ၵူၼ်းဝဵင်းသႅၼ်ဝီ ၺႃးၵူၼ်းဢမ်ႇႁူႉၾၢႆႇ ဢဝ်မိတ်ႈငႃ ၸူၼ်ၸွမ်းတၢင်း လႆႈၵႂႃႇၶူဝ်းငိုၼ်းၶမ်း ၵမ်ႈၽွင်ႈ။

ႁၢင်လိူၼ်ၾႅပ်ႊပိဝ်ႊရီႊ 2022 ၼႆႉ ၽူႈယိင်း ၵေႃႉၼိုင်ႈ မီးၵူၼ်း ၶီႇရူတ်ႉၶိူင်ႈ လမ်းၸွမ်းလင်သေ ႁႄႉရူတ်ႉၵိုတ်းယဝ်ႉ ဢဝ်မိတ်ႈၸမ်ႈ ၸူၼ်တီႈႁိမ်းဝၢၼ်ႈႁူဝ်ၼွင် ၼိူဝ်သဵၼ်ႈတၢင်းလူင် သႅၼ်ဝီ – ၵုၼ်လူင် – ႁူဝ်ပၢင်ႇ ၼႂ်းၸႄႈဝဵင်းသႅၼ်ဝီ ၸိုင်ႈတႆး ပွတ်းႁွင်ႇ။

ၵူၼ်းၼုမ်ႇ ပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ ပီႈၶဝ်ၼႆႉ လုၵ်ႉတီႈဝဵင်းသေ တေပွၵ်ႈမိူဝ်းႁိူၼ်း တၢင်းၼမ်ႉၸလၢပ်ႈ တေပဵၼ်ယၢမ်းဝၢႆးဝၼ်း။ ထုၵ်ႇၽူႈၸၢႆး ၵူၼ်းႁၢႆႉၼၼ်ႉ ဢဝ်ရူတ်ႉၶိူင်ႈလမ်းၸွမ်းလင် ၵေႃႉၼိုင်ႈသေ ႁႄႉရူတ်ႉၵိုတ်းယဝ်ႉ ဢဝ်မိတ်ႈၸမ်ႈငႃ ၽူႈယိင်းသေ ၸူၼ်ဢဝ်ၵႂႃႇ ၾူၼ်း 1 လုၵ်ႈလႄႈ ၶမ်းဢိတ်းဢွတ်း တေမီးၵႃႈၶၼ်မွၵ်ႈႁိုဝ်တႄႉ ဢမ်ႇႁူႉ”- ဝႃႈၼႆ။

သဵၼ်ႈတၢင်းၼၼ်ႉ ပဵၼ်သဵၼ်ႈတၢင်းလူင် သႅၼ်ဝီ – ၵုၼ်လူင် – ႁူဝ်ပၢင်ႇ – သျိၼ်ႊသူၺ်ႊႁေႃႇ ဢၼ်ၵၢႆႇၸူးတၢင်း မိူင်းၶႄႇ ၸိူဝ်းၼၼ်ႉလႄႈ ၵူၼ်းပႅၵ်ႇၼႃႈလုၵ်ႉတၢင်းလိၼ်ထုင်ႉပဵင်း ၸိူဝ်းၼႆႉ မႃးယူႇၸွမ်းၶၢင်ႈတၢင်းလူင် ပဵၼ်မူႇပဵၼ်ၵွင် ပဵၼ်ပွတ်း ပဵၼ်ယွမ်ႇၵေႃႈၼမ်။

“မိူဝ်ႈလိူၼ်ပူၼ်ႉမႃးၼႆႉ ၽူႈယိင်းၵေႃႉၼိုင်ႈ ၼင်ႇၵဝ်ႇ ၶီႇရူတ်ႉၶိူင်ႈ လုၵ်ႉတၢင်းဝဵင်းသေ ပွၵ်ႈမိူဝ်းတၢင်းၼမ်ႉၸလၢပ်ႈၼၼ်ႉ ၼင်ႇၵဝ်ႇ ထုၵ်ႇၽူႈၸၢႆး ၵေႃႉၼိုင်ႈ ၶီႇရူတ်ႉၶိူင်ႈ လမ်းၸွမ်းလင်။ ၵူၺ်းၵႃႈ မၼ်းၼၢင်းၼႅတ်ႈႁေႃႈရူတ်ႉၶိူင်ႈဝႆးသေ တၢင်းပူၼ်ႉ လွတ်ႈၵႂႃႇ။ ၵူၼ်းၸူၼ်ၼၼ်ႉ ၵမ်ႈၼမ် ၶဝ်တေလမ်းၸူၼ် ၸိူဝ်းပဵၼ်ၼၢင်းယိင်း ၵႂႃႇမႃးႁင်းၵူၺ်း ၵေႃႉလဵဝ် ၸိူဝ်းၼႆႉ။ သဵၼ်ႈ တၢင်းၼၼ်ႉ ပဵၼ်သဵၼ်ႈတၢင်းၵႃႉၶၢႆ ၸူးတၢင်းမိူင်းၶႄႇလႄႈ ၸဵမ်ၵူၼ်းထုင်ႉပဵင်း၊ ၵူၼ်းသူႇသမ်းၵိၼ်ယႃႈ ၸိူဝ်းၼႆႉ ယူႇဝႆႉ ပဵၼ် ပွတ်းပဵၼ်ယွမ်ႇၵေႃႈၼမ်”- ၵူၼ်းၼုမ်ႇ ပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈ ၼႄၼင်ႇၼႆ။

မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 20/2/2023 ယၢမ်းၵၢင်ၼႂ် ၵူၼ်းၶၢႆၶမ်း သွင်မႄႈလုၵ်ႈ ၵူၼ်းဝၢၼ်ႈၸေႊႁႆး တေၵႂႃႇၶၢႆ ၶမ်း ၼႂ်းဝၼ်းၵၢတ်ႇ ဝၢၼ်ႈဝဵင်းလူင် တီႈထုင်ႉလွႆႁူဝ်သိူဝ်ၼၼ်ႉသေ ၺႃးၸူၼ်ၸွမ်းတၢင်း တီႈႁိမ်းဝၢၼ်ႈႁိၼ်လူင် ၼႂ်းၸႄႈဝဵင်း ၼမ်ႉၶမ်း ၸႄႈတွၼ်ႈမူႇၸေႊ ၼၼ်ႉၵေႃႈ လႆႈၵႂႃႇငိုၼ်းဢမ်ႇယွမ်း 100 သႅၼ်ပျႃးလႄႈ ၶမ်းထႅင်ႈ တင်း ၼမ်။

ဝၢႆးသိုၵ်းမၢၼ်ႈ ယိုတ်းမိူင်းမႃး 2 ပီၼႆႉ တင်ႈၸႂ် ပွႆႇပၢင်တေႃႇလွင်း ၼႂ်းမိူင်းတႆး လိူင်ႇၽႄႈၼမ် ႁဵတ်းႁႂ်ႈၵူၼ်းမိူင်း/ ၵူၼ်းၼုမ်ႇ ၼႂ်းပိုၼ်ႉတီႈ ဢွၼ်ၵၼ်ဢၵျၢင်ႉတၢင်းယၢမ်ႈလူႉ၊ ၽူႈလၵ်ႉၸၵ်ႉၶုတ်ႈ၊ ယႃႈမဝ်းၵမ် လိူင်ႇၼမ်မႃး လိူဝ်ႇၵဝ်ႇ။