ၾႆးမႆႈဢွင်ႈတီႈၵဝ်ႇ ပၢင်တေႃႇလွင်း ၶွင်လူင်ထၢင် ပျီႇတူႉၸိတ်ႉ ဝဵင်းမူႇၸေႊ လွင်ႈၵူၼ်းမၢတ်ႇၸဵပ်းလူႉတၢႆ ဢမ်ႇမီး။
မိူဝ်ႈဝႃး ဝၼ်းတီႈ 27/2/2023 ယၢမ်းၵၢင်ၶမ်ႈမွၵ်ႈ 8 မူင်းၶိုင်ႈ ၾႆးမႆႈ ဢွင်ႈတီႈၵဝ်ႇ ပၢင်တေႃႇလွင်း ၶွင်လူင်ထၢၼ် ပျီႇတူႉ ၸိတ်ႉ တီႈၵွင်းလွႆ 45 ပွၵ်ႉၼိူဝ် ဝဵင်းမူႇၸေႊ လႅၼ်လိၼ်တႆး – ၶႄႇ ၸိုင်ႈတႆးပွတ်းႁွင်ႇ ။
ၵူၼ်းပိုၼ်ႉတီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ဢွင်ႈတီႈၼၼ်ႉ ပဵၼ်ဢွင်ႈတီႈၵဝ်ႇ ပၢင်တေႃႇလွင်း ပျီႇ တူႉၸိတ်ႉၶဝ်။ ပီၼႆႉ ႁၼ်မီးၵူၼ်းသိုၵ်းၶဝ် ပႂ်ႉၵူၺ်း ဢမ်ႇႁၼ်မီးပၢင်တေႃႇလွင်းသင်။ ဢၼ်မႆႈၵႂႃႇၼၼ်ႉ မႆႈၵႂႃႇႁွင်ႈၼိုင်ႈ ၵူၺ်း။ ၼႂ်းၵႄႈ ႁွင်ႈသဝ်း ၵူၼ်းႁဵတ်းၶဝ်ယူႇလႄႈ ႁွင်ႈယဵၼ် (အအေးခန်း) ၼၼ်ႉ။ လွင်ႈၵူၼ်းမၢတ်ႇ ၸဵပ်းလူႉတၢႆတႄႉ ဢမ်ႇ မီး။ ယဝ်ႉၵေႃႈ မႆႈၵႂႃႇသုမ်းၵႃႈႁိုဝ်တႄႉ ပႆႇႁူႉႁူဝ်ယွႆႈမၼ်း။ မိူဝ်ႈပီပူၼ်ႉၵေႃႈ မႆႈၵႂႃႇယဝ်ႉ ၵမ်း ၼိုင်ႈ ဢွင်ႈတီႈၼႆၵူၺ်း”- ဝႃႈၼႆ။
မႆႈယွၼ်ႉသင်ၸိူင်ႉႁိုဝ်တႄႉတႄႉဢမ်ႇလႆႈႁူႉတႅတ်ႈတေႃး။ ၾၢႆႇတၢင်းပၢင်တေႃႇလွင်းဝႃႈပဵၼ်ယွၼ်ႉၾႆးၾႃႉသျွတ်ႉဝႃႈၼႆသေတႃႉ ၵူၼ်းပိုၼ်ႉတီႈတႄႉလၢတ်ႈဝႃႈဝႆႉမဝ်မၢင် လွင်ႈၽိုၼ်းၾႆးၵူၺ်းႁိုဝ် ဝႃႈၼႆ။
ၵူၺ်းၵႃႈ ဢၼ်လႆႈလူႉသုမ်းမႆႈၵႂႃႇၸွမ်းၾႆးတႄႉ တေပဵၼ်ၽိူၼ်၊ ၶူဝ်းၸႂ်ႉတိုဝ်း ဢိတ်းဢွတ်း။ ဢမ်ႇပေႃးမီးလွင်ႈလူႉသုမ်းၼမ်။ ၾႆးဢမ်ႇမႆႈႁၢဝ်ႉႁႅင်းလႄႈ ၵူၼ်းသိုၵ်းၶဝ် ႁူမ်ႈၵၼ်ၶႄၾႆး ဢမ်ႇတၼ်းႁိုင်ၵေႃႈၾႆးမွတ်ႇၵႂႃႇဝႃႈၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 2 ပီပၢႆၼႆႉ ၾႆးၾႃႉ ဢမ်ႇမႃးမၢၼ်ႇ ပေႃးမႃးၵေႃႈ ႁႅင်းၾႆး ပုင်ႈၶိုၼ်ႈလူင်းႁႅင်းဝႆး လႄႈ ႁဵတ်းႁႂ်ႈၾႆးၾႃႉ ၵႆႉသျွတ်ႉ မႆႈႁိူၼ်းယေး ၵူၼ်းမိူင်း။ ယဝ်ႉၵေႃႈ မိူၼ်ၼင်ႇ မေႃႈႁုင်ၶဝ်ႈ၊ ႁုင်ၽၵ်း၊ မေႃႈတင်ႈၼမ်ႉမႆႈ၊ ၸၢၵ်ႈၸၼ်ၼမ်ႉ ၸိူဝ်းၼႆႉ ၵႆႉၵွႆ ဝႃႈၼႆ။
မိူဝ်ႈဝၼ်းတီႈ 14/1/2023 ၼၼ်ႉၵေႃႈ ၾႆးမႆႈႁိူၼ်းၵူၼ်းဝၢၼ်ႈပၢင်ႇၶမ်း ၸႄႈဝဵင်းမူႇၸေႊ လင်ၼိုင်ႈ ၼၼ်ႉၵေႃႈ မီးလွင်ႈ လူႉသုမ်းၼမ် လွင်ႈတုမ်ႉတိူဝ်ႉၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး။
ၶၢဝ်းတၢင်းလိူၼ်ပၢႆမႃးၼႆႉ တီႈဝဵင်းတူၼ်ႈတီးၵေႃႈ ၾႆးမႆႈႁိူၼ်းယေး ၵူၼ်းဝၢၼ်ႈ ဢမ်ႇယွမ်း 10 လင်ယဝ်ႉ။ ၵမ်ႈၼမ် တေ ပဵၼ် ယွၼ်ႉၾႆးၾႃႉသျွတ်ႉ။
ၵွပ်ႈၼႆလႄႈ ပေႃးတေၵႂႃႇတၢင်းၼွၵ်ႈၼႆ ႁႂ်ႈပိၵ်ႉမဵင်းၾႆးၾႃႉဝႆႉလီငၢမ်းယဝ်ႉ ၸင်ႇၵႂႃႇ။ ပိူင်ၼိုင်ႈ ပဵၼ်ၶၢဝ်းလိူၼ်သီႇလိူၼ်ႁႃႈ ၊ ပဵၼ်ၶၢဝ်းႁႅင်ႈၶၢဝ်းႁွင်လႄႈ ၸွမ်းႁိူၼ်းယေးၼႆႉ ႁႂ်ႈၵႅမ်ဝႆႉ တဝ်ႈမူၵ်ႇၶႄၾႆး၊ ႁၢင်ႈႁႅၼ်းဝႆႉ လဵၵ်း ၶေႃမွတ်ႇၾႆး ၸိူဝ်းၼႆႉ။ ယဝ်ႉၵေႃႈ လူဝ်ႇလႆႈသႂ်ႇၸႂ် ၾၢင်ႉၵၼ်ၼမ်ၼမ် ၸုမ်းၶႄၾႆး ၸႄႈဝဵင်း သင်ႇလၢတ်ႈပၼ်ၾၢင်ႉဝႆႉၼင်ႇ ၼႆ။
