သိုၵ်းမၢၼ်ႈတင်း SSPP ပဵၼ်ပၢင်တိုၵ်းၵၼ်တီႈမိူင်းယႆ ၸိုင်းတႆးပွတ်းႁွင်ႇ။
မိူဝ်ႈဝႃး ဝၼ်းတီႈ 11/3/2023 ၵၢင်ဝၼ်း 1 မူင်းပၢႆၼၼ်ႉ သိုၵ်းမၢၼ်ႈတင်းတပ်ႉၸုမ်း SSPP ပဵၼ်ပၢင်တိုၵ်းၵၼ်ႁိမ်းဝၢၼ်ႈၼႃးယၢင်းလႄႈၼႃးသၢင်း ၾၢႆႇတူၵ်းၸႄႈဝဵင်းမိူင်းယႆ ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈမိူင်းယႆၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ-” ၸႂ်ႈဢေႃႈ ပဵၼ်တီႈႁိမ်းၶူဝ်လွင်းၼၼ်ႉဢေႃႈ ပဵၼ်မွၵ်ႈ ၶိုင်ႈၸူဝ်ႈမူင်းၼႆႉဢေႃႈ။သိုၵ်းမၢၼ်ႈတင်းယႄးႁူမ်ႈၵၼ်ႁေ တႄႇယိုဝ်းၼႆဢေႃႈ။ၾၢႆႇ SSPP တႄႉမီးလွင်ႈမၢတ်ႇၸဵပ်းၽွင်ႈယူႇ ဢမ်ႇႁူႉဝႃႈလၢႆၵေႃႉ” ဝႃႈၼႆ။
လွင်ႈၼႆႉၽူႈတွႆႇႁွၵ်ႈတိတ်းတေႃႇၸူး SSPP ယူႇၵေႃႈဢမ်ႇလႆႈလႄႈ ဢမ်ႇၸၢင်ႈယိုၼ်ယၼ်လွင်ႈမၢတ်ႇၸဵပ်းလူႉတၢႆ။
ပၢင်တိုၵ်းၼႆႉ ပဵၼ်ႁိမ်းၶူဝ်လွင်း ဢၼ်မီးသဵၼ်ႈတၢင်း သီႇပေႃႉ-မိူင်းယႆ-လႃႈသဵဝ်ႈ ႁိမ်းဝၢၼ်ႈၼႃးယၢင်း ၵႆၵၼ်တင်း ဝဵင်းမိူင်းယႆ 1 လၵ်းပၢႆ မၢၵ်ႇၵွင်ႈလႄႈ ၸၢၵ်ႇမၢၵ်ႇတူၵ်းသႂ်ႇၼႂ်းသူၼ်ၼႂ်းၼႃး ၵူၼ်းမိူင်း ႁိမ်းၶူဝ်လွင်းၼၼ်ႉတင်းၼမ်ၼႆယဝ်ႉ။
ၵူၼ်းပိုၼ်ႉတီႈမိူင်းယႆၵေႃႉၼိုင်ႈသိုပ်ႇလၢတ်ႈဝႃႈ – “တင်းသွင်ၾၢႆႇၸႂ်ႉၵွင်ႈ ၸႂ်ႉမၢၵ်ႇသေယိုဝ်းၵၼ်။သိုၵ်ႈမၢၼ်ႈထွႆဢွၵ်ႇမႃး ၾၢႆႇဢွၵ်ႇသေလႄႈ ပၢင်တိုၵ်းၵေႃႈယဵၼ်ၵႂႃႇဢေႃႈ။ဝၢႆးပၢင်တိုၵ်းယဝ်ႉ သိုၵ်းမၢၼ်ႈၵူတ်ႇထတ်းႁၢၼ်ႉတၢင်းၶၢႆ ၸွမ်းၶူဝ်လွင်းၼၼ်ႉပေႇၸႂ်။ ၶူဝ်ၵေႃႈပိၵ်ႉဝႆႉဢမ်ႇပၼ်ၵူၼ်းၵႂႃႇမႃးတေႃႇထိုင်ၼႂ်ၼႆႉ ”- ဝႃႈၼႆ။
မိူဝ်ႈဝၼ်းတီႈ 4/3/2023 ၼၼ်ႉၵေႃႉ သိုၵ်းၶၢင် KIA ဢဵၼ်ႁႅင်း မွၵ်ႈ 200 ၵေႃႉ ၶဝ်ႈပၵ်းတပ်ႉယူႇသဝ်း ၼႂ်းဝၢၼ်ႈတီးမလႄႈ သိုၵ်းၵဝ်ႈၵၢင်ႉ MNDAA ဢဵၼ်ႁႅင်း 100 ပၢႆသမ်ႉ ၶဝ်ႈပၵ်းတပ်ႉယူႇသဝ်း ၼႂ်းဝၢၼ်ႈၼွင်ဢႅၼ်ႇ ၼႂ်းဢိူင်ႇတီးမ ၸႄႈဝဵင်းမူႇ ၸေႊ လႅၼ်လိၼ်တႆး – ၶႄႇ လႄႈ ၵူၼ်းမိူင်းမႆႈၸႂ်ၵူဝ်ပဵၼ်ပၢင်တိုၵ်းၼႆယဝ်ႉ ။
SSPP ၼႆႉပႆႇလႆႈလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉၸိုင်ႈမိူင်းသေတႃႉ ၸွမ်ၸိၵ်းသိုၵ်းမၢၼ်ႈယိုၼ်းမိုဝ်းမႃးတႃႇဢုပ်ႇဢူဝ်းလွင်ႈငမ်းယဵၼ်ၼၼ်ႉ ၵႂႃႇမႃးတင်း သွင်ပွၵ်ႈယဝ်ႉ။
