ၵူၼ်းဝၢၼ်ႈ ၼႂ်းဢိူင်ႇၼႃးၸွၵ်ႇ ထုင်ႉၼမ်ႉပွင်ႈ ၸႄႈဝဵင်းလႃႈသဵဝ်ႈ ၵဵပ်းဢဝ်မၢၵ်ႇလူင် ၶၢင်ႈတၢင်း ဢဝ်တၢင်ႇထူဝ်ႈ ၵႂႃႇၼႂ်းႁႆႈ လဵပ်ႈႁဵၼ်းတႂ်ႈတႂ်ႈၼိူဝ်ၼိူဝ် လႄႈ တႅၵ်ႈတိူဝ်ႉ တၢႆ 2 ၵေႃႉ မၢတ်ႇၸဵပ်းလိူဝ်ႁႅင်း 2 ၵေႃႉ။
မိူဝ်ႈၼႆႉ ဝၼ်းတီႈ 23/3/2023 ၵၢင်ၼႂ် 9 မူင်း ၵူၼ်းဝၢၼ်ႈၶုမ်ႇၸူင် ဢိူင်ႇၼႃးၸွၵ်ႇ ၸႄႈဝဵင်းလႃႈသဵဝ်ႈ ယိင်းၸၢႆး 5-6 ၵေႃႉ ၶီႇထူဝ်ႈၵႂႃႇႁႆႈ၊ သမ်ႉၵႂႃႇႁၼ်မၢၵ်ႇၵွင်ႈလူင် ပႆႇတႅၵ်ႇ ၶမ်လွၼ်ပူၵ်ႇ ဝႆႉတီႈၶၢင်ႈတၢင်း ။ ၶဝ်ၵဵပ်းဢဝ်တၢင်ႇထူဝ်ႈ ၵႂႃႇၸွမ်း ၼႂ်းႁႆႈ၊ မိူဝ်ႈထိုင်ႁႆႈ ၵမ်ႈလူင်းထူဝ်ႈ ၵမ်ႈၽွင်ႈတိုၵ်ႉၵိုတ်းၼိူဝ်ထူဝ်ႈၼၼ်ႉ မၢၵ်ႇတႅၵ်ႇတိူဝ်ႉ ပဵၼ်ၽေးဢုပၢတ်ႈသႂ်ႇတူဝ် ထိုင်တီႈ တၢႆ 2 ၵေႃႉ ၊ မၢတ်ႇၸဵပ်း လိူဝ် ႁႅင်း 2 ၵေႃႉ။
ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ- “ၸိူဝ်းတၢႆ ၵေႃႈတၢႆယဝ်ႉၶႃႈ၊ ဢၼ်တိူဝ်ႉမၢတ်ႇ ႁႅင်းတႄႉ ဢဝ်ၵႂႃႇႁူင်းယႃ တီႈၼမ်ႉပွင်ႈ ယဝ်ႉဢေႃႈ။ ယွၼ်ႉလႅပ်ႈလႆႈမႆႈၸႂ်ႈလႄႈ တေႃႈလဵဝ် ငိၼ်းဝႃႈ သိုပ်ႇသူင်ႇၵႂႃႇ ႁူင်းယႃ လႃႈသဵဝ်ႈ ၊ တေႃႈလဵဝ် ပဵၼ်ႁိုဝ်တႄႉ ပႆႇႁူႉၶႃႈ” – ဝႃႈၼႆ။
ၵူၼ်းၸၢႆးသွင်ၵေႃႉဢၼ်လူႉတၢႆၵႂႃႇၼႆႉ သႅၼ်းပၢၼ်ဢႃယုၼႂ်းၵႄႈ 25-30 ပဵၼ်ၵူၼ်းဝၢၼ်ႈၶုမ်ႇၸူင် ဢိူင်ႇၼႃးၸွၵ်ႇ ဢၼ်ၵႆၵၼ် တၢင်းဝၢၼ်ႈၼမ်ႉပွင်ႈ 2 လၵ်း(ဝဵင်းၼမ်ႉပွင်ႈ မီးၼိူဝ်သဵၼ်ႈတၢင်းလူင် လႃႈသဵဝ်ႈ – တၢင်ႉယၢၼ်း)။
ဝၢၼ်ႈၶုမ်ႇၸူင် ဢိူင်ႇၼႃးၸွၵ်ႇ ၼႆႉ မိူဝ်ႈဝၼ်းတီႈ 12/3/2023 ပူၼ်ႉမႃးၼႆႉ ၸုမ်းဢူၺ်းလီသိုၵ်း ပွတ်းႁွင်ႇ တင်း ၸုမ်းသိုၵ်းမၢၼ်ႈ ယိုဝ်းၵၼ်။ မၢၵ်ႇဢၼ် တႅၵ်ႈတိူဝ်ႉၵူၼ်းဝၢၼ်ႈၼႆႉၵေႃႈ ပဵၼ်မၢၵ်ႇၽွင်းပၢင်တိုၵ်း ၊ ၶဝ်ယိုဝ်းၵၼ်သမ်ႉပႆႇတၼ်းတႅၵ်ႇသေ ၵိုတ်းဝႆႉ ။ ၸိူဝ်းဢၼ်လူႉတၢႆ ပႃးၸဵမ် ၸိူဝ်းတိူဝ်ႉမၢတ်ႈ ပဵၼ်ၵူၼ်းၺႃးၸၢၵ်ႇပၢင်တိုၵ်းသေလႆႈပၢႆႈၵႂႃႇသွၼ်ႈတီႈဝတ်ႉၵျွင်းမုၼ်ၸဝ်ႈ ၊ တိုၵ်ႉပွၵ်ႈ မႃးယူႇ ၶိုၼ်းဝၢၼ်ႈ မိူဝ်ႈ ဝၼ်းတီႈ 17 ပူၼ်ႉမႃးၼႆႉၵူၺ်း။
ယွၼ်ႉပၢင်တိုၵ်းၵၼ် မိူဝ်ႈဝူင်ႈပူၼ်ႉမႃးၼႆႉသေ မၢၵ်ႇဢၼ် သိုၵ်းသွင်ၾၢႆႇ ႁၢင်ႈၵၢင်တေႃႇၵၼ်၊ မၢၵ်ႇလူင် ဢၼ်ပိုတ်းယိုဝ်းၵၼ်သေ ဢမ်ႇတႅၵ်ႇ ၶင်ႉၶမ် ၸွမ်းႁႂ်ႈၸွမ်းသူၼ် ၸွမ်းတႃႈၸွမ်းတၢင်း ၸၢင်ႈတိုၵ်ႉ မီးၼမ်။
ၵူၼ်းၼုမ်ႇ ဢၼ်တူင်ႉၼိုင် ယူႇၼႂ်းထုင်ႉၼမ်ႉပွင်ႈ လၢတ်ႈဝႃႈ – “ၶႂ်ႈႁႂ်ႈ ၾၢင်ႉယူႇ ၾၢင်ႉၵိၼ် ယႃႇယိပ်းယွပ်း ဢဝ်မႃးလဵၼ်ႈ ပေႃးပဵၼ်မၢၵ်ႇၵွင်ႈ မၢၵ်ႇပွမ်း မၢၵ်ႇမႅင်းၾင်လိၼ် ၸိူဝ်းၼႆႉ ပေႃးၵႂႃႇယိပ်းမႅၼ်ႈၺႃး ၵႂႃႇဢဝ်မႃးလဵၼ်ႈ ၸၢင်ႈတႅၵ်ႇတိူဝ်ႉ သၢႆၸႂ်၊ ၶၼ်ႇထႃႇတူဝ်ၶိင်း ၸၢင်ႈလူႉၵွႆ ႁၵ်းၵႅင်ႉ လႄႈ ႁႂ်ႈၾၢင်ႉၵၼ်ၽွင်ႈၶႃႈ” – ဝႃႈၼႆ။
မိူဝ်ႈပီၵၢႆ 7/3/2022 ပူၼ်ႉမႃးၼႆႉၵေႃႈ လုၵ်ႈဢွၼ်ႇဝၢၼ်ႈၶူဝ်ၶမ်း ဢိူင်ႇပၢင်ႇထူဝ်လိၼ် ထုင်ႉမိူင်းယေႃ ၾၢႆႇဢွၵ်ႇဝဵင်းလႃႈသဵဝ်ႈ မွၵ်ႈ 40 လၵ်းၼႆႉၵေႃႈ ၵဵပ်းမၢၵ်ႇမႃးလဵၼ်ႈၵၢင်ဝၢၼ်ႈလႄႈ မၢၵ်ႇတႅၵ်ႈတိူဝ်ႉတၢႆထင်တီႈ 3 ၵေႃႉ၊ မၢတ်ႇၸဵပ်း 11 ၵေႃႉ ။ ၵူၼ်းဝၢၼ်ႈ လႆႈဢဝ်တူဝ် သူင်ႇႁူင်းယႃလူင်ဝဵင်းလႃႈသဵဝ်ႈ။ ယၢမ်းလဵဝ် ၸိူဝ်းၶႅၼ်းၵေႃႈမီးသေတႃႉ ၸိူဝ်းပဵၼ်ၵူၼ်းၶၼ်ႇထႃႇယူဝ်ႉၵႂႃႇၵေႃႈမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ