သိုၵ်းမၢၼ်ႈယိုတ်းမိူင်းႁူမ်ႈသိုၵ်း PNO ပဵၼ်ပၢင်တိုၵ်းၵၼ်တင်း PDF ထႅင်ႈ မိူဝ်ႈၼႆႉ ဝၼ်းတီႈ 8/3/2023 ယၢမ်းၵၢင်ၼႂ် 7 မူင်း တီႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း။
ၵူၼ်းပိုၼ်ႉတီႈဝဵင်းၾၢႆၶုၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ သိုၵ်းၸၵၸႁူမ်ႈတင်း PNO သေ လေႃႇတိုၵ်း PDF ဢွၼ်တၢင်းလႄႈ ၸင်ႇပဵၼ်ပၢင်တိုၵ်းၵၼ်ယဝ်ႉ။ထိုင်မိူဝ်ႈလဵဝ်ၵေႃႈ တိုၵ်ႉပဵၼ်ယူႇ။ယူႇတီႈႁိူၼ်းႁဝ်းၵေႃႈ လႆႈငိၼ်းသဵင်ၵွင်ႈယူႇဢေႃႈ ထိုင်မိူဝ်ႈလဵဝ်တႄႉ ပႆႇႁူႉလွင်ႈ မၢတ်ႇၸဵပ်းလူႉၵွႆသင်” – ဝႃႈၼႆ။
ယွၼ်ႉပၢင်တိုၵ်းသေ ၵူၼ်းပိုၼ်ႉတီႈ လၢႆလၢႆဝၢၼ်ႈ ပေႃးသိုပ်ႇပဵၼ်ပၢင်တိုၵ်းယူႇတႄႉ ၵူၼ်းပၢႆႈၽေးသိုၵ်းၸၢင်ႈၼမ်ႁႅင်းမႃးထႅင်ႈၼႆယဝ်ႉ။
ဢိင်ၼိူဝ်လွင်ႈၼႆႉသေ ၵူၼ်းပိုၼ်ႉတီႈ ဝဵင်းၾၢႆၶုၼ်သိုပ်ႇလၢတ်ႈဝႃႈ – “ယွၼ်ႉပၢင်တိုၵ်းၶဝ်ၸိူဝ်းၼႆႉယဝ်ႉ ၵူၼ်းဝၢၼ်ႈ မွၵ်ႈ 6 ဝၢၼ်ႈ ၼႆႉ လႆႈပၢႆႈၽေးသိုၵ်းဝႆႉဢေႃႈ။ပေႃးသိုပ်ႇလၢမ်းပဵၼ်ယူႇထႅင်ႈတႄႉ ၵူၼ်းပၢႆႈၽေး ၸၢင်ႈတေၼမ်မႃးဢေႃႈ” – ဝႃႈၼႆ။
ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃးၼႆႉ သိုၵ်းမၢၼ်ႈယိုတ်းမိူင်းလႄႈ သိုၵ်း PDF ပဵၼ်ပၢင်တိုၵ်းၵၼ်ၼႂ်းၸႄႈဝဵင်းၾၢႆၶုၼ်၊ ဝၢႆးၼၼ်ႉ ပၢင်တိုၵ်းသိုပ်ႇလၢမ်းပဵၼ်မႃးတၢင်းၸႄႈဝဵင်းပၢင်လွင်း ႁဵတ်းႁႂ်ႈၵူၼ်းမိူင်း လႆႈယၢပ်ႇယဝ်ႉယၢပ်ႇထႅင်ႈ ၊ ဢမ်ႇမီးတီႈပၢႆႈ တီႈသဝ်း ၊ ဢမ်ႇမီးလွင်ႈႁူမ်ႇလူမ်ႈ။
