သိုၵ်းမၢၼ်ႈ ယိုဝ်းၵွင်ႈလူင် ႁၢဝ်ႈႁႅင်း သွင်ဝၼ်းထပ်းၵၼ် ၼႂ်းၸႄႈဝဵင်းၵူတ်ႉၶၢႆ ႁဵတ်းႁႂ်ႈ ၵူၼ်းပိုၼ်ႉတီႈ တူၵ်းၸႂ်။

မိူဝ်ႈၼႆႉ ဝၼ်းတီႈ 14/2/2023 ယၢမ်းၵၢင်ၼႂ်မွၵ်ႈ 9 မူင်း ၶွင်ႇသီႇသိုၵ်းမၢၼ်ႈ တပ်ႉၶလယ 123 ယိုဝ်းၵွင်ႈလူင် ၵႂႃႇတၢင်း ဝၢၼ်ႈၼမ်ႉၽၵ်းၵႃ ၼႂ်းၸႄႈဝဵင်းၵူတ်ႇၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ မွၵ်ႈ 6 လုၵ်ႈ ။

ၵူၼ်းပိုၼ်ႉတီႈ ဝဵင်းၵူတ်ႇၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵၢင်ၼႂ်မွၵ်ႈ 9 မူင်း သိုၵ်းမၢၼ်ႈ တပ်ႉၶလယ 123 ယိုဝ်း ၵွင်ႈလူင် မႃးတၢင်းၼမ်ႉၽၵ်းၵႃၼႆႉ မွၵ်ႈ 6 လုၵ်ႈ။ သဵင်ၵွင်ႈလူင် ဢၼ်ၶဝ်ယိုဝ်းမႃးၼၼ်ႉ သဵင်လင်ႁႅင်းတႄႉ ႁဝ်း ၶႃႈ ဢွၼ်ၵၼ်တူၵ်းၸႂ်ၶႃႈဢေႃႈ။ ၵူၺ်းၵႃႈ သဵင်ၵွင်ႈၸၢၵ်ႈတႄႉ ဢမ်ႇလႆႈငိၼ်း” – ဝႃႈၼႆ။

မိူဝ်ႈဝႃႈ ဝၼ်းတီႈ 13 ယၢမ်းႁူဝ်ၶမ်ႈ 6 မူင်ပၢႆ သိုၵ်းမၢၼ်ႈ တပ်ႉၼႆႉၵူၺ်း ယိုဝ်းၵွင်ႈလူင် ၵႂႃႇတၢင်းဝၢၼ်ႈၼမ်ႉၽၵ်းၵႃ ဢမ်ႇ ယွမ်း 5 လုၵ်ႈ။

“သိုၵ်းၸုမ်းၼႆႉၵူၺ်း မိူဝ်ႈဝႃး ၶဝ်ယိုဝ်းမၢၵ်ႇလူင်ၵႂႃႇတၢင်း ၾၢႆႇဢွၵ်ႇဝၢၼ်ႈၼမ်ႉၽၵ်းၵႃ ၵွပ်ႈသင်လႄႈ ၶဝ်ယိုဝ်းၵႂႃႇ တၢင်းၼၼ်ႉတႄႉ ဢမ်ႇႁူႉ။ လႆႈငိၼ်းသဵင်ၵွင်ႈ တုမ်ႉတွပ်ႇယိုဝ်းၶိုၼ်းယူႇ ၵူၺ်းၵႃႈ ပဵၼ်ၸုမ်းလႂ် ယိုဝ်းၶိုၼ်းတႄႉ ဢမ်ႇႁူႉ”- ၵူၼ်းပိုၼ်ႉတီႈ ဝဵင်းၵူတ်ႉၶၢႆ သိုပ်ႇလၢတ်ႈၼႄၼင်ႇၼႆ။

တၢင်းၾၢႆႇဢွၵ်ႇဝၢၼ်ႈၼမ်ႉၽၵ်းၵႃၼႆႉ မီးဝႆႉ တပ်ႉပၢင်သဝ်း ၸုမ်းသိုၵ်းၶၢင် KIA ပၵ်းယူႇဝႆႉ တပ်ႉၼိုင်ႈ။ ၵူၺ်းၵႃႈ မၢၵ်ႇလူင် သိုၵ်းမၢၼ်ႈ ဢၼ်ယိုဝ်းမႃးၼၼ်ႉ တူၵ်းသႂ်ႇ ႁိူၼ်းယေးၵူၼ်းဝၢၼ်ႈၼမ်ႉၽၵ်းၵႃ လင်ၼိုင်ႈ လႆႈလူႉၵွႆၸွမ်း ဝႃႈၼႆ။

မိူဝ်ႈဝႃး ဝၼ်းတီႈ 13 ယၢမ်းၵၢင်ၶမ်ႈမွၵ်ႈ 7 မူင်း သဵင်ၵွင်ႈတႅၵ်ႇ တီႈႁိမ်းဝၢၼ်ႈၼမ်ႉဢုမ် ၼႂ်းၸႄႈဝဵင်းမူႇၸေႊထႅင်ႈ ဢိင် ၼိူဝ်လွင်ႈၼႆႉ ပဵၼ်ၸုမ်းလႂ်တင်း ၸုမ်းလႂ်ယိုဝ်းၵၼ်တႄႉ ဢမ်ႇႁူႉ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈဝႃး ယၢမ်းၵၢင်ၶမ်ႈ သဵင်ၵွင်ႈတႅၵ်ႇ တၢင်း ၾၢႆႇၼိူဝ် ဝၢၼ်ႈၼမ်ႉဢုမ် ယွၼ်ႉပဵၼ်ၵၢင်ၶမ်ႈလႄႈ ဢမ်ႇႁူႉဝႃႈ ပဵၼ်ၸုမ်းတင်းလႂ် တင်းၸုမ်းလႂ် ယိုဝ်းၵၼ်။ သဵင်ၵွင်ႈ ၶဝ်ယိုဝ်းၵၼ် တႄႉ မေႃးႁႅင်းဢေႃႈ”- ဝႃႈၼႆ။

ၼႂ်းၸႄႈတွၼ်ႈမူႇၸေႊၼႆႉ မီးဝႆႉ ၸုမ်းယိပ်းၵွင်ႈၵၢင်ႇ တူင်ႉၼိုင်ယူႇဝႆႉ တင်းၼမ် မိူၼ်ၼင် ၶွင်ႇသီႇသိုၵ်းမၢၼ်ႈ ယိုတ်းမိူင်း၊ သိုၵ်းၶၢင် KIA ၊ သိုၵ်းတဢၢင်း TNLA ၊ သိုၵ်းတႆး SSPP လႄႈ ၸုမ်းပျီႇတူႉၸိတ်ႉ ၸိူဝ်းၼႆႉ။

ၶွင်ႇသီႇသိုၵ်းမၢၼ်ႈ ယိုတ်းမိူင်းၼႆႉ ပိုၼ်ၽၢဝ်ႇ ၵိုတ်းတိုၵ်း တင်ႈတႄႇ ဝၼ်းတီႈ 1/1/2023 တေႃႇထိုင် ဝၼ်းတီႈ 31/12/2023 တႃႇၶၢဝ်းတၢင်း 1 ပီ သေတႃႉ ပၢင်တိုၵ်းတႄႉ တိုၵ်ႉသိုပ်ႇပဵၼ်ယူႇ ၶိူဝ်းယႂ်း။