မႄႈဝၢၼ်ႈ (ၵူၼ်းၵိၼ်ၸၢင်ႈႁဵတ်းၵၢၼ်ႁိူၼ်း) ၵေႃႉၼိုင်ႈ ဢႃယု 15 ပီ ဝၢင်းယႃႈမိူဝ်ႇၸဝ်ႈႁိူၼ်း လႆႈႁၢမ်သူင်ႇ ႁူင်းယႃမူတ်း တီႈဝဵင်းၽႃၵၢၼ့် ။
မိူဝ်ႈဝၼ်းတီႈ 11/2/2023 ပူၼ်ႉမႃးၼႆႉ မႄႈဝၢၼ်ႈၵေႃႉၼိုင်ႈ ဢၼ်ႁဵတ်းၵၢၼ်တီႈႁၢၼ့်သိုဝ့်ၶၢႆ မၢၵ်ႇၵႃး (ကယါးမြေ တာယာရောင်း၀ယ်ရေး) တီႈပွၵ့်မေႃႇသႅင် ၸႄႈဝဵင်းၽႃၵၢၼ့် ဝၢင်းယႃႈမိူဝ်ႇ ၸဝ်ႈႁိူၼ်း လႄႈ ၵူၼ်းႁူမ်ႈႁိူၼ်း လႆႈႁၢမ် သူင်ႇႁူင်းယႃ 4 ၵေႃႉ မႃဢၼ်လဵင်ႉဝႆႉတီႈႁိူၼ်း တၢႆ 3 တူဝ်။
ၸဝ်ႈႁိူၼ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ မၼ်းသႂ်ႇယႃမိူဝ်ႇၼႂ်းၽၵ်းႁဝ်း မိူဝ်ႈလႂ်ဢမ်ႇတၼ်းႁူႉ။တွင့်မႆႈလႄႈ ယုမ်ႇၸႂ်သေၵိၼ်မိူၼ်ယၢမ်ႈၵိၼ်ၵူႈဝၼ်းၼၼ့်ၼႃႇ။ၽိူဝ်ႇမွၵ်ႈ ၶိုင်ႈၸူဝ်ႈမွင်းၼႆ့ ႁူဝ်မဝ်းတွင့်ၶူၼ့်မႃးသေ ႁၢၵ်ႈၼၼ့်ၼႃႇ။ၵူၼ်းႁဵတ်းၵၢၼ် 2 ၵေႃ့ၵေႃႈ ၵိၼ်ၸွမ်း။ၽူဝ်ၶႃႈၵေႃႈၵိၼ်ၸွမ်း။ ၽၵ်းၼၼ်ႉၵေႃႈ ပဵၼ်သီလမ်ၽိုတ်းၽိုတ်းဝႆ့ဢေႃႈ။ၵၢမ်ႇလီဢမ်ႇတၼ်းလႆႈ ၵိၼ်မူတ်း။ၽူဝ်ၶႃႈဝႃႈ ဢဝ်ၵႂႃႇလဵင့်မႃတူၺ်းၼႆလႄႈ ၽိူဝ်ႇမႃၵိၼ် မႃတႄ့ ႁၢၵ်ႈႁေ တၢႆၵႂႃႇၵမ်းလဵဝ်ဢေႃႈ ” – ဝႃႈၼႆ။
ဝၢႆးလင်လႆႈဢဝ်ၸဝ်ႈႁိူၼ်းသူင်ႇႁူင်းယႃသေ လုၵ်ႈၸၢႆးၸဝ်ႈႁိူၼ်း တႅမ်ႈလွင်ႈပိူင်ပဵၼ်တၢင်ႇၼိူဝ် ၾဵတ်ႉသ်ပုၵ်ႉ ဢမ်ႇတၼ်းႁိုင် မီးၵူၼ်းၸုမ်းၼိုင်ႈမႃးထတ်းထဵတ်ႈထၢမ်ယဝ်ႉ တီႉဢဝ်ၼၢင်းဢွၼ်ႇမႄႈဝၢၼ်ႈၼၼ်ႉၵႂႃႇ ဝႃႈၼႆ။
ၸဝ်ႈႁိူၼ်းသိုပ်ႇလၢတ်ႈဝႃႈ- “ ႁဝ်းတႅမ်ႈလွင်ႈၼႆ့တၢင်ႇၼိူဝ်ၾဵတ့်သ် ဢမ်ႇႁိုင်မီးၵူၼ်း 5 ၵေႃႉ ၼုင်ႈၶူဝ်းၵူၼ်းႁိူၼ်း မႃးထတ်းထၢမ်မၼ်းၼၢင်းတီႈႁူင်းယႃသေ မၼ်းၼၢင်းတွပ်ႇၵူႈၶၵ်ႉတွၼ်ႈ ႁပ်ႉပၢၵ်ႇဝႃႈလႆႈဝၢင်းယႃႈမိူဝ်ႇ ၸဝ်ႈႁိူၼ်းတႄႉ ၼႆလႄႈ ၶဝ်ၵေႃႈႁွင်ႉဢဝ်မၼ်းၵႂႃႇယဝ်ႉၶႃႈ။ ၵူၼ်းၸုမ်းၼၼ်ႉ ပဵၼ်ၸုမ်းလႂ်ၵေႃႈဢမ်ႇႁူႉ ”- ဝႃႈၼႆ။
မႄႈဝၢၼ်ႈၵေႃ့ဢၼ်သႂ်ႇယႃမိူဝ်ႇလဵင့်ၸဝ်ႈႁိူၼ်းၼႆ့ ဢႃယု 15 ပီ တႄႇမႃးၵိၼ်ၸၢင်ႈႁဵတ်းၵၢၼ်ႁိူၼ်းလင်ၼႆ့ မိူဝ်ႈလိူၼ်ၾႅပ်ႊပိဝ်ႊရီႊ ဝၼ်းတီႈ1 ၼႂ်းပီၼႆ့။ ဝၢႆးလင်မၼ်းၼၢင်းမႃးႁဵတ်းမႄႈဝၢၼ်ႈ ငိုၼ်းၶမ်းလႄႈ ၶူဝ်းၶွင်ႁိူၼ်းယေး ၵမ်းၵမ်းႁၢႆ။ ၸဝ်ႈႁိူၼ်းဢဝ်ၵွင်ႈထၢႆႇ CCTV မႃးႁၢင်ႈဝႆႉဢမ်ႇႁိုင်လၢႆဝၼ်း မၼ်းၼၢင်းၵေႃႈဝၢင်းယႃႈမိူဝ်ႇၸူးၸဝ်ႈႁိူၼ်း – ၸဝ်ႈႁိူၼ်းသိုပ်ႇလၢတ်ႈၼင်ႇၼႆ။
ၼၢင်းဢွၼ်ႇမႄႈဝၢၼ်ႈဢၼ်ဝၢင်းယႃႈမိူဝ်ႇပၼ်ၸဝ်ႈႁိူၼ်းၼႆႉ မၼ်းၼၢင်းဢမ်ႇၸႂ်ႈၵူၼ်းပိုၼ်ႉတီႈ၊ ပဵၼ်ၵူၼ်းတၢင်ႇတီႈမႃးႁႃႁဵတ်းၵၢၼ်တီႈဝဵင်းၽႃၵၢၼ်ႉလႆႈႁူႉၼင်ႇၼႆ။
ၼႂ်းဝဵင်းၽႃၵၢၼ့်ၼႆ့ ပဵၼ်ဢွင်ႈတီႈ ၵူၼ်းမႃးၶုတ်းသႅင်ၵိုၼ်းၶွၼ်ႈသေ ပဵၼ်ၼႃႈလိၼ်ဢၼ် သိုၵ်းမၢၼ်ႈယိုတ်းမိူင်းလႄႈ သိုၵ်းၶၢင် KIA တူင့်ၼိုင်ႈၵႂႃႇမႃး ။
