ယိင်းသၢဝ်ဢွၼ်ႇၵေႃႉၼိုင်ႈ ဝႅၼ်တူၵ်းတိုၵ်းဢၢၼ်းၶႃႈတူဝ်တၢႆ တီႈပွၵ်ႉႁူဝ်မုၼ်ႇ ဝဵင်းမူႇၸေႊ၊ ၵူၺ်းၵႃႈဢမ်ႇတၢႆသေ ဢဝ်ၶႃႁၢၵ်းတင်သွင်ၾၢႆႇ လႆႈႁၢမ်သူင်ႇႁူင်းယႃ။
ဝၼ်းတီႈ 13/02/2023 လုၵ်ႈဢွၼ်ႇယိင်း ဢႃယု 20 ပီၵေႃႉၼိုင်ႈ ဝႅၼ်တူၵ်းႁိူၼ်းဢၢၼ်းၶႃႈ တူဝ်တၢႆ ။ ၵူၺ်းၵႃႈဢမ်ႇတၢႆသေ ငဝ်ႈၶႃႁၢၵ်းတင်းသွင်ၾၢႆႇလႄႈ ၸုမ်းၸွႆႈထႅမ် ၼလူင်းလႃႉ မူႇၸေႊ လႆႈႁၢမ်တူဝ်သူင်ႇႁူင်းယႃ မူႇၸေႊ။
ၸုမ်းၸွႆႈတူင်ႇဝူင်းၵူၼ်း ၼလူင်းလႃႉ မူႇၸေႊ(နှလုံးလှ လူမူကူညီရေးအသင်း) လၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ၽူႈယိင်းဢွၼ်ႇ ဢႃယု မွၵ်ႈ 20 ပီ။ ပွၵ်ႉႁူဝ်မူၼ်ႇ လႄးသႄႇငႃးၵူင်း။ ငဝ်ႈၶႃႁၢၵ်းတင်းသွင်ၾၢႆႇ။ ယွၼ်ႉသင်လႄႈဝႅၼ်တူၵ်းႁိူၼ်း၊ မီးလွင်ႈသင်တႄႉ ဢမ်ႇလႆႈႁူႉၸွမ်း”- ဝႃႈၼႆ။
ယိင်းဢွၼ်ႇၵေႃႉၼႆႉ ယူႇတီႈပွၵ်ႉ ၵုင်း 45 ႁူဝ်မူၼ်ႇ။ ၵွၼ်ႇၼႃႈၼႆႉၵႂႃႇႁဵတ်းၵၢၼ်တီႈဝဵင်းလၢဝ်ႇၵၢႆး။ ပဵၼ်ပၼ်ႁႃသင် ဢမ်ႇလႆႈႁူႉတႅတ်ႈတေႃး ဝႃႈၼႆ။
ဝၼ်းမိူဝ်ႈၼႆႉ ဢိင်ၼိူဝ်ငဝ်းလၢႆးၵၢၼ်မိူင်း ၵၢၼ်မၢၵ်ႈမီးဢမ်ႇလီလႄႈ သႅၼ်းပၢၼ်ၵူၼ်းၼုမ်ႇ ၵမ်ႈၼမ် ၵႂင်ၸႂ်ယၢပ်ႇၽိုတ်ႇတႃႇယူႇသဝ်း ဢမ်ႇမီးတၢင်းလိူၵ်ႈသေ ၵႆႉႁဵတ်းႁၢႆႉတူဝ်ၵဝ်ႇ ၶႃႈတူဝ်တၢႆၶိုၼ်းၼမ်။
ၸုမ်းၸွႆႈတူင်ႇဝူင်းၵူၼ်းၼလူင်းလႃႉမူႇၸေႊ(နှလုံးလှ လူမူကူညီရေးအသင်း) သိုပ်ႇလၢတ်ႈဝႃႈ – “ ၵူၼ်းၶႃႈတူဝ်တၢႆဝႃႇ ၸဝ်ႈလဝ်ႈၸဝ်ႈယႃႈတၢႆၶၢင်ႈတၢင်းဝႃႇ ၸိူဝ်းၼႆႉၼမ်ၼႃႇယဝ်ႉပီၼႆႉ မီးၵႂႃႇ 4-5 ၵေႃႉယဝ်ႉ။” – ဝႃႈၼႆ။
မိူဝ်ႈဝၼ်းတီႈ 13/2/2023 ၼၼ့်ၵူၺ်းၼင်ႇၵဝ်ႇ ၵူၼ်းၸၢႆးၵေႃ့ၼိုင်ႈ ဢၢင်ႈၽႅၼ်ၶေႃးတၢႆ တီႈတႃႈရူတ်ႉ တဵင်းတၢၼ်းၶျီႇ ဝဵင်းမူႇၸေႊ ။ ၼၼ်ႉၵေႃႈ ဢမ်ႇတၼ်းတၢႆလႄႈ ၸုမ်းၼလူင်းလႃႉ ဢဝ်တူဝ်သူင်ႇႁူင်းယႃ။