ဝၼ်းတီႈ 31 လိူၼ်ၵျႅၼ်ႊၼိဝ်ႊရီႊမၢႆတွင်းသိုၵ်းမၢၼ်ႈ ယိုတ်းမိူင်းၶွပ်ႈတဵမ် 2 ပီ ႁွင်ႈၵၢၼ်ၽွင်းလူင်ၾၢႆႇၼႂ်းမိူင်းၶွင်ၸုမ်းသိုၵ်းမၢၼ်ႈ ပိုၼ်ၽၢဝ်ႇမူႇပိူင်သုၼ်ႇလႆႈယိပ်းၵွင်ႈၵၢင်ႇ။
ၶိုၼ်းမူၼ်ႉမႄးမူႇပိူင်ၵဝ်ႇဢၼ် တမ်းၸႂ်ႉမႃး ၸဵမ် မိူဝ်ႈပီ 1977 ၼၼ်ႉသေ ပိုၼ်ၽၢဝ်ႇၸႂ်ႉတိုဝ်း ပၼ်ၶႂၢင်ႉၵူၼ်းမိူင်းၽၵ်းၵႃႇ ယိုၼ်ႈဝႂ် ယွၼ်းသုၼ်ႇ လၢႆႊသိၼ်ႊ ယိပ်းၵွင်ႈၵၢင်ႇလႆႈထိုင် 3 လဝ်း ။ ၶႃႈႁၢပ်ႇၵၢၼ်ၶုၼ် ၵူႈသႅၼ်းထၢၼ်ႈသမ်ႉမီးသုၼ်ႇယိပ်းၵွင်ႈထိုင် 4 လဝ်း ဝႃႈၼႆ။
ၵွင်ႈဢၼ်ပၼ်ၶႂၢင်ႉယိပ်းၼၼ်ႉတႄႉ ပဵၼ် ၵွင်ႈသႅၼ်း 9 မီႇလီႇမီႇတႃႇ၊ ၵွင်ႈပွတ်း ပိတ်ႊသတူဝ်ႊ၊ ၵွင်ႈရႆႊၾေႊ လႄႈ ၵွင်ႈၸၢၵ်ႈသႅၼ်းလဵၵ်ႉ ၸိူဝ်းၼႆႉ ဝႃႈၼႆဝႆႉ။
ၼႂ်းမၢႆမီႈၼၼ်ႉတႅမ်ႈဝႆႉပႃးဝႃႈ – ၵူၼ်းတေယွၼ်းတႃႇယိပ်းၵွင်ႈၼႆႉ တေလႆႈပဵၼ်ၵူၼ်းမီးၵတိသဵတ်ႈၸႃႇတေႃႇၸိုင်ႈမိူင်း၊ ၵူၼ်းမီးတၢင်းယၢမ်ႈလီ ၊ ပဵၼ်ၵူၼ်းဢၼ်လူဝ်ႇၸႂ်ႉၵွင်ႈၵၢင်ႇတႄႉတႄႉ၊ တေလႆႈပဵၼ်ၵူၼ်းဢၼ်ဢမ်ႇယႃႉ ၵဝ်းလွင်ႈ ၼိမ် တဵင်ႈၸိုင်ႈမိူင်း၊ လွင်ႈႁူမ်ႇလူမ်ႈဝၢၼ်ႈမိူင်း၊ တေလႆႈပဵၼ်ၵူၼ်းဢၼ်ဢမ်ႇယၢမ်ႈႁဵတ်းၽိတ်းမၢႆမီႈ၊ ပိူင်လူင် တေဢမ်ႇလႆႈပဵၼ်ၵူၼ်းၸႂ်ဢမ်ႇမၢၼ်ႇ – ဝႃႈၼႆ။
ဢိင်ၼိူဝ်လွင်ႈၼႆႉသေ ၵူၼ်းမိူင်တႄႉတုၵ်ႉၸႂ်ၵူဝ်ႁႄ ၵူဝ်ပဵၼ်ၽေးလႄႈၵူဝ်ဢမ်ႇမီး လွင်ႈႁူမ်ႇလူမ်ႈ ။ ၽူႈၼမ်းၸုမ်းယိပ်းၵွင်ႈလႄႈ ၸုမ်းၵၢၼ်မိူင်းတူၵ်ႇတၵ်ႉဝႃႈ ငဝ်းလၢႆးဝၢၼ်ႈမိူင်းမိူၼ်ယၢမ်းလဵဝ်ၼႆႉ သင်ဝႃႈ ၸႂ်ႉတိုဝ်းပၵ်းပိူင်သုၼ်ႇလႆႈယိပ်းၵွင်ႈၵၢင်ႇမႃးတႄႉတႄႉၸိုင် ၸၢင်ႈမီးလွင်ႈၶႃႈႁႅမ်ၵၼ်တၢႆၵူႈဝၼ်း ပဵၼ်ဢၼ်လီမႆႈၸႂ် ဝႃႈၼႆ။
ၾၢႆႇလူင်ႉလႅၼ်ႇၵၢၼ်မိူင်း မိူင်းမၢၼ်ႈတႄႉ ထတ်းသၢင်လၢတ်ႈဝႃႈ ပေႃးထိုင်ၶၢဝ်းၼၼ်ႉမႃး ဢၼ်တေလီမႆႈၸႂ်သုတ်းတႄႉ တေပဵၼ်မိူင်းတႆး တီႈဢၼ်ၸုမ်းယိပ်းၵွင်ႈၵၢင်ႇယူႇသဝ်းတူင်ႉၼိုင်ၼမ်သုတ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ