တပ်ႉသိုၵ်းမိူင်းလႃး NDAA ႁဵတ်းပၢင်သွၼ်ၵၢၼ်သိုၵ်းပၼ် ၸၢႆးငၢၼ်ဝၢၼ်ႈ ၽူႈၸၢႆး ဢႃယု 18 ပီ ထိုင် 50 ပီ တႃႇပဵၼ်လွင်ႈႁူမ်ႇလူမ်ႈ ဝၢၼ်ႈဝဵင်း၊ ၽူႈၶဝ်ႈၾိုၵ်းၵၢၼ်သိုၵ်းမီး 300 ပၢႆ။
တႄႇဢဝ် ဝၼ်းတီႈ 5/2/2023 ၼၼ်ႉမႃး ၼႃႈလိၼ်ၶိုၵ်ႉတွၼ်း မၢႆ 4 မိူင်းလႃး (NDAA) ၾိုၵ်းၽွၼ်ႉၵၢၼ်သိုၵ်းပၼ် ၽူႈၸၢႆး ၼႂ်းပိုၼ်ႉတီႈ တႃႇပဵၼ်မႃး တႃႁၢၼ်ဝၢၼ်ႈ တီႈတပ်ႉ 805 ၼႂ်းဢိူင်ႇမိူင်းမ ၸႄႈဝဵင်းမိူင်းလႃး ၸိုင်ႈတႆးပွတ်းဢွၵ်ႇၶူင်း ၼႂ်းၶၢဝ်းတၢင်း 45 ဝၼ်း ။
ၵူၼ်းပိုၼ်ႉတီႈ ဝဵင်းမိူင်းလႃး လၢတ်ႈတီႈၽူႈတွႆႇႁွၵ်ႈဝႃႈ -“ပီၼႆႉ တႃႁၢၼ်ဝၢၼ်ႈ တင်းမူတ်း ဢၼ်ၵႂႃႇၾိုၵ်းၽွၼ်ႉၵၢၼ်သိုၵ်း တေမီး 380 ၵေႃႉ။ ပႃးၶူးသွၼ် ၽူႈလူလွမ်တူၺ်းထိုင်ထႅင်ႈသေ တင်းမူတ်း တေမီး 500 ပၢႆ။ ပၢင်ၽိုၵ်းသိုၵ်းၼႆႉ ၸဵမ်ၵူၼ်း မႂ်ႇၵူၼ်းၵဝ်ႇ မႃးႁူမ်ႈၽိုၵ်းၽွၼ်ႉၸွမ်းၵၼ်မူတ်း။ လႆႈငိၼ်းဝႃႈ တေၽိူမ်ႉဝၼ်းသွၼ်ၵၢၼ်သိုၵ်းထႅင်ႈ”- ဝႃႈ ၼႆ။
ပၢင်သွၼ်ၵၢၼ်သိုၵ်းၼႆႉ ၼိုင်ႈပီလႂ် တေၸတ်းႁဵတ်းၼိုင်ႈပွၵ်ႈ တေၽိုၵ်းပၼ် ၽူႈၸၢႆးၼႂ်းပိုၼ်ႉတီႈ တႃႇပဵၼ်မႃး တႃႁၢၼ် ဝၢၼ်ႈ ႁႂ်ႈႁၢင်ႈႁႅၼ်းတူဝ်ႈတၼ်းဝႆႉ ၵူႈၶၢဝ်းယၢမ်း ပေႃးငဝ်းလၢႆးၵၢၼ်မိူင်း ၵၢၼ်သိုၵ်း ယုင်ႈယၢင်ႈမႃး။ ၽူႈၸၢႆး ၼႂ်းပိုၼ်ႉတီႈၼႆႉ တေလႆႈၽိုၵ်းမေႃဝႆႉ ၵၢၼ်သိုၵ်းၵၼ် ၵူႈၵေႃႉ။
“ၵၢၼ်ၽိုၵ်းသိုၵ်းၼႆႉ ပေႃးဢႃယု ထိုင်မႃး ဢမ်ႇၽိုၵ်းဢမ်ႇလႆႈ တေလႆႈၽိုၵ်းၵူႈၵေႃႉ မီးၵၢၼ်သင်ၵေႃႈ တေလႆႈဝၢင်းသေ ၵႂႃႇ ၽိုၵ်းၵၼ်။ သင်ဝႃႈ ၼႃႈႁိူၼ်း ၵိၼ်းၸႂ် တႃႇႁႃၵိၼ်လဵင်ႉတွင်ႉ ယၢပ်ႇၽိုတ်ႇႁႅင်း ပိူၼ်ႈတေပၼ်ယင်ႉဝႆႉ၊ ပေႃးထိုင်မႃးထႅင်ႈႁွပ်ႈၼိုင်ႈ ၸင်ႇတေႁွင်ႉၽိုၵ်းပၼ်ၵၢၼ်သိုၵ်းၶိုၼ်း။ ပၢင်ၽိုၵ်းသိုၵ်းၼႆႉ တေႁဵတ်းၵၼ် ၼိုင်ႈပီလႂ် ၼိုင်ႈပွၵ်ႈ ။ မိူဝ်ႈ ပီ 2022 ၼၼ်ႉ ၽိုၵ်းယဝ်ႉၵႂႃႇ ၸုပ်ႈၼိုင်ႈယဝ်ႉ”- ၵူၼ်းပိုၼ်ႉတီႈ ဝဵင်းမိူင်းလႃး သိုပ်ႇလၢတ်ႈၼႄၼင်ႇၼႆ။
ပၢင်ၽိုၵ်းသိုၵ်း တႃႁၢၼ်ဝၢၼ်ႈ ၸုပ်ႈၼႆႉ တေသွၼ်ပၼ် လၢႆးယိပ်းၵွင်ႈ၊ လၢႆးယိုဝ်းၵွင်ႈ၊ ၵွင်ႈၸၢၵ်ႈ/ ၵွင်ႈလူင် တေလႆႈၵိၼ်ယူႇ ႁဵတ်းၸွမ်းပိူင်ၵၢၼ်သိုၵ်းတင်းမူတ်း ထိုင်ၶၢဝ်းလူဝ်ႇၵိၼ်လူဝ်ႇၼွၼ်းလူဝ်ႇလုၵ်ႉ လွင်ႈမူတ်းသႂ် ၸိူဝ်းၼႆႉ တေလႆႈၽိုၵ်းႁဵတ်း ၸွမ်းတင်းမူတ်း ငဝ်ႈတေႃႇပၢႆ သင်ဢမ်ႇႁဵတ်းၸွမ်းပိူင်ၸိုင် တေၺႃးတၢမ်ႇ ၸွမ်းၼင်ႇ တမ်းဝၢင်းဝႆႉ မိူၼ်ၼင်ႇ တေႃႉၽိုၼ်း၊ တႅပ်းမႆႉ ၸိူဝ်းၼႆႉ။
လိူဝ်ၼၼ်ႉ တီႈဢိူင်ႇသိူဝ်လိုဝ်း ၼႃႈလိၼ်ၶိုၵ်ႉတွၼ်းမၢႆ 4 ဝဵင်းမိူင်းလႃးၵေႃႈ တႄႇၽိုၵ်းၽွၼ်ႉပၼ် တႃႁၢၼ်ဝၢၼ်ႈမႃး မိူဝ်ႈ ဝၼ်းတီႈ 2/2/2023 မိူၼ်ၵၼ် ဝႃႈၼႆ။
လွင်ႈသွၼ်ၵၢၼ်သိုၵ်း တႃႇပဵၼ်တႃႁၢၼ်ဝၢၼ်ႈ တီႈဝဵင်းမိူင်းလႃးၼႆႉ ပူၼ်ႉမႃး ၶၢဝ်းတၢင်း 2-3 ပီၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်းလႄႈ ဢမ်ႇလႆႈၽိုၵ်းၽွၼ်ႉမႃး။ ၵွပ်ႈၼႆလႄႈ ၶိုၼ်းၽိုၵ်ႉၽွၼ်ႉပၼ် ၸိူဝ်းၵူၼ်းၵဝ်ႇ/ ၵူၼ်းမႂ်ႇၶိုၼ်း တီႈ တပ်ႉမၢႆ 806 တိုၵ်ႉယဝ်ႉၵႂႃႇၵူၺ်း ဝႃႈၼႆ။
ဝဵင်းမိူင်းလႃးၼႆႉ မီးဝႆႉၾၢႆႇတူၵ်းဝဵင်းၵဵင်းတုင် ယၢၼ်ဝဵင်းၵဵင်းတုင် 60 လၵ်းပၢႆ တိတ်းၸပ်းလႅၼ်လိၼ်မိူင်းၶႄႇ ၾၢႆႇဢွၵ်ႇ တိတ်းၸပ်းၼမ်ႉၶွင် ၶႅၼ်ႈမိူင်းလၢဝ်း။ ထိုင်မႃး ပီ 2008 ၼၼ်ႉ လႆႈထုၵ်ႇမၵ်းမၼ်ႈပဵၼ်ၼႃႈလိၼ်ၶိုၵ်ႉတွၼ်း မၢႆ 4 ၵႂႃႇ။ မီး ၸၢဝ်းၶိူဝ်း ယူႇႁူမ်ႈၵၼ် 13 ၸၢဝ်းၶိူဝ်း ၼႆယဝ်ႉ။
