ၵူၼ်းပၢႆႈၽေးသိုၵ်းတီႈဝဵင်းပၢင်လွင်း ၸိုင်ႈတႆးပွတ်းၸၢၼ်း ယၢပ်ႇၽိုတ်ႇလွင်ႈ ၶဝ်ႈၼမ်ႉတၢင်းၵိၼ် လႄႈတီႈယူႇတၼ်းသဝ်း ။
တႄႇမိူဝ်ႈဝႃး ဝၼ်းတီႈ 26/2/2023 ၵၢင်ဝၼ်း 12 မူင်း ထိုင် ဝၼ်းမိူဝ်ႈၼႆႉ သိုၵ်းမၢၼ်ႈယိုတ်းမိူင်းလႄႈ သိုၵ်း PDF ပဵၼ်ပၢင်တိုၵ်းၵၼ် ၾၢႆႇသိုၵ်းမၢၼ်ႈယိုတ်းမိူင်း လၢမ်းလိမ်းယိုဝ်းၵွင်ႈၶဝ်ႈၼႂ်းဢိူင်ႇၼႂ်းဝၢၼ်ႈ ၵူၼ်းမိူင်းလႆႈပၢႆႈသွၼ်ႈဝႆႉတီႈလွတ်ႈၽေး ထူပ်းတၢင်းယၢပ်ႇၽိုတ်ႇ ၶဝ်ႈၼမ်ႉတၢင်းၵိၼ်လႄႈ တီႈယူႇတၼ်းသဝ်း။
ၵူၼ်းပိုၼ်ႉတီႈဝဵင်းပၢင်လွင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈသိုၼ်းပုၼ်ႉ မၢၼ်ႈၶဝ် လၢမ်းလိမ်းယိုဝ်းမႃးၾၢႆႇတၢင်းၼႆႉဢေႃႈ တၢင်းလွႆၽြႃး(ၽြႃးတွင်ႇ) ပုၼ်ႉၵေႃႈ မၢၵ်ႇတူၵ်းသႂ်ႇယူႇၼႆ ၊ ယဝ်ႉၵေႃႈ ၵူၼ်းဝၢၼ်ႈလူင်ႈပႅၼ်ႈ( လုံးပျဉ် ) ၵေႃႈ လႆႈပၢႆႈဢေႃႈ။ ထိုင်မိူဝ်ႈလဵဝ်ၵေႃႈ ၵူၼ်းဝၢၼ်ႈၶဝ်ပႆႇႁၼ်ပွၵ်ႈႁိူၼ်းၶိုၼ်း တိုၵ်ႉယူႇသွၼ်ႈဝႆႉ တီႈႁိူၼ်းပီႈၼွင်ႉၽႂ်မၼ်းၼႆဝႃႈ ၵမ်ႈၽွင်ႈဢမ်ႇမီးႁိူၼ်းပီႈၼွင်ႉၵေႃႈ လႆႈယူႇၸွမ်းဝတ်ႉၸွမ်းၵျွင်းဢေႃႈ ” – ဝႃႈၼႆ။
မိူဝ်ႈဝၼ်းတီႈ 24/2/2023 ၼၼ်ႉၵေႃႈ ၾၢႆႇသိုၵ်း PDF ၶဝ်ႈလေႃႇတိုၵ်း သိုၵ်းမၢၼ်ႈ တီႈလၢၼ်ႇသိုၵ်းမၢၼ်ႈ ဢၼ်တင်ႈဝႆႉၼိူဝ်သဵၼ်ႈတၢင်းၵႂႃႇမႃး ဝၢၼ်ႈလူင်ႈပႅၼ်ႈ-ဝၢၼ်ႈၵေႃမႆႉသၢင်း တီႈႁိမ်းဝၢၼ်ႈသွင်းပျွင်း ၸႄႈဝဵင်းပၢင်လွင်း မၢၵ်ႇၵွင်ႈသိုၵ်းမၢၼ်ႈ တူၵ်းသႂ်ႇႁိူၼ်းၵူၼ်းဝၢၼ်ႈၵေႃမႆႉသၢင်း 4 လင်လႄႈ ၵူၼ်းဝၢၼ်ႈၸလူင်ႈၸၢၼ်း( တောင်စလုံး)လူႉတၢႆ ၼိုင်ႈၵေႃႉ ။မိူဝ်ႈလဵဝ်ၵေႃႈ ၾၢႆႇသိုၵ်းမၢၼ်ႈယိုတ်းမိူင်းထႅမ်ႁႅင်းသိုၵ်း တႃႇၵႃး 5 လမ်းသေ ငဝ်းလၢႆးတိုၵ်ႉၶဵင်ႈၶႅင်ၵၼ်ဝႆႉ ။
ဢိင်ၼိူဝ်လွင်ႈၼႆႉသေ ၵူၼ်းပိုၼ်ႉတီႈ ဝဵင်းပၢင်လွင်းလၢတ်ႈတီႈၽူႈတွႆႇႁွၵ်ႈဝႃႈ – “ တူၺ်းငဝ်းလၢႆးတႄႉ လႅပ်ႈတေၶဵင်ႈၶႅင်ၵၼ်ထႅင်ႈယူႇဢေႃႈ။ၶဝ်ထႅမ်ႁႅင်းသိုၵ်းထႅင်ႈ မွၵ်ႈ သီႇႁႃႈလမ်းၼႆႉဢေႃႈ ႁၼ်ၵႃးသိုၵ်းၶဝ်ၽႅတ်ႈၵႂႃႇတႄႉ” – ဝႃႈၼႆ။
ယွၼ်ႉသိုၵ်းမၢၼ်ႈ လၢမ်းလိမ်းယိုဝ်းၵွင်ႈလူင်ၵွင်ႈဢွၼ်ႇသႂ်ႇၼႂ်းဝၢၼ်ႈလႄႈ ၵူၼ်းမိူင်းလႆႈပၢႆႈ မွၵ်ႈ 3000 ပၢႆ ၵူၼ်းဝၢၼ်ႈၸိူဝ်းဢၼ်ဢမ်ႇၸၢင်ႈပၢႆႈၵႂႃႇတၢင်းလႂ်ၵေႃႈ ႁူဝ်ၼပ်ႉၵူၼ်းဢမ်ႇယွမ်းပၢၵ်ႇ မိူဝ်ႈလဵဝ်ပၢႆႈသွၼ်ႈဝႆႉယူႇတီႈဝတ်ႉၵျွင်းၽႂ်မၼ်းဝႆႉၸူဝ်ႈၶၢဝ်း ၾၢႆႇ Voice Of Pinlaung ဢွၵ်ႇဝႆႉၼင်ႇၼႆ။
ၵူၼ်းဝၢၼ်ႈၸိူဝ်းထူပ်းၽေးသိုၵ်းတီႈဝဵင်းပၢင်လွင်းၼႆႉ မီးလၢႆလၢႆဝၢၼ်ႈ မိူၼ်ၼင်ႇ ဝၢၼ်ႈၽြႃးလွႆ ၊ ဝၢၼ်ႈၵေႃမႆႉသၢင်း(တောင်မဲသင်း) ၊ ဝၢၼ်ႈလူင်ႈပႅၼ်ႈ(လုံးပျဉ်ရွာ) ၊ ဝၢၼ်ႈၼမ်ႉၼဵင်း(နန့်နိန်ရွာ) ၊ ၸလူင်ႈဝၢၼ်ႈၸၢၼ်း ၸဵမ်ၸိူဝ်းၼႆႉ။မိူဝ်ႈလဵဝ် ၵူၼ်းဝၢၼ်ႈလႆႈပူၵ်းၸွမ်ပိဝ်ၶၢဝ်သေ ႁိပ်ႈပၢႆႈဢွၵ်ႇၼွၵ်ႈဝၢၼ်ႈတင်းၼမ်တင်းလၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ