လုၵ်ႈလၢင်းၼၢင်းမေးဢိၵ်ႇပႃးတင်း ၽူႈႁၵ့်ၸိူဝ့်ၸၢတ်ႈလႄႈပီႈၼွင့်ဝၢၼ်ႈပဵင်းလူင် ဝဵင်းႁႅင်ၸိုင်ႈထႆး တေႁူမ်ႈၵၼ် ၸတ်းႁဵတ်း ပၢင်လူႇတၢၼ်း ထႃႇပၼႃႇတဝ်ႈၽဝ်ႇလုပ်ႇၸဝ်ႈၼွႆႉသေႃးယၼ်ႇတ သႂ်ႇၶုမ်ၵုတ်းမၼ်းၸဝ်ႈ တီႈဝၢၼ်ႈ ၵုင်းၵျေႃႇ ၼႂ်းဝၼ်းတီႈ 26/2/2023 တေထိုင်ၼႆႉ ။
ၼႂ်းၶပ့်မၢႆပၢင်လူႇတၢၼ်းၼၼ့် မီးဝႆ့ဝႃႈ တႄႇၶၢဝ်းယၢမ်းၵၢင်ၼႂ် 8 မူင်း(ၶၢဝ်းယၢမ်းမိူင်းထႆး)ၼၼ့် ၶႅၵ်ႇပီႈၼွင့်တီႈ ၸမ် တီႈၵႆ မႃးႁူမ်ႈၵၼ်တီႈမၢႆၵိုမ်းၸဝ်ႈၼွႆႉ တီႈဝၢၼ်ႈၵုင်းၵျေႃႇ ။ 8 မူင်းၶိုင်ၼၼ့် သင်ႇၶၸဝ်ႈလႄႈ ၽူႈယႂ်ႇၵူၼ်းလူင် ဢဝ်တီႈယူႇ၊ ပေႃးထိုင်မႃး 8 မူင်း 45 မိၼိတ့်ၼၼ့် ၸဝ်ႈၼႃႈတီႈ တေဢဝ်လုပ်ႇၸဝ်ႈၼွႆႉမႃးထိုင်။
တႄႇၶၢဝ်းယၢမ်း 9 မူင်းၵႂႃႇၼၼ့် တေမီးလၢႆလၢႆၶၵ့်တွၼ်ႈ မိူၼ်ၼင်ႇ ၶပ်းမၢႆလူႇတၢၼ်းၽႃႈပင်ႉသၵူႇ 10 ၽိုၼ်၊ ဢၢၼ်ႇ ပိုၼ်းၵႅပ်ႈၸဝ်ႈၼွႆႉသေႃးယၼ်ႇတ ၾၢႆႇတႆး ၾၢႆႇထႆး ၊ ၶပ့်မၢႆဢဝ်လုပ်ႇၸဝ်ႈၼွႆႉထႃႇပၼႃႇၼႂ်းတီႈမၢႆၵိုမ်းၸဝ်ႈၼွႆႉ ၊ မႄႈၶၢဝ်လူႇ(ၵေႃ့ပဵၼ်မေးၼၢင်းၸဝ်ႈၼွႆႉ)လႄႈ ၽူႈယႂ်ႇၵူၼ်းလူင်ၵမ်ႈၽွင်ႈ မွၵ်ႇလၢတ်ႈၶေႃႈၵႂၢမ်း။ဝၢႆးၼၼ့် ၵၢပ်ႈသွမ်း လဵင့်လူၶႅၵ်ႇပီႈၼွင့်ၸမ်ၵႆ။
ၽွင်တဝ်ႈလုပ်ႇ ၸဝ်ႈၼွႆႉသေႃးယၼ်ႇတၼႆႉ ယၢမ်းလဵဝ် မီးဝႆႉတီႈ ၸၢႆးသႅင်မိူင်း မင်းၵွၼ်း (လုၵ်ႈၸၢႆး ၵေႃႉလဵၵ်ႉသုတ်း ၸဝ်ႈၼွႆႉ) ဢၼ်ပဵၼ်ၸဝ်ႈၶွင်လႄႈ ၽူႈၵေႃႇတင်ႈႁူင်းပွႆႇသဵင် FM 99 ဢၼ်ပွႆႇဢွၵ်ႇသဵင်တႆး တွၼ်ႈတႃႇပီႈၼွင်ႉ ႁႅင်းၵၢၼ် တႆးယၢၼ်မိူင်း ဝဵင်းၵဵင်းမႆႇ။
ၸၢႆးသႅင်မိူင်း မင်းၵွၼ်း လုၵ်ႈၸၢႆး ၸဝ်ႈၼွႆႉ (သေႃးယၼ်ႇတ) လၢတ်ႈတီႈၽူႈတွႆႇႁွၵ်ႈဝႃႈ – “ဝၢႆးသေ ပေႃႈႁဝ်းၶႃႈ လူႉ ၵႂႃႇၼႆႉ လုပ်ႇပေႃႈႁဝ်းၶႃႈ လႆႈၽႄၵႂႃႇတၢင်းသၢႆပီႈသၢႆၼွင်ႉ တၢင်းမိူင်းဝၼ်း ဢၼ်မီးယူႇဝႆႉ ၼႂ်းမိူင်းၶႄႇ ယၢမ်းလဵဝ်ၼႆႉ ပုၼ်ႈၼိုင်ႈ။ ယဝ်ႉၵေႃႈ ဢၼ်မီးတီႈ လုၵ်ႈလၢင်းၼၢင်းမေး တီႈႁဝ်းၶႃႈၼႆႉ ပုၼ်ႈၼိုင်ႈ။ ဢၼ်မီးတီႈႁဝ်းၶႃႈၼႆႉ ပေႃးထိုင်မႃး ဝၼ်းတီႈ 26 လိူၼ်ၼႆႉ တေဢဝ်တဝ်ႈလုပ်ႇပေႃႈႁဝ်း မိူဝ်းၾင်ဝႆႉတီႈ ဝၢၼ်ႈၵုင်းၵျေႃႇယဝ်ႉၶႃႈ”- ဝႃႈၼႆ။
သင်ဝႃႈ ၸဝ်ႈလႂ် ၽူႈမီးၼမ်ႉၸႂ်ၸေႇတႃႇၼ ၶႂ်ႈၵမ်ႉၸွႆႈထႅမ်လူႇတၢၼ်း ဢွင်ႈတီႈမၢႆၵိုမ်း ၸဝ်ႈၼွႆႉ ၼႆၸိုင် ၵပ်းသိုပ်ႇတွင်ႈ ထၢမ် လႆႈတီႈ ၸၢႆးၵမ်ႇ ၵေႃႇမတီႇဝၢၼ်ႈပဵင်းလူင် မၢႆၾူၼ်း(ထႆး) 0987864953 (ဢမ်ႇၼၼ်) ၶႂ်ႈပဵၼ်ၸဝ်ႈတႃႇ ၼၵမ်ႉၸွႆႈ ငိုၼ်းတွင်းၼႆၸိုင် ဢူၼ်းလႆႈတီႈယေးငိုၼ်း (ပၢၼ်ႇ/ BANK) (ธกส) မၢႆယေးငိုၼ်း – 020194564276 ၊ မၢႆ ၸိုဝ်ႈယေးငိုၼ်း – สร้างอนุสรณ์สถานเจ้าน้อย (ซอหยั่นต๊ะ)။
ၸဝ်ႈၼွႆႉသေႃးယၼ်ႇတၼႆႉ ၵိူတ်ႇမိူဝ်ႈလိူၼ်ၵမ်မႂ်ႇ 10 ၶမ်ႈ ပီၶရိတ်ႉ 1927 ၼီႈ၊ တီႈမိူင်းမွၵ်ႇၶၢဝ်မၢဝ်းလူင်၊ မိူင်းမၢဝ်းလူင်၊ ႁိမ်းလႅၼ်လိၼ် မိူင်းၶႄႇ ယၢမ်းလဵဝ်။ မၼ်းၸဝ်ႈဢွၼ်ဢဝ်ၵူၼ်းၼုမ်ႇတႆး 30 ၸဝ်ႈ(ႁူမ်ႈပႃးမၼ်းၸဝ်ႈ ပဵၼ် 31) ၵိၼ်ၼမ်ႉသတ်ႉၸႃႇ တႄႇၵၢၼ်လုၵ်ႉၽိုၼ်ႉ တႃႇဢဝ်လွင်ႈလွတ်ႈလႅဝ်းသဝ်းၶေႃၸိုင်ႈတႆး တႂ်ႈမိုဝ်းသိုၵ်းမၢၼ်ႈၸဵမ်မိူဝ်ႈပီ 1958။ လႄႈလႆႈဝႃႈ ပဵၼ်ၸဝ်ႈပေႃႈတႃႇၵၢၼ်လုၵ်ႉၽိုၼ်ႉၵွပ်ႇၵူႈၸိူဝ်ႉၸၢတ်ႈၸိုင်ႈတႆး ။ ၸဝ်ႈသဵင်ႈသုတ်းမုၼ် မိူဝ်ႈဝၼ်းတီႈ 14/11/1996 ၽွင်းဢႃယုၸဝ်ႈ 69 ပီ ၊ လပ်ႉလွႆငိုၼ်းလွႆၶမ်းၵႂႃႇ တီႈဝဵင်း ၵဵင်းမႆႇ၊ ၶၢပ်ႈတူဝ်ၸဝ်ႈ ဝႆႉတီႈဝတ်ႉပႃႇပဝ်ႈသေ ပူၼ်ႉၶၢပ်ႈတူဝ် တီႈပႃႇႁဵဝ်ႈ သၼ်ႇတိထမ်း ဢိူင်ႇသီၽုမ်း ၼႂ်းတူဝ်မိူင်းၵဵင်းမႆႇ။
