ၵႃးပုင်ႈတမ်သႂ်ႇ ႁၢၼ်ႉၶၢႆမူယၢင်ႈ ၼႂ်းၵၢင်ဝဵင်းမိူင်းလႃး မီးၵူၼ်းမၢတ်ႇၸဵပ်းၸွမ်း လၢႆၵေႃႉ

ၵႃးလမ်းၼိုင်ႈ ႁေႃႈဝႆးသေ ဢမ်ႇၵုမ်းလႆႈႁႅင်းရူတ်ႉ ပုင်ႈတမ်သႂ်ႇ ႁၢၼ်ႉၶၢႆမူယၢင်ႈ (မူၵထ) ႁၢၼ်ႉၼိုင်ႈ ၼႂ်းၵၢင်ဝဵင်းမိူင်းလႃး ၼႃႈလိၼ်ၶိုၵ်ႉတွၼ်း မၢႆ (4) ဝႃႈၼႆ။

ဝၼ်းတီႈ 26/2/2023 ယၢမ်းၵၢင်ၶိုၼ်း မွၵ်ႈ 10 မူင်း ၵႃးလမ်းၼိုင်ႈ ႁေႃႈဝႆးသေ ပုင်ႈတမ်သႂ်ႇ ႁၢၼ်ႉၶၢႆမူယၢင်ႈ ဢၼ်ပိုတ်ႇ ၶၢႆဝႆႉ ႁိမ်းၶၢင်ႈတၢင်း ၼႂ်းၵၢတ်ႇၵၢင်ၶမ်ႈ ဢၼ်မီးၼႂ်းၵၢင်ဝဵင်းမိူင်းလႃး ၼႃႈလိၼ်ၶိုၵ်ႉတွၼ်း မၢႆ (4) လႅၼ်လိၼ်တႆး – ၶႄႇ ၸိုင်ႈတႆး ပွတ်းဢွၵ်ႇၶူင်း တမ်သႂ်ႇ ၵူၼ်းၼင်ႈၵိၼ်မူယၢင်ႈ လႆႈမၢတ်ႇၸဵပ်းၸွမ်း လၢႆၵေႃႉ။

ၵူၼ်းပိုၼ်ႉတီႈ မိူင်းလႃး လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၵႃးသီၶၢဝ်လမ်းၼိုင်ႈ ႁေႃႈဝႆးသေ ပုင်ႈတမ်သႂ်ႇ တီႈသႅင်ႇမူယၢင်ႈ။ မိူဝ်ႈၽွင်း ၵူၼ်းမိူင်းတိုၵ်ႉၼင်ႈၵိၼ်ယူႇၼၼ်ႉ ထုၵ်ႇၵႃးတမ်သႂ်ႇမၢတ်ႇၸဵပ်းၸွမ်းလၢႆၵေႃႉ။ ၼႂ်း ၼၼ်ႉ ဢၼ်မၢတ်ႇၸဵပ်းႁႅင်း မီးၵေႃႉၼိုင်ႈ ပဵၼ်ၼၢင်းယိင်း။ လွင်ႈလူႉတၢႆတႄႉ ဢမ်ႇမီး။ သႅင်ႇၶဝ်ၵေႃႈ လူႉၵွႆၸွမ်းၼမ်။ ၵူၼ်းဢၼ်ႁေႃႈ ပုင်ႈတမ်သႂ်ႇၼၼ်ႉ ပဵၼ်ၸၢဝ်းၶႄႇ။ လႅပ်ႈတေမဝ်းလဝ်ႈသေ ႁေႃႈဝႆးႁိုဝ် ဢမ်ႇႁူႉ”- ဝႃႈၼႆ။

ၵူၼ်းမိူင်းၼင်ႈၵိၼ်တၢင်းၵိၼ်ယူႇၼႂ်းႁၢၼ်ႉမူယၢင်ႈၼၼ်ႉ လႆႈမၢတ်ႇၸဵပ်းၸွမ်း မွၵ်ႈ 4-5 ၵေႃႉ။ ယူႇတီႈ ၸဝ်ႈၼႃႈတီႈၶဝ် လႆႈတေႃႉသူင်ႇႁူင်းယႃ။ လွင်ႈၵူၼ်းႁေႃႈၵႃးတမ်သႂ်ႇၼၼ်ႉ လႆႈႁွင်ႉၵႂႃႇၵူတ်ႇထတ်း တီႈႁူင်းပလိၵ်ႈဝႆႉယဝ်ႉ။

“ယၢမ်းလဵဝ် တီႈမိူင်းလႃးၼႆႉ ၶႂ်ႈဝႃႈ မီးလွင်ႈရူတ်ႉတမ်ၵၼ် ၵူႈဝၼ်းယဝ်ႉ။ ၵဵဝ်ႇၵပ်းလွင်ႈၼႆႉ ဢၼ်လႆႈလူႉတၢႆၵေႃႈမီး။ မၢတ်ႇ ၸဵပ်းၵေႃႈမီး။ ၵမ်ႈၼမ် ပဵၼ်ၵူၼ်းၸၢဝ်းၶႄႇ ဢၼ်လုၵ်ႉတၢင်းပုၼ်ႉသေ ၶဝ်မႃးႁဵတ်းၵၢၼ်တၢင်းၼႆႉ။ ပၼ်ႁႃ လွင်ႈရူတ်ႉၵႆႉ တမ်ၽႃႇၵၼ်ၼႆႉ တေပဵၼ်ယွၼ်ႉမဝ်းလဝ်ႈ။ ပူၼ်ႉမႃး သွင်ဝၼ်းၼႆႉ ဢူၺ်းၵေႃႉၶႃႈ ထုၵ်ႇၸဝ်ႈၼႃႈတီႈ ၸႂ်ႉပဝ်ႇတင်းႁႅင်းမဝ်း လဝ်ႈသေ ယွၼ်ႉမၼ်းၸၢႆးမဝ်းလႄႈ လႆႈထုၵ်ႇမႂ်ငိုၼ်းၶႄႇ 2,100 ယႂၼ်”- ၵူၼ်းပိုၼ်ႉတီႈ မိူင်းလႃး သိုပ်ႇလၢတ်ႈၼႄၼင်ႇၼႆ။

ဝဵင်းမိူင်းလႃးၼႆႉ မီးဝႆႉၸဵင်ႇႁွင်ႇဝၼ်းဢွၵ်ႇဝဵင်းၵဵင်းတုင် ယၢၼ်ဝဵင်းၵဵင်းတုင် 60 လၵ်းပၢႆ တိတ်းၸပ်းလႅၼ်လိၼ်မိူင်းၶႄႇ ၾၢႆႇ ဢွၵ်ႇ တိတ်းၸပ်းၼမ်ႉၶွင် ၶႅၼ်ႈမိူင်းလၢဝ်း။ ထိုင်မႃး ပီ 2008 ၼၼ်ႉ လႆႈထုၵ်ႇမၵ်းမၼ်ႈပဵၼ်ၼႃႈလိၼ်ၶိုၵ်ႉတွၼ်း မၢႆ (4) ၵႂႃႇ။ မီး ၸၢဝ်းၶိူဝ်း ယူႇႁူမ်ႈၵၼ် 13 ၸၢဝ်းၶိူဝ်း။ ယဝ်ႉၵေႃႈ ပဵၼ်ဝဵင်းလႅၼ်လိၼ်တႆး – ၶႄႇ ဝဵင်းၵႃႉၶၢႆ ၵေႃႈၸႂ်ႈ ၼႆယဝ်ႉ။