Friday, March 29, 2024

ဝဵင်းတွင်ႇဢူႇ လူဝ်ႇဢဵၼ်ႁႅင်းမေႃသွၼ် တႃႇပၢင်သွၼ်လိၵ်ႈတႆးၶၢဝ်းမႆႈ

Must read

ပီႈၼွင်ႉတႆးထုင်ႉပဵင်းဝဵင်းတွင်ႇဢူႇ (တွင်ႁူႇ) တိူင်းပႃႇၵိူဝ် လူဝ်ႇဢဵၼ်ႁႅင်းမေႃသွၼ် တႃႇၸတ်းပၢင်သွၼ်လိၵ်ႈတႆးၶၢဝ်းမႆႈ။

တႄႇဢဝ်ႁၢင်လိူၼ်မၢတ်ႉၶျ် တေႃႇထိုင် လိူၼ်မေႊ ယူႇတီႈၸုမ်းၵူၼ်းၼုမ်ႇတႆးဝဵင်းတွင်ႇဢူႇ တိူင်းပႃႇၵိူဝ် တေဢွၼ်ၸတ်းႁဵတ်းပၢင်သွၼ်လိၵ်ႈတႆးၶၢဝ်းမႆႈ ၸွမ်းၼင်ႇလႆႈၸတ်းႁဵတ်းမႃးၵူႈပီပီ  ပီၼႆႉ ယၢပ်ႇၽိုတ်ႇဢဵၼ်ႁႅင်းမေႃသွၼ်ဝႆႉဝႃႈၼႆ။

- Subscription -
Photo : ႁၢင်ႈပၢင်သွၼ်လိၵ်ႈတႆးၶၢဝ်းမႆႈဝဵင်းတွင်ႇဢူႇ( ၵူၼ်းပိုၼ်ႉတီႈသူင်ႇမႃး)

ၵႅမ်ႁူဝ်ပဝ်ႈၸုမ်းၵူၼ်းၼုမ်ႇတႆးဝဵင်း တွင်ႇဢူႇ(တွင်ႁူႇ) လၢတ်ႈတီႈၽူႈတွႆႇႁွၵ်ႈဝႃႈ – “ ပီၼႆႉတႄႉ တေပဵၼ်ၸတ်းႁဵတ်း တီႈတွင်ႇဢူႇၼႆႉၵူၺ်းဢေႃႈ မိူဝ်ႈၵၢပ်ႈပၢၼ်ဝၢၼ်ႈမိူင်းလီတႄႉ ႁဵတ်းၸွတ်ႇတိူင်းပႃႇၵိူဝ်ဝႆႉဢေႃႈ။မီးမွၵ်ႈ 12 ၸႄႈဝဵင်းၼႆႉဢေႃႈ။မိူဝ်ႈလဵဝ်တႄႉ တႃႇၸတ်းတီႈတွင်ႇဢူႇၵူၺ်းၵေႃႈ မေႃသွၼ်ဢမ်ႇၵုမ်ႇထူၼ်ႈၶႃႈ ။ပေႃးသွၼ်ႇတူၺ်း တီႈတေႁဵတ်းပၢင်သွၼ်ၼႆႉ တေမီးယူႇ ပႅတ်ႇဝၢၼ်ႈၵဝ်ႈဝၢၼ်ႈ။ၼိုင်ႈဝၢၼ်ႈလႂ် ၶႂ်ႈႁႂ်ႈမီး မေႃသွၼ် 2 ၵေႃႉၼႆႉ ” – ဝႃႈၼႆ။

တႃႇၸတ်းႁဵတ်းပၢင်သွၼ်လိၵ်ႈတႆးၶၢဝ်းမႆႈတီႈၸႄႈဝဵင်းဝဵင်းတွင်ႇဢူႇပီၼႆႉ လူဝ်ႇဢဵၼ်ႁႅင်းမေႃသွၼ် 18 ၵေႃႉ မိူဝ်ႈလဵဝ်မီးဝႆႉ 8 ၵေႃႉၵူၺ်း တိုၵ်ႉလူဝ်ႇဢဵၼ်ႁႅင်းမေႃသွၼ်ထႅင်ႈ 10 ၵေႃႉ။ တေၸတ်းႁဵတ်း ၼႂ်းဝဵင်းတွင်ႇဢူႇ 7 ဝၢၼ်ႈလႄႈ ၼႂ်းဝဵင်းၽိဝ်း(ဖြူးမြို့)  2 ဝၢၼ်ႈ။

ၵႅမ်ႁူဝ်ပဝ်ႈၸုမ်းၵူၼ်းၼုမ်ႇတႆးဝဵင်းတွင်ႇဢူႇ သိုပ်ႇလၢတ်ႈဝႃႈ- “ မိူဝ်ႈပီပူၼ်ႉမႃးတႄႉ ၼႂ်းဝဵင်းတွင်ႇဢူႇၼႆႉၵွႆး လုၵ်ႈ ႁဵၼ်း ဝၢၼ်ႈလႂ် မီးယူႇမွၵ်ႈ သၢဝ်းသၢဝ်းပၢႆဢေႃႈ။ယဝ်ႉၵေႃႈ ႁူမ်ႈၵၼ် မီးယူႇမွၵ်ႈ 200 ပၢႆၼႆႉယူႇဢေႃႈ။ လုၵ်ႈႁဵၼ်း တႄႉၵေႃႈ ဢမ်ႇလိူၵ်ႈၵူၼ်းဢမ်ႇလိူၵ်ႈဢႃယုၶႃႈ။ၽႂ်ပႆႇမေႃလိၵ်ႈတႆး ၽႂ်သူၼ်ၸႂ်လိၵ်ႈတႆး ႁႂ်ႈမႃးၶိုၼ်ႈႁဵၼ်းလိၵ်ႈတႆး ၶၢဝ်းမႆႈၼႆႉဢေႃႈ။မိူၼ်ၸိူင်ႉၼင်ႇ ဢ တူင်းလူင်း(အ ၃ လုံး) ၵူႈပွၵ်ႈၼၼ်ႉ ၼႃႇၼေႃ။ ၵူၼ်းဢႃယု ႁႃႈသိပ်းႁူၵ်းသိပ်း ၵေႃႈ မႃးသွၼ်လႆႈယူႇ။ မိူဝ်ႈလဵဝ်ႁဝ်းၶႃႈထၢမ်တူၺ်းမေႃသွၼ်တၢင်းၼမ်ႉၶမ်းၶဝ် မိူင်းပၼ်ႇၶဝ်ၸိူဝ်းၼႆႉၵေႃႈ ထၢမ် တူၺ်းဝႆႉယူႇ ပႆႇၶႅမ်ႉလႅပ်ႈၶႃႈ” – ဝႃႈၼႆ။

Photo : ႁၢင်ႈပၢင်သွၼ်လိၵ်ႈတႆးၶၢဝ်းမႆႈဝဵင်းတွင်ႇဢူႇ( ၵူၼ်းပိုၼ်ႉတီႈသူင်ႇမႃး)

ပၢင်သွၼ်လိၵ်ႈတႆးၶၢဝ်းမႆႈ မိူဝ်ႈပီ 2022 ပူၼ်ႉမႃးၼႆႉ ဢဵၼ်ႁႅင်းမေႃသွၼ်လိၵ်ႈတႆး ဢၼ်ယူႇၼႂ်းႁူင်းႁဵၼ်း လူင်ပွင် ၸိုင်ႈလႄႈ ၽူႈၶဝ်ႈၸုမ်းၵူၼ်းၼုမ်ႇတႆးဝဵင်းတွင်ႇဢူႇႁူမ်ႈၵၼ်သေ ဢဵၼ်ႁဵင်းမေႃသွၼ် ၵုမ်ႇထူၼ်ႈယူႇ ဝႃႈၼႆသေတႃႉ ပီၼႆႉ မေႃသွၼ်လိၵ်ႈတႆးၼႂ်းႁူင်းႁဵၼ်းၼႂ်းလူင်ပွင်ၸိုင်ႈသိုၵ်းမၢၼ်ႈၵေႃႈ ဢွၵ်ႇၵၢၼ်ၸမ်သဵင်မူတ်း ၼႆယဝ်ႉ။

ဢိင်ၼိူဝ်လွင်ႈၼႆႉသေ ၵႅမ်ႁူဝ်ပဝ်ႈၸုမ်းၵူၼ်းၼုမ်ႇတႆးဝဵင်းတွင်ႇဢူႇ သိုပ်ႇလၢတ်ႈဝႃႈ – “ မေႃသွၼ်လိၵ်ႈတႆး ဢၼ်သွၼ် ၼႂ်းၵျွင်းမၢၼ်ႈၸိူဝ်းၼၼ်ႉၵေႃႈ ဢွၵ်ႇၵၢၼ်မိူဝ်းႁိူၼ်းwၽႂ်မၼ်းမူတ်းယဝ်ႉ။ၵိုတ်း 4 ၵေႃႉၵူၺ်း ။တေလႆႈဝႃႈ တင်းတိူင်းပႃႇၵိူဝ်ၼႆႉမေႃသွၼ်လိၵ်ႈတႆး ဢမ်ႇၶႂ်ႈမီးၽႂ်ယဝ်ႉ” – ဝႃႈၼႆ။

ပၢင်သွၼ်လိၵ်ႈတႆးၶၢဝ်းမႆႈဝဵင်းတွင်ႇဢူႇၼႆႉ ယွၼ်ႉငဝ်းလၢႆးၵူႈပိူင်သေ ၶၢတ်ႇမႃးၽွင်ႈသေတႃႉ တႄႇၸဵမ်မိူဝ်ႈ 2013 တေႃႇထိုင်ပီ 2023 ၼႆႉ ဢမ်ႇၶၢတ်ႇမႃးသေပီ။ ၶၢဝ်းၶူဝ်ႊဝိတ်ႊၵေႃႈ ယင်းလႆႈသွၼ်မႃးယူႇ။ယွၼ်ႉၼၼ် ပီၼႆႉၵေႃႈ ဢမ်ႇၶႂ်ႈႁႂ်ႈၶၢတ်ႇ ၵူၺ်းသမ်ႉ ဢဵၼ်ႁႅင်းမေႃသွၼ်ယၢပ်ႇဝႆႉ။ယွၼ်ႉၼၼ် ၶႂ်ႈယွၼ်းတၢင်းၸွႆႈထႅမ် မေႃသွၼ်ၼႂ်း မိူင်းတႆးႁဝ်း ႁႂ်ႈမႃးၵမ်ႉၸွႆႈပၼ်ႁဝ်းၶႃႈၽွင်ႈၼႆဢေႃႈ။ ၵွပ်ႈဝႃႈ တႆးယူႇတွင်ႇဢူႇ ႁဝ်းၶႃႈၸိူဝ်းၼႆႉ ပေႃးႁဝ်း ဢမ်ႇသွၼ်ၶိုၼ်း ဢမ်ႇလိုမ်ႉၶိုၼ်းၼႆ လိၵ်ႈတႆးၵႂၢမ်းတႆးႁဝ်း တေဢမ်ႇႁိူင်းလႆႈၼႂ်းတူင်ႇဝူင်းတႆးတၢင်းၼႆႉယဝ်ႉၶႃႈ ႁိုင်မႃး ၵူၼ်းမေႃလိၵ်ႈတႆးၵႂၢမ်းတႆး တေဢမ်ႇၸၢင်ႈမီးယဝ်ႉၶႃႈ  ၵႅမ်ႁူဝ်ပဝ်ႈၸုမ်းၵူၼ်းၼုမ်ႇတႆးဝဵင်းတွင်ႇဢူႇ သိုပ်ႇလၢတ်ႈၼင်ႇၼႆ။

သင်ဝႃႈ ပီႈၼွင်ႉၸိူဝ်းၶႂ်ႈမႃး ထႅမ်ႁႅင်းမေႃသွၼ် တီႈဝဵင်းတွင်ႇဢူႇ တိူင်းပႃႇၵိူဝ်ၼႆႉ ၼႆၸိုင် ၵပ်းသိုပ်ႈတွင်ႈထၢမ်ႁူဝ်ယွႆႈမၼ်းလႆႈတီႈ ၸၢႆးၵွၼ်းၶိူဝ်း ၵႅမ်ႁူဝ်ပဝ်ႈၸုမ်းၵူၼ်းၼုမ်ႇတႆးဝဵင်းတွင်ႇဢူႇ မၢႆၾူၼ်း 094 453 444 54 ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း