ရူတ်ႉၶိူင်ႈၵူၼ်းမိူင်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ႁၢႆသေတႃႉဢမ်ႇၸၢင်ႈပိုင်ႈၽႂ်ၸွႆႈႁႃႁႂ်ႈႁၼ်ၶိုၼ်း။

မိူဝ်ႈၼႆႉ ဝၼ်းတီႈ 22/3/2023 ယၢမ်းၵၢင်ဝၼ်း 12 မူင်းၼႆႉၵေႃႈ ရူတ်ႉၶိူင်ႈၵူၼ်းမိူင်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ႁၢႆလမ်းၼိုင်ႈ။

ၸဝ်ႈၶွင်ရူတ်ႉၶိူင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉၶႃႈ ၶႃႈဝႆႉတီႈသုမ်ႉတၢင်းၼႃႈၵၢတ်ႇၼၼ်ႉၵူၺ်းၶႃႈ ။ ပဵၼ်ရူတ်ႉၶိူင်ႈမိူင်းထႆး သႅၼ်း ႁွၼ်ႊတႃႊ 100 ဢေႃႈၼၼ်ႉ။တိုၵ်ႉႁႃသိုဝ်ႉဝႆႉ မိူဝ်ႈပီၵၢႆၼႆႉၵွႆး။ ၶႃႈႁဝ်းသမ်ႉ ပိုတ်ႇသႅင်ႇဝႆႉၼႂ်းၵၢတ်ႇၼႃႇၼေႃ။ၽိူဝ်ႇဝႃႈ တေမိူဝ်းယဝ်ႉၼႆ ၵႂႃႇႁႃႁိုဝ်မီးယဝ်ႉ။ မိူဝ်ႈမႃးၵိုတ်းဝႆႉတႄႉမွၵ်ႈ 8 မူင်းၵၢင်ၼႂ်ၼႆႉၼၼ်ႉဢေႃႈ။ ၵိုတ်းဝႆႉတီႈၼၼ်တႃႇသေယဝ်ႉ မိူဝ်ႈၼႆႉမႃးၸင်ႇႁၢႆ။ႁိမ်းၼၼ်ႉ မီးၵွင်ႈထႆႇဢၼ် လၢၼ်ႉၶမ်းၶဝ်ႈတင်ႈဝႆႉယူႇ ၵူၺ်းၼႃႇ ဢမ်ႇႁၼ်ပႃးတီႈဝႆႉရူတ်ႉၶိူင်ႈ ” -ဝႃႈၼႆ။

တီၵိုတ်းရူတ်ႉၼႂ်းၵၢတ်ႇၸႄႈဝဵင်းလၢႆးၶႃႈၼႆႉ ၽူႈမီးပုၼ်ႈၽွၼ်းၶဝ် ၵဵပ်းငိုၼ်းၵူၼ်းမိူင်းသေ ပႂ်ႉလူလွမ်ပၼ်ဝႃႈၼႆသေတႃႉ  ဢမ်ႇမီးလွင်ႈလူင်းမိုဝ်းၸွႆႈထႅမ်သင်ၼႆယဝ်ႉ။

ဢိင်ၼိူဝ်လွင်ႈၼႆႉသေ ၸဝ်ႈၶွင်ရူတ်ႉၶိူင်ႈသိုပ်ႇလၢတ်ႈဝႃႈ – “ ၶွၼ်ႇဝႆႉရူတ်ႉၶိူင်ႈၼႆႉ ၼိုင်ႈလိူၼ်လႂ် လႆႈပၼ် 3000 ဢေႃႈၼၼ်ႉ ။ၵႂႃႇလၢတ်ႈတီႈၶဝ်ၵေႃႈ ၶဝ်ဢမ်ႇဢဝ်ပုၼ်ႈၽွၼ်းသင်။ႁဝ်းၶႃႈဢမ်ႇၸၢင်ႈႁဵတ်းႁိုဝ် တေဝႃႈတေၵႂႃႇတိူင်ႇလၢတ်ႈယႄးၼႆၵေႃႈ မၼ်းႁိုဝ်တေထူးသင်ၶႃႈၼေႃႈ ႁူႉၵၼ်ယူႇၼႃႇ ။ ၵႃႈလႆႈဝႃႈ ပီႈၼွင်ႉတၢင်းလႂ် ႁၼ်ၵေႃႈ ႁႂ်ႈပွင်ႇၶၢဝ်ႇပၼ်ၽွင်ႈဝႃႈၼႆ ၵူၺ်းၶႃႈ” – ဝႃႈၼႆ။

ရူတ်ႉၶိူင်ႈဢၼ်ႁၢႆၵႂႃႇၼႆႉ ပဵၼ်ရူတ်ႉၶိူင်ႈ ပႃႈၶိၼ်ႇတၢၼ်းယီႇ ယူႇပွၵ်ႉ 3 ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ၼႂ်းလိူၼ်မၢတ်ႉၶျ်ႉၼႆႉၵူၺ်း ရူတ်ႉၶိူင်ႈတီႈဝဵင်းလၢႆးၶႃႈၼႆႉ ႁၢႆဢမ်ႇယွမ်း 4 လမ်းယဝ်ႉၼႆယဝ်ႉ။

ၸဝ်ႈၶွင်ရူတ်ႉၶိူင်ႈ ပႃႈၶိၼ်ႇတၢၼ်းယီႇ သင်ႇလၢတ်ႈဝႃႈ- “ ပေႃးၽႂ်ႁၼ်မႅၼ်ႈ ရူတ်ႉၶိူင်ႈၶႃႈ ၶႅၼ်းတေႃႈသူင်ႇၶၢဝ်ႇပၼ်ၽွင်ႈၶႃႈ ဢမ်ႇဝႃႈ ႁၼ်ပဵၼ်လမ်း(ႁိုဝ်) ယႃႉႁဵတ်းပွတ်းႁဵတ်းပုတ်းၵေႃႈယဝ်ႉ ႁႂ်ႈလၢတ်ႈပၼ်ၶႃႈသေၵမ်း ၵပ်းသိုပ်ႇၸူးမၢႆၽူၼ်း 09 4012 87800 ၼႆႉၵေႃႈလႆႈ ” – ဝႃႈၼႆ။

တီႈဝဵင်းလၢႆးၶႃႈၼႆႉ ၽူႈလၵ်ႉလိူင်ႇၼမ်။ ရူတ်ႉၶိူင်ႈၵမ်းၵမ်းႁၢႆ ပလိၵ်ႈဢမ်ႇတွၼ်ႉတီႉလႆႈတူဝ်ၽူႈလၵ်ႉသေပွၵ်ႈ။ ႁၢင်ပီ ပီၵၢႆၼႆႉ ၽူႈလၵ်ႉၼႆႉ ယင်းၶိုၼ်ႈလၵ်ႉထိုင်ၼိူဝ်ၵျွင်းမုၼ်ၸဝ်ႈလူးၵွၼ်ႇ ။