သိုၵ်းမၢၼ်ႈတင်း သိုၵ်းၶၢင် KIA ပဵၼ်ပၢင်တိုၵ်းၵၼ် ႁၢဝ်ႈႁႅင်း 3 ဝၼ်းထပ်းၵၼ်ယဝ်ႉ ပႆႇယဵၼ် ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် ယိုဝ်းၸွႆႈ ပွႆႇမၢၵ်ႇသႂ်ႇ ဢမ်ႇယွမ်း 10 လုၵ်ႈ။
တႄႇဢဝ် ဝၼ်းတီႈ 13-15/2/2023 ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်း ၵႄႈဝၢၼ်ႈၶူဝ်မုင်း – ဝၢၼ်ႈၼမ်ႉၽၵ်းၵႃ ၼႂ်းၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ ၸႂ်ႉ ၶိူင်ႈမိၼ်တိုၵ်းလမ်းၼိုင်ႈ ယိုဝ်းၸွႆႈႁၢဝ်ႈႁႅင်း။
ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ ၶဝ်ပဵၼ်ၵၼ်မႃး 3 ဝၼ်း ပႃးမိူဝ်ႈၼႆႉယဝ်ႉ။ မိူဝ်ႈဝႃး ဝၼ်း တီႈ 14 ယၢမ်းဝၢႆးဝၼ်း သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း လမ်းၼိုင်ႈ မႃးယိုဝ်းၸွႆႈ။ မိူဝ်ႈၼႆႉ ဝၼ်းတီႈ 15 ၵေႃႈ ဢဝ်ၶိူင်ႈမိၼ် မႃးယိုဝ်းၸွႆႈထႅင်ႈ တင်းမူတ်းမွၵ်ႇလူင် ဢၼ်ၶဝ်မႃးပွႆႇၼႆႉ ဢမ်ႇယွမ်း 10 လုၵ်ႈ။ လွင်ႈမၢတ်ႇၸဵပ်း လူႉတၢႆၶဝ်သွင်ၾၢႆႇတႄႉ ဢမ်ႇလႆႈႁူႉၶႃႈ”- ဝႃႈၼႆ။
လိူဝ်ၼၼ်ႉ သိုၵ်းမၢၼ်ႈ တပ်ႉၶလယ 123 ဢၼ်ပၵ်းဝႆႉတီႈ ဝဵင်းၵူတ်ႉၶၢႆၼႆႉၵေႃႈ ဢဝ်ၵွင်ႈလူင်သေ ယိုဝ်းၸွႆႈၵႂႃႇထႅင်ႈ ႁၢဝ်ႈႁႅင်း ။ ၼႂ်းဝၼ်းတီႈ 13 တင်း 14 ၼႆႉ ယိုဝ်းၵႂႃႇ ဢမ်ႇယွမ်း 10 လုၵ်ႈ ၼႆယဝ်ႉ။
ၶွင်ႇသီႇသိုၵ်းမၢၼ်ႈ ယိုတ်းမိူင်းၼႆႉ ပိုၼ်ၽၢဝ်ႇ ၵိုတ်းတိုၵ်း တင်ႈတႄႇ ဝၼ်းတီႈ 1/1/2023 တေႃႇထိုင် ဝၼ်းတီႈ 31/12/2023 တႃႇၶၢဝ်းတၢင်း 1 ပီ သေတႃႉ ပၢင်တိုၵ်းတႄႉ တိုၵ်ႉသိုပ်ႇပဵၼ်ယူႇ ၶိူဝ်းယႂ်း ၼႂ်းၸိုင်ႈတႆးပွတ်းႁွင်ႇ။
ပူၼ်ႉမႃး မိူဝ်ႈဝၼ်းတီႈ 10/2/2023 ယၢမ်းၵၢင်ၼႂ် 5 မူင်းၶိုင်ႈ ၼၼ်ႉၵေႃႈ သိုၵ်းမၢၼ်ႈ ဢဝ်ႁႅင်းသိုၵ်း ၼပ်ႉႁူဝ်ပၢၵ်ႇ လေႃႇ တိုၵ်း ၸုမ်း PDF တၢင်းဝၢၼ်ႈလူင်ၶၢၼ် ဢိူင်ႇၶိူဝ်းၼိမ်း ၸႄႈဝဵင်းၼွင်ၶဵဝ် ႁၢဝ်ႈႁႅင်း။ ယဝ်ႉၵေႃႈ ၸႂ်ႉၶိူင်ႈမိၼ် ယိုဝ်းၸွႆႈထႅင်ႈ 3 လမ်း။ ႁဵတ်းႁႂ်ႈ ၵူၼ်းပိုၼ်ႉတီႈ ပၢႆႈၽေးသိုၵ်း 500 ပၢႆ ။ မၢၵ်ႇလူင် တူၵ်းသႂ်ႇ ၵျွင်းသုင်းသွမ်း ဝၢၼ်ႈလူင်ၶၢၼ် လူႉၵွႆလင် ၼိုင်ႈ၊ ၸၢၵ်ႇမၢၵ်ႇ တိူဝ်ႉသႂ်ႇ ၵွင်းမူးထႅင်ႈ တင်းၼမ်။ လိူဝ်ၼၼ်ႉ ၾႆးမႆႈသူၼ်ဢွႆႈ ၶွင်ၵူၼ်းဝၢၼ်ႈၼႂ်းမႅင်း လူႉသုမ်း မွၵ်ႈ 15 ဢေႊၶိူဝ်ႊ။
