မိူဝ်ႈၼႆႉ ဝၼ်းတီႈ 20/2/2023 ယၢမ်းဝၢႆးဝၼ်း ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဵၼ်ႁႅင်း 30 ပၢႆ တင်း သိုၵ်းၶၢင် KIA ပဵၼ် ပၢင်တိုၵ်းၵၼ် ၼႂ်းၵႄႈဝၢၼ်ႈၼမ်ႉတဝ်း – မိူင်းပေႃႈ ဝဵင်းပၢင်ႇသၢႆး ၸႄႈဝဵင်းမူႇၸေႊ လႅၼ်လိၼ်တႆး – ၶႄႇ ၼႆယဝ်ႉ။

ၵူၼ်းပိုၼ်ႉတီႈ ဝဵင်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢဵၼ်ႁႅင်း 30 ပၢႆတင်း သိုၵ်းၶၢင် ပဵၼ်ပၢင်တိုၵ်းၵၼ် သဵင်ၵွင်ႈလူင်/ ၵွင်ႈဢွၼ်ႇ မေႃးပၼ်ဝႆႉ။ ယၢမ်းလဵဝ် သိုၵ်းမၢၼ်ႈၼႆႉ ဢမ်ႇလႆႈႁူႉမၢႆတပ်ႉ ၶဝ်ပႆၶိုၼ်ႈၵႂႃႇတၢင်းဝၢၼ်ႈပၢင်ၶႃးပူၼ်ႉ ယဝ်ႉ။ ၵမ်ႈၼမ် သိုၵ်းၶၢင်ၼႆႉ တေၵႆႉႁၢင်ႈမၢၵ်ႇတႅၵ်ႇသေ လႅၼ်ႈပၢႆႈ ပေႃးႁဵတ်းၼႆ သိုၵ်းမၢၼ်ႈၼႆႉ ၶိုၼ်းယိုဝ်း ၸဵမ်ၵွင်ႈဢွၼ်ႇ/ ၵွင်ႈလူင် ပၢင်တိုၵ်း ဢၼ်ပဵၼ်မိူဝ်ႈၼႆႉၵေႃႈ လႅပ်ႈပဵၼ်ၼႆၵူၺ်း”- ဝႃႈၼႆ။

ဝၢၼ်ႈပၢင်ၶႃးတင်း ဝၢၼ်ႈၼမ်ႉတဝ်းၼႆႉ ၵမ်ႈၼမ် တေပဵၼ်ပီႈၼွင်ႉၸၢဝ်းၶၢင်ယူႇ ဝၢၼ်ႈၽဵတ်ႇသမ်ႉ တေပဵၼ်ပီႈၼွင်ႉတဢၢင်း တင်းသၢမ်ဝၢၼ်ႈၼႆႉ တေတိတ်းၸပ်းၵၼ်မူတ်း တေပဵၼ်သဵၼ်ႈတၢင်းသိုၵ်းပႆ ၵမ်ႈၼမ်။ ယဝ်ႉၵေႃႈ တေယၢၼ်ဝဵင်းပၢင်ႇသၢႆး မွၵ်ႈ 6 လၵ်း မီးၸဵင်ႇၸၢၼ်း ဝၼ်းတူၵ်း ဝဵင်းပၢင်ႇသၢႆး။

ၶွင်ႇသီႇသိုၵ်းမၢၼ်ႈ ယိုတ်းမိူင်းၼႆႉ ပိုၼ်ၽၢဝ်ႇ ၵိုတ်းတိုၵ်း တူဝ်ႈမိူင်း တႄႇဢဝ် ဝၼ်းတီႈ 1/1/2023 တေႃႇထိုင် ဝၼ်းတီႈ 31/12/2023 တႃႇၶၢဝ်းတၢင်း 1 ပီ ဝႃႈၼႆသေတႃႉ ၵူၺ်းၵႃႈ ႁႅၼ်းသိုၵ်းသေ လေႃႇတိုၵ်း ၸုမ်းၵႅတ်ႇၶႄ ၵူၼ်းမိူင်း PDF တၢင်းၸႄႈဝဵင်းၼွင်ၶဵဝ်မႃး ႁၢဝ်ႈႁႅင်း မိူဝ်းဝၼ်းတီႈ 10/2/2023 ၼႆႉ။ ထိုင်မႃး ဝၼ်းတီႈ 13-15 ၼႆႉ ႁၢင်ႈသိုၵ်းလေႃႇတိုၵ်း သိုၵ်းၶၢင် KIA ၼႂ်းၵႄႈဝၢၼ်ႈၶူဝ်မုင်းတင်း ၼမ်ႉၽၵ်းၵႃ ၼႂ်းၸႄႈဝဵင်းၵူတ်ႉၶၢႆထႅင်ႈ။ ပၢင်တိုၵ်း တင်းသွင်တီႈၼႆႉ ၾၢႆႇသိုၵ်း မၢၼ်ႈ ၸႂ်ႉၶိူင်ႈမိၼ် တိုၵ်းၸွႆႈႁၢဝ်ႈႁႅင်း။