်ႈႁေႉၵင်ႈပၼ်သင်” – ဝႃႈၼႆ။

တီႈဝဵင်းၵူတ်ႉၶၢႆမီး 16 ပွၵ်ႉ 68 ဢိူင်ႇ 463 ဝၢၼ်ႈ။ ၵူၼ်းမိူင်းဢၼ်ယူႇတၢင်းဝၢၼ်ႈမီး 140000 ပၢႆ လႄႈ ႁူဝ်ၼပ်ႉၵူၼ်းၼႂ်းဝဵင်း မီး 40000 ပၢႆ။ မီးၵူႈၸၢဝ်းၶိူဝ်းယူႇႁူမ်ႈၵၼ်။ ပိူင်လူင်ႁဵတ်းၵိၼ်ၵၢၼ်ၽုၵ်ႇသွမ်ႈသူၼ်၊ ႁႆႈ၊ၼႃး ၊ ၵၢၼ်လဵင်ႉလူတူဝ်သတ်း။