လုၵ်ႈဢွၼ်ႇ ယူႇပွၵ်ႉ 2 ဝဵင်းတၢင်ႉယၢၼ်း ၶုတ်းႁူဝ်မၼ်း သမ်ႉၶုတ်းၺႃးမၢၵ်ႇမႅင်းၾင်လိၼ်လႄႈတႅၵ်ႇတိူဝ်ႉသႂ်ႇ မၢတ်ႇၸဵပ်းလိူဝ်ႁႅင်းၵေႃႉၼိုင်ႈ တၢႆထင်တီႈၵေႃႉၼိုင်ႈ။
ဝၼ်းတီႈ 17/02/2023 လုၵ်ႈဢွၼ်ႇၸၢႆး 2 ၵေႃႉပီႈၼွင်ႉ ယူႇပွၵ်ႉ 2 တၢင်ႉယၢၼ်း ၵႂႃႇၶုၼ်းမၼ်းတီႈလႅၼ်သူၼ် ၶုတ်းၺႃးမၢၵ်ႇမႅင်းၾင်လိၼ်တႅၵ်ႇတိူဝ်ႉသႂ်ႇ၊ ၵေႃႉယႂ်ႇ မၢတ်ႇၸဵပ်းတီႈၶႃလႄႈဢူၵ်း ႁဵတ်းႁႂ်ႈတၢႆထင်တီႈ။ ၵေႃႉလဵၵ်ႉတႄႉတိူဝ်ႉႁိမ်းဢႅဝ် ဢမ်ႇပေႃးမၢတ်ႇႁႅင်း၊ ယၢမ်းလဵဝ် ယူတ်းယႃတူဝ်ဝႆႉတီႈႁူင်းယႃ ဝဵင်းတၢင်ႉယၢၼ်း။
လွင်ႈၾင်မၢၵ်ႇမႅင်းႁိမ်းလႅၼ်သူၼ်လႅၼ်ဝၢၼ်ႈၼႆႉပဵၼ်ၽေးတေႃႇ ၵူၼ်းဝၢၼ်ႈၵမ်းသိုဝ်ႈလႄႈ ႁဵတ်းႁႂ်ႈၵူၼ်းဝၢၼ်ႈတူၵ်းၸႂ် မႆႈၸႂ် ဢွၼ်ၵၼ်တုၵ်းယွၼ်းႁႂ်ႈၸုမ်းဝၢင်းမၢၵ်ႇ မႃးၽဵဝ်ႈပၼ်ၶိုၼ်းၽႂ်းၽႂ်း ဝႃႈၼႆ။
ၽူႈၵွၼ်းပွၵ်ႉ ဝဵင်းတၢင်ႉယၢၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ-“လီမႆႈၸႂ်လွင်ႈႁူမ်ႇလူမ်ႈတႄႉတႄႉဢေႃႈ။ ဢမ်ႇႁူႉဝႃႈပဵၼ်ၽႂ်ၸုမ်းလႂ်မႃးၾင်ဝႆႉ။ ၵႂႃႇသူၼ်ၵႂႃႇႁိူၵ်ႈၵေႃႈဢမ်ႇလွတ်ႈၽေးသေဢိတ်းယဝ်ႉၶႃႈလူးပေႃးမိူၼ်ၼႆ။ တေႃႈၼင်ႇႁိမ်းဝၢၼ်ႈႁိမ်းဝဵင်းၶဝ်ယင်းမႃးၾင်ၼႆတႄႉ တၢင်ႇတီႈ ၼႂ်းသူၼ်ၼႂ်းထိူၼ်ႇ ယိင်ႈၶႅၼ်းတေမီးၼမ်ၵႃႈႁိုဝ်။ မဵဝ်းႁဝ်းဢမ်ႇႁၼ်ဢမ်ႇႁူႉလႆႈၵမ်းလဵဝ်ၶႃႈၼေႃႈ ။ ၵွပ်ႈၼႆ ယွၼ်းမဵတ်ႉတႃႇႁႂ်ႈဢွၼ်ၵၼ်ၽဵဝ်ႈပၼ်ၶိုၼ်းသေၵမ်းၼႆဢေႃႈ” ဝႃႈၼႆ။
ၼႂ်းၸႄႈဝဵင်းတၢင်ႉယၢၼ်းၼႆႉမီးၸုမ်းသိုၵ်းတဢၢင်း TNLA ပႃႇတီႇမႂ်ႇသုင်ၸိုင်ႈတႆး SSPP လႄႈ ၸုမ်းသိုၵ်းၵူၼ်းမိူင်း ပျီႇတူႉၸိတ်ႉ ဢိၵ်ႇပႃးတင်း သိုၵ်းမၢၼ်ႈ ၸိူဝ်းၼႆႉ တူင်ႉၼိုင်ၵႂႃႇမႃးယူႇသဝ်းဝႆႉ။
ဢိင်ၼိူဝ်ၸုမ်းယိပ်းၵွင်ႈၵၢင်ႇၼႂ်းပိုၼ်ႉတီႈၼႃႈလိၼ် ႁိမ်တီႈယူႇၵၼ်သေ ၼႂ်းၶၢဝ်းတၢင်း 14 ပီမႃးၼႆႉ MIMU ၸုမ်းၵဵပ်းၶေႃႈမုၼ်း ၵဵဝ်ႇၵပ်းမၢၵ်ႇမႅင်းၾင်လိၼ် ၼႂ်းမိူင်းမၢၼ်ႈ ႁုပ်ႈႁူဝ်ၼပ်ႉသေပိုၼ်ၽၢဝ်ႇဝႃႈ ဢၼ်ၺႃးၽေးမၢၵ်ႇမႅင်းၾင်လိၼ်သေ ၵူၼ်းမိူင်းမၢတ်ႇၸဵပ်းလူႉတၢႆၼႆႉ မိူင်းတႆးၼမ်လိူဝ်ပိူၼ်ႈသုတ်း။ မီး 27.48 % ၶွင်ပတ်းပိုၼ်ႉၸိုင်ႈမိူင်း။ ဢၼ်ၺႃးမၢၵ်ႇမႅင်းၾင်လိၼ်ၼမ်သုတ်းၼႆႉပဵၼ်တီႈၼႂ်းၸႄႈဝဵင်း သီႇပေႃႉ ၊ ၵျွၵ်ႉမႄး၊ ၼွင်ၶဵဝ် လႄႈ မၢၼ်ႈတူင်ႈ ၵူတ်ႉၶၢႆ ၸိူဝ်းၼႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ