ၵူၼ်းၶၢႆၶမ်း သွင်မႄႈလုၵ်ႈ ဝဵင်းၼမ်ႉၶမ်း ၺႃးၸူၼ်ၸွမ်းတၢင်း သုမ်းငိုၼ်းၼပ်ႉႁူဝ်ပၢၵ်ႇသႅၼ် ၵေႃႉပဵၼ်လုၵ်ႈယိင်း တိူဝ်ႉၺႃးမၢၵ်ႇၵွင်ႈတီႈတိၼ် လႆႈသူင်ႇယူတ်းယႃတူဝ် ဝႆႉတီႈႁူင်းယႃလူင်ဝဵင်းၼမ်ႉၶမ်း။

မိူဝ်ႈဝႃး ဝၼ်းတီႈ 20/2/2023 ယၢမ်းၵၢင်ၼႂ် ၵူၼ်းၶၢႆၶမ်း သွင်မႄႈလုၵ်ႈ ၵူၼ်းဝၢၼ်ႈၸေႊႁႆး တေၵႂႃႇၶၢႆၶမ်း ၼႂ်းဝၼ်းၵၢတ်ႇ ဝၢၼ်ႈဝဵင်းလူင် တီႈထုင်ႉလွႆႁူဝ်သိူဝ် ၺႃးၸူၼ်ၸွမ်းတၢင်း တီႈႁိမ်းဝၢၼ်ႈႁိၼ်လူင် ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ။

ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းၸူၼ်ၼႆႉ ပဵၼ်ၽူႈၸၢႆး ပႃးၵွင်ႈလဝ်းၼိုင်ႈ ၶီႇရူတ်ႉၶိူင်ႈမႃး ၸွမ်းလင် သႂ်ႇၶူဝ်းၵူၼ်းႁိူၼ်း လၢတ်ႈၵႂၢမ်းမၢၼ်ႈ။ သွင်မေႈလုၵ်ႈသမ်ႉ ၶီႇရူတ်ႉၶိူင်ႈသွၼ်ႉၵၼ် တေၵႂႃႇၶၢႆၶမ်း တီႈဝၼ်းၵၢတ်ႇ ဝၢၼ်ႈဝဵင်းလူင်။ ဝၼ်းၼၼ်ႉ ယွၼ်ႉသင်လႄႈ သွင်မႄႈလုၵ်ႈ သမ်ႉၶီႇရူတ်ႉၶိူင်ႈၵႂႃႇၵေႃႈဢမ်ႇႁူႉ၊ ၵႃးၶဝ်ၵွႆႁႃႉၵေႃႈ ဢမ်ႇႁူႉ။ လႆႈႁူႉဝႃႈ ၸူၼ်ၼၼ်ႉလႆႈ ငိုၼ်းၵႂႃႇ ဢမ်ႇယွမ်း 100 သႅၼ်။ ၶမ်းသမ်ႉ ဢၼ်သႂ်ႇၼႂ်းထူင်ၶဝ်ဝႆႉၼၼ်ႉပႃးၵႂႃႇၸွမ်း တႃႇၵႃႈၶၼ် ၼပ်ႉႁူဝ်ပၢၵ်ႇသႅၼ်ပျႃးၼင်ႇၵဝ်ႇ။ တင်းမူတ်း သုမ်းၵႂႃႇၵႃႈႁိုဝ်တႄႉ ဢၼ်ဝႃႈၼၼ်ႉ ဢမ်ႇလႆႈႁူႉတႅတ်ႈတေႃး။ ၵေႃႉပဵၼ်လုၵ်ႈယိင်း ၼၢင်းၽွင်ၼူၼ်းတႄႉ ၸူၼ်ယိုဝ်းလႄႈ မၢၵ်ႇၵွင်ႈတိူဝ်ႉၺႃးတီႈၶႃသေ ယၢမ်းလဵဝ် လႆႈသူင်ႇယူတ်းယႃဝႆႉတီႈ ႁူင်းယႃၼမ်ႉၶမ်း”- ဝႃႈၼႆ။

ၵူၼ်းၸူၼ်ၼၼ်ႉ ပဵၼ်ၽႂ် ၸုမ်းလႂ် ၼမ်ႉမိုဝ်းၽႂ်ႁဵတ်း ဢၼ်ဝႃႈၼၼ်ႉ ပႆႇႁူႉၵေႃႉမၼ်း ဝႃႈၼႆ။

ဢွင်ႈတီႈၶဝ်မႄႈလုၵ်ႈၺႃးၸူၼ်ၼၼ်ႉသမ်ႉ ပဵၼ်ႁိမ်းဝၢၼ်ႈႁိၼ်လူင် တီႈႁိမ်းႁွမ်းၼၼ်ႉ မီးဝႆႉတပ်ႉသိုၵ်းမၢၼ်ႈ ပၵ်းယူႇဝႆႉ သွင်တပ်ႉ။ တပ်ႉၼိုင်ႈ ပၵ်းဝႆႉတီႈၶူဝ်ၼမ်ႉမၢဝ်း (ၶူဝ်ၸိူၵ်ႈ) ဢၼ်လုၵ်ႉတၢင်းၼမ်ႉၶမ်း ၶၢမ်ႈၵႂႃႇတၢင်း ထုင်ႉလွႆႁူဝ်သိူဝ် ၼႂ်းၸႄႈမိူင်းၶၢင်။ ထႅင်ႈတပ်ႉၼိုင်ႈသမ်ႉ ပၵ်းဝႆႉတီႈ ဝၢၼ်ႈႁၢင်ၵၢမ်း ၼႂ်းဝဵင်းၼမ်ႉၶမ်း။ ၼႂ်းၵႄႈ ၶူဝ်ၼမ်ႉမၢဝ်းတင်း ဝၢၼ်ႈႁၢင်ၵၢမ်းၼႆႉ မီးဝႆႉ ဝၢၼ်ႈ ႁိၼ်လူင်။

“မိူဝ်ႈလဵဝ် တီႈၼမ်ႉၶမ်းၼႆႉ ဢမ်ႇမီးလွင်ႈႁူမ်ႇလူမ်ႈ ဢုၼ်ႇၸႂ်သင်သေဢိတ်းယဝ်ႉ။ ၸုမ်းယိပ်းၵွင်ႈၵၢင်ႇၵေႃႈၼမ်ၼႃႇဢႃးလႃး။ သိုၵ်းမၢၼ်ႈ၊ သိုၵ်းလွႆ၊ သိုၵ်းၶၢင်၊ သိုၵ်းတႆး ၸိူဝ်းၼႆႉ ၸုမ်းလႂ်ၵေႃႈ ဢမ်ႇမႃးဢဝ်လွင်ႈႁူမ်ႇလူမ်ႈသင်ပၼ်ၵူၼ်းမိူင်း။ ပူၼ်ႉမႃး ပႆႇႁိုင်ၼႆႉ သိုၵ်းမၢၼ်ႈ ဢၼ်ပၵ်းဝႆႉတီႈႁိမ်းၼၼ်ႉၵူၺ်း ၶဝ်ယင်းပၢႆလွၵ်ႇငိုတ်ႈယွၼ်းငိုၼ်းၵူၼ်းၵႂႃႇမႃးထႅင်ႈလူးၵွၼ်ႇ”- ၵူၼ်းပိုၼ်ႉတီႈ ဝဵင်းၼမ်ႉၶမ်း သိုပ်ႇလၢတ်ႈၼင်ႇၼႆ။

ၵၢတ်ႇဝၢၼ်ႈဝဵင်းလူင်ၼႆႉ တေယူႇဝႆႉၼႂ်းထုင်ႉလွႆႁူဝ်သိူဝ် ၸႄႈဝဵင်းမၢၼ်ႈၸေႊ ၸႄႈမိူင်းၶၢင် တေယၢၼ်ၵၼ်ဝဵင်းၼမ်ႉၶမ်းမွၵ်ႈ 7 လၵ်း ၼႆယဝ်ႉ။