ၶွင်ႇသီႇသိုၵ်းမၢၼ်ႈ ယိုတ်းမိူင်း ပိုၼ်ၽၢဝ်ႇ ၵိုတ်းတိုၵ်းပတ်းပိုၼ်ႉ တူဝ်ႈမိူင်းတႃႇၶၢဝ်းတၢင်း 1 ပီ ဝႃႈၼႆသေတႃႉ ၼႂ်းၸိုင်ႈတႆး ပွတ်းႁွင်ႇသမ်ႉ ႁႅၼ်းသိုၵ်းလေႃႇတိုၵ်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းမႃးၶိူဝ်းယႂ်းသေဢမ်ႇၵႃး ၸႂ်ႉၶိူင်ႈမိၼ်ယိုဝ်းၸွႆႈထႅင်ႈ ႁၢဝ်ႈႁႅင်း။

မိူဝ်ႈဝႃး ဝၼ်းတီႈ 20/2/2023 ယၢမ်းၵၢင်ၼႂ် 8 မူင်း ထိုင် 3 မူင်းဝၢႆးဝၼ်း ၶွင်ႇသီႇသိုၵ်းမၢၼ်ႈ ယိုတ်းမိူင်း တပ်ႉၵွင် 114 , 115 ဢဵၼ်ႁႅင်း 150 ၵေႃႉ ႁူမ်ႈလူၺ်ႈၶိူင်ႈမိၼ် 2 လမ်း လေႃႇတိုၵ်း ၸုမ်းၵႅတ်ႇၶႄၵူၼ်းမိူင်း PDF လႄႈ သိုၵ်းတဢၢင်း TNLA တီႈႁိမ်းဝၢၼ်ႈၽူၺ်းၶႅင်း ဢိူင်ႇသီႇၶူႈ ၾၢႆႇၸၢၼ်း ဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၼႆယဝ်ႉ။

ၽူႈတူင်ႉၼိုင် ၵၢၼ်သိုၵ်း တၢင်းပွတ်းတွၼ်ႈၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း ၸွႆႈယိုဝ်း ႁၢဝ်ႈႁႅင်း 2 လမ်း ဢဵၼ်ႁႅင်းၶဝ် တေမီး 150 ၵေႃႉ။ PDF တင်း TNLA သမ်ႉ ဢဵၼ်ႁႅင်းတေမီး မွၵ်ႈ 300 ၼႆႉ။ ပၢင်တိုၵ်းတႄႇပဵၼ် 8 မူင်းၵၢင်ၼႂ် ထိုင် 3 မူင်းဝၢႆးဝၼ်း သဵင်ၵွင်ႈၸင်ႇတေယဵၼ်။ လွင်ႈမၢတ်ႇၸဵပ်း လူႉတၢႆတင်းသွင်ၾၢႆႇ တႄႉပႆႇႁူႉ”- ဝႃႈၼႆ။

မိူၼ်ၼႆၼင်ႇၵဝ်ႇ မိူဝ်ႈဝႃး ဝၼ်းတီႈ 20 ယၢမ်းၵၢင်ၼႂ် 7 မူင်း ထိုင် 10 မူင်ၵၢင်ၼႂ် ၶွင်ႇသီႇသိုၵ်းမၢၼ်ႈ ယိုတ်းမိူင်း ၸၵၶ 16 တင်း ၶလယ 68 ဢဵၼ်ႁႅင်းမွၵ်ႈ 60 ႁႅၼ်းသိုၵ်းလေႃႇတိုၵ်း တပ်ႉသိုၵ်းတဢၢင်း TNLA တၢင်းဝၢၼ်ႈၼမ်ႉၶုမ် ၼႂ်း ၸႄႈဝဵင်း ၵျွၵ်ႉမႄး ၾၢႆႇသိုၵ်းမၢၼ်ႈ တၢႆ 15 ၵေႃႉ၊ မၢတ်ႇၸဵပ်း 5 ၵေႃႉ။ ယဝ်ႉၵေႃႈ ယိုတ်းလႆႈ ၶိူင်ႈၵွင်ႈၵၢင်ႇလႄႈ မၢၵ်ႉမိုဝ်ႉၸိုၼ်းယၢမ်း ၶွင်သိုၵ်းမၢၼ်ႈထႅင်ႈ။ ၼႂ်းပၢင်တိုၵ်းၼၼ်ႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်လေႃႇတိုၵ်းထႅင်ႈ လၢႆၵမ်း။

ၶွင်ႇသီႇသိုၵ်းမၢၼ်ႈ ယိုတ်းမိူင်းၼႆႉ ပိုၼ်ၽၢဝ်ႇ ၵိုတ်းတိုၵ်းပတ်းပိုၼ်ႉတူဝ်ႈမိူင်း တႄႇဢဝ် ဝၼ်းတီႈ 1/1/2023 ၼၼ်ႉမႃး တေႃႇထိုင် 31/12/2023 တႃႇၶၢဝ်းတၢင်း 1 ပီ ဝႃႈၼႆဝႆႉ။ မိူဝ်ႈဝၼ်းတီႈ 10 ယၢမ်းၵၢင်ၼႂ် 5 မူင်းၶိုင်ႈ သိုၵ်းမၢၼ်ႈ လေႃႇတိုၵ်း ၸုမ်း PDF, TNLA, KIA တၢင်းဝၢၼ်ႈလူင်ၶၢၼ် ဢိူင်ႇၶိူဝ်းၼိမ်း ၸႄႈဝဵင်းၼွင်ၶဵဝ် ႁၢဝ်ႈႁႅင်း ယဝ်ႉၵေႃႈ ၸႂ်ႉပႃးၶိူင်ႈမိၼ် တိုၵ်းၸွႆႈထႅင်ႈ 3 လမ်း။ တုမ်ႉတိူဝ်ႈႁိူၼ်းၵူၼ်းဝၢၼ်ႈ လူႉၵွႆ 2 လင်။ ဝတ်ႉဝၢၼ်ႈလူင်ၶၢၼ် လူႉၵွႆၸွမ်းထႅင်ႈတင်းၼမ်။

ယဝ်ႉၵေႃႈ ၵူၼ်းမိူင်းၼႂ်းဢိူင်ႇၶိူဝ်းၼိမ်း လႆႈပၢႆႈၽေးသိုၵ်း ဢမ်ႇယွမ်း 500 ၵေႃႉ။ ႁိူၼ်းယေးၵူၼ်းဝၢၼ်ႈ ထုၵ်ႇသွၵ်ႈတဝ် တင်းၼမ်။ သိုၵ်းမၢၼ်ႈ တီႉဢဝ်ၵူၼ်းဝၢၼ်ႈ ၽူႈၸၢႆးၵႂႃႇ 7 ၵေႃႉ။ ၼႂ်းၼၼ်ႉ ယိုဝ်းတၢႆပႅတ်ႈၵေႃႉၼိုင်ႈ။ ယဝ်ႉၵေႃႈ ဢဝ်ၾႆး ၸုတ်ႇၽဝ် သူၼ်ဢွႆႈ ၵူၼ်းဝၢၼ်ႈၼႂ်းမႅင်း လူႉသုမ်း ဢမ်ႇယွမ်း 15 ဢေႊၶိူဝ်ႊ။

ထိုင်မႃး ဝၼ်းတီႈ 13-15/2/2023 သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း KIA ၼႂ်းၵႄႈဝၢၼ်ႈၶူဝ်မုင်းလႄႈ ၼမ်ႉၽၵ်းၵႃ ၼႂ်း ၸႄႈဝဵင်းၵူတ်ႉၶၢႆထႅင်ႈ ၼၼ်ႉၵေႃႈ ၸႂ်ႉၶိူင်ႈမိၼ်ယိုဝ်းၸွႆႈႁၢဝ်ႈႁႅင်း။ မိူဝ်ႈဝႃး ဝၼ်းတီႈ 20 သမ်ႉ ႁႅၼ်းသိုၵ်းလေႃႇတိုၵ်း သိုၵ်း ၶၢင်ထႅင်ႈ ၼႂ်းၵႄႈ ဝၢၼ်ႈၼမ်ႉတဝ်း – မိူင်းပေႃႈ ဝဵင်းပၢင်ႇသၢႆး ၸႄႈဝဵင်းမူႇၸေႊ လႅၼ်လိၼ်တႆး – ၶႄႇထႅင်ႈ ၼႆယဝ်ႉ။