ၵူၼ်းမိူင်းၵူတ်ႉၶၢႆ ထူပ်းၽေးၼမ်ႉႁႅင်ႈလႄႈ ၵူၼ်းမိူင်းၵိၼ်းၸႂ်တႃႇၽုၵ်ႇသွမ်ႈတိူၵ်ႇႁႆႈလွၵ်းၼႃး မီးၶွမ်ႊပၼီႊ မႃးၶုတ်းၶမ်း တၢင်းႁူဝ်ၼမ်ႉ ဝႃႈၼႆ။
တႄႈဢဝ်ႁၢင်ပီ 2022 ၶွမ်ႊပၼီႊ မႃးၶုတ်းႁေႈၶုတ်းၶမ်း ၼႂ်းၵႄႈ ဢိူင်ႇမိူင်းယု လႄႈ ၼမ်ႉၽၵ်းၵႃ ၵူၼ်းမိူင်းၵူတ်ႉၶၢႆ ထူပ်းၽေးၼမ်ႉႁႅင်ႈ ယၢပ်ႇၽိုတ်ႇတႃႇၽုၵ်ႇသွမ်ႈလႄႈ ၼမ်ႉၸႂ်ႉလိူဝ်ႁႅင်း ။
ၼၢင်းယိင်းၵူၼ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ထၢင်ႇတႄႉ လွၵ်းၼႃးဢၼ်ယူႇၸမ်ႁိမ်းၼၼ်ႉတႄႉ လႅပ်ႈတေဢမ်ႇပဵၼ်ၵၢၼ်ယဝ်ႉၶႃႈ။သမ်ႉပေႃး ဢမ်ႇၶႂ်ႈမီးၼမ်ႉယဝ်ႉၼႃႇ။ၵွပ်ႈဝႃႈ ၶွမ်ႊမၼီႊၶဝ်ဢဝ်ၵႃးထုၺ်ၵႃးၸၢၵ်ႈ မႃးၶုတ်းၶမ်းၼၼ်ႉၼႃႇ။ပေႃးတူၺ်းမိူဝ်ႈလဵဝ်ၼမ်ႉမၢဝ်းႁႅင်ႈၼႃႇ တိုၼ်ႈပဵင်းတႃတိၼ်ၼႆႉၵူၺ်းယဝ်ႉ ” – ဝႃႈၼႆ။
ၵၢၼ်ၽုၵ်ႇသွမ်ႈၼႆႉ လႆႈၸႂ်ယႂ်ႇၼမ်ႉၵေးပၼ်လၵ်း၊ လိူဝ်ၼၼ်ႉလႆႈၸႂ်ယႂ်ႇၼမ်ႉၼွင်လႄႈ လွႆ။ ၼမ်ႉၵႄးၼမ်ႉမၢဝ်းၼႆႉ ႁၢင်ႇၵႆၵၼ်တင်း ၼမ်ႉၽၵ်းၵႃ 8 လၵ်း။ မိူဝ်ႈလဵဝ် လွင်ႈၶုတ်းၶမ်းမီးယူႇၵူႈဝၼ်းလႄႈ ႁဵတ်းႁႂ်ႈၼမ်ႉၶုၼ်ႇၼမ်ႉဢူၼ်။ၵူၼ်းဝၢၼ်ႈၸိူဝ်းပိုင်ႈၵႄးၼမ်ႉၼႆႉ မီးလၢႆလၢႆဝၢၼ်ႈ မိူၼ်ၼင်ႇ ဝၢၼ်ႈလိၼ်လႅင် ၊ ဝၢၼ်ႈႁူဝ်ၶူဝ် ၊ ဢိူင်ႇမိူင်းယု ၊ ပၢင်လေႃႉ ၊ မၢၼ်ႈတူင်ႈ ၊ ဝၢၼ်ႈႁူဝ်ၼႃး ၸဵမ်ၸိူဝ်းၼႆႉ။
ၼၢင်းယိင်းၵူၼ်းပိုၼ်ႉတီႈၵေႃႉၼိုင်ႈ သိုပ်ႇလၢတ်ႈဝႃႈ – “ ပဵၼ်ၶွမ်ႊပၼီႊၽႂ် မႃးၶုတ်းတႄႉ ဢမ်ႇႁူႉ။ပေႃးၼမ်ႉႁႅင်ႈသဵင်ႈယဝ်ႉတႄႉ ၵူၼ်းပိုၼ်ႉတီႈ တေယၢပ်ႇၸႂ်။ တႃႇၽုၵ်ႇသွမ်ႈၼႆႉ ဢႃးၵူဝ်းၾူၼ်ၵွႆးႁိုဝ်တေလႆႈၼေႃႈ။ၵွပ်ႈၼၼ် ပေႃးၼမ်ႉႁႅင်ႈမူတ်းယဝ်ႉတႄႉ ဢမ်ႇငၢႆႈယဝ်ႉ ” – ဝႃႈၼႆ။
ဢွင်ႈတီႈ ဢၼ်ၶုတ်းၶမ်းၼႆႉ မီးၶၢဝ်ႇလိုဝ်းဢွၵ်ႇမႃးဝႃႈ ၸုမ်း TNLA လႄႈ ၸုမ်း KIA ပၼ်ၶႂၢင်ႉၸဝ်ႈငိုၼ်းသႃး ႁဵတ်းသၢင်ႈဝႆႉဝႃႈၼႆသေတႃႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈပႆႇၸၢင်ႈယိုၼ်ယၼ်လႆႈတႅတ်ႈတေႃး။
ၵူၼ်းပိုၼ်ႉတီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ- “ မၼ်းမီးလွင်ႈတုမ်ႉတိူဝ်ႉ ၾိင်ႈသၽႃႇဝၼမ်လႄႈ တႃႇတေမီးလွင်ႈႁၢမ်ႈလွင်ႉႁေႉၶုတ်းၶမ်းၸိူဝ်းၼႆႉ သိုၵ်းမၢၼ်ႈယိုတ်းမိူင်းလႄႈ ၸုမ်းသိုၵ်းဢၼ်ယူႇတႂ်ႈꧠဝ် မိူၼ်ၼင်ႇ ပျီႇတုၸိတ်ႉၶဝ်ၸိူဝ်းၼၼ်ႉၵေႃႈ ဢမ်ႇႁၼ်တူင်ႉၼိုင်ႈႁေႉၵင်ႈပၼ်သင်” – ဝႃႈၼႆ။
ၼႂ်းၸႄႈဝဵင်းၵူတ်ႉၶၢႆၼႆႉ ၼွၵ်ႈလိူဝ် သိုၵ်းမၢၼ်ႈ ၸၵၸယဝ်ႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်းလၢႆၸုမ်းတူင်ႉၼိုင်ဝႆႉ မိူၼ်ၼင်ႇ ၸုမ်းသိုၵ်း KIA ၊ ၸုမ်းသိုၵ်းၵဝ်ႈၵၢင်ႉ MNDAA ၊ ၸုမ်းသိုၵ်းတဢၢင်း TNLA ၊ ၸုမ်းသိုၵ်း SSPP/SSA ၸဵမ်ၸိူဝ်းၼႆႉ။
တီႈဝဵင်းၵူတ်ႉၶၢႆမီး 16 ပွၵ်ႉ 68 ဢိူင်ႇ 463 ဝၢၼ်ႈ။ ၵူၼ်းမိူင်းဢၼ်ယူႇတၢင်းဝၢၼ်ႈမီး 140000 ပၢႆ လႄႈ ႁူဝ်ၼပ်ႉၵူၼ်းၼႂ်းဝဵင်း မီး 40000 ပၢႆ။ မီးၵူႈၸၢဝ်းၶိူဝ်းယူႇႁူမ်ႈၵၼ်။ ပိူင်လူင်ႁဵတ်းၵိၼ်ၵၢၼ်ၽုၵ်ႇသွမ်ႈသူၼ်၊ ႁႆႈ၊ၼႃး ၊ ၵၢၼ်လဵင်ႉလူတူဝ်သတ်း။ ၵွပ်ႈၼႆပေႃးဢမ်ႇမီးၼမ်ႉၵိၼ်ၼမ်ႉၸႂ်ႉ ၼမ်ႉၽုၵ်ႇသွမ်ႈၸိုင် ၵူၼ်းမိူင်းတၵ်းယၢပ်ႇၽိုတ်ႇၼႂ်းၵၢၼ်ႁႃၵိၼ်လဵင်ႉတွင်ႉ -ၵူၼ်းၵူတ်ႉၶၢႆလၢတ်ႈၼင်ႇၼႆ။
