ၾူၼ်ႁႃႇယႂ်ႇမၢၵ်ႇႁဵပ်းတူၵ်းၽတ်ႉလင်ႁိူၼ်းၵူၼ်းဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း လူႉၵွႆၼမ်။

 ဝၼ်းတီႈ 14/3/2023 ႁူဝ်ၼႂ်ၸဝ်ႉ 3 မူင်းၼၼ်ႉ ၾူၼ်တူၵ်းႁႃႇယႂ်ႇ မၢၵ်ႇႁဵပ်းတူၵ်းၽတ်ႉ လင်ႁိူၼ်းၵူၼ်းဝဵင်းလွၵ်ႉၸွၵ်ႇလူႉၵွႆၼမ်။

ၵူၼ်းဝဵင်းလွၵ်ႉၸွၵ်ႇၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မၢၵ်ႇႁဵပ်းၼႆႉ တူၵ်းႁူၺ်ႇယႂ်ႇႁူၺ်ႇလူင် ပဵင်းၵူၼ်ႈၵွၵ်းၼႆႉဢေႃႈ ၵူၼ်းမိူင်းပေႃးလႆႈပၢႆႈဢေႃႈ။ၶမ်ႈသိုၼ်းၼႆ ဢမ်ႇလႆႈၼွၼ်းၶႃႈ။ မႅၼ်ႈၶၢဝ်းယၢမ်းၵူၼ်းၼွၼ်းလပ်းၾၼ်လီဢေႃႈ။လင်ႁိူၼ်းပေႃးပွင်ႇပေႃးယွၵ်းဢေႃႈ။လင်ႁိူၼ်းဢၼ်မီးၼႂ်းဝၢၼ်ႈပၢင်ပေႃၼၼ်ႉတႄႉ လင်ႁိူၼ်းတေမီးမွၵ်ႈ 30 လင်ၼႆႉဢေႃႈ။တင်းဝၢၼ်ႈၼွင်ဝူဝ်းလႄႈ တၢင်းဝၢၼ်ႈၽၵ်းၶႅမ်းၸိူဝ်းၼႆႉတႄႉ မွၵ်ႈ 100 ပၢႆၼႆႉယူႇ။ၶႃႈလၢမ်းတူၺ်းတႄႉ”- ဝႃႈၼႆ။

ဢွင်ႈတီႈဢၼ်ၺႃးၾူၼ်ႁႃႇယႂ်ႇ မၢၵ်ႇႁဵပ်းတူၵ်းၼမ်ၼႆႉ မီးလၢႆလၢႆတီႈ မိူၼ်ၼင်ႇ ဝၢၼ်ႈၽၵ်းၶႅမ်း ၊ဝၢၼ်ႈပၢင်ပေႃ ၊ ဝၢၼ်ႈၼွင်ဝူဝ်း ပဵၼ်ၼႂ်းၵႄႈလႅၼ်လိၼ် ဝဵင်းလွၵ်ႉၸွၵ်ႇ တင်း ဝဵင်းမိူင်းၵိုင်။မိူၼ်ၼင်ႇ ဝတ်ႉဝႃးၽႃသိူဝ်ႇလႄႈၸလွပ်ႈသႃလႃးၸိူဝ်းၼႆႉၵေႃႈ လူႉၵွႆပႃးၼႆယဝ်ႉ။

ၵူၼ်းပိုၼ်ႉတီႈသိုပ်ႇလၢတ်ႈဝႃႈ- “ ၵျွင်းမုၼ်ႈၸဝ်ႈလႄႈၸလွပ်ႈၸိူဝ်းၼႆႉၵေႃႈ ၵွႆပႃးၶႃႈဢေႃႈ။ တေမီးမွၵ်ႈသီႇႁႃႈဝၢၼ်ႈၼႆႉၶႃႈၵႂႃႈ ဢၼ်တေလူႉၵွႆၼမ်ၵေႃႈ။မိူဝ်ႈလဵဝ်တႄႉၵေႃႈ ၽူၼ်ႁိူတ်ႇသေ ၾႃႉပၢင်ႇမႃးၶိုၼ်းယဝ်ႉၶႃႈ။မၢၵ်ႇႁဵပ်းၸိူဝ်းတူၵ်းဝႆႉၼႆႉ တိုၵ်ႉမႃးၸိူမ်ႈမိူဝ်ႈ ၵၢင်ဝၼ်း 10 မူင်းၼႆႉၼေႈ” – ဝႃႈၼႆ။

ႁိူၼ်းဢၼ်ၺႃးမၢၵ်ႇႁဵပ်းၽတ်ႉသေ လူႉၵွႆၵႂႃႇၼႆႉ မီးၼမ်ယူႇသေ ထိုင်မိူဝ်ႈလဵဝ်ပႆႇမီးၸုမ်းလႂ် မႃးလူလွမ်ၵမ်ႉၸွႆႈ။ဢိင်ၼိူဝ်လွင်ႈၼႆႉသေ ၵူၼ်းပိုၼ်ႉတီႈသိုပ်ႇလၢတ်ႈဝႃႈ –  “ ဢၼ်ႁိူၼ်းလူႉၵွႆၸိူဝ်းၼႆႉတႄႉ ပႆႇမီးၽႂ်မႃးၸွႆႈၶႃႈ ။ၵူၼ်းဝၢၼ်ႈႁဝ်းၶဝ် တေႁူမ်ႈၵၼ်သေ တၢင်ႇလိၵ်ႈယွၼ်းတၢင်းၸွႆႈထႅမ်ထိုင် ၽူႈမီးပုၼ်ႈၽွၼ်းၶဝ်ယူႇဢေႃႈ ” – ဝႃႈၼႆ။