မိူဝ်ႈဝႃးဝၼ်းတီႈ 13/2/2023 ယၢမ်းၵၢင်ၶိုၼ်းမွၵ်ႈ 9 မူင်းၶိုင်ႈ ၾႆးမႆႈဝတ့်ၵျွင်း 2 လင်ၸပ်းၵၼ် တီႈဝၢၼ်ႈၸၢမ်ၽိူၵ်ႇ ၸႄႈဝဵင်းသီႇပေႃ့ ၸိုင်ႈတႆး ပွတ်းႁွင်ႇ ၶူဝ်းၶွင်ၼႂ်းဝတ်ႉၵျွင်း လူ့သုမ်းတင်းၼမ် ၸဝ်ႈသၢင်ႇဢွၼ်ႇ ဢႃယု 8 ၶူပ်ႇ လူႉလွၼ်ႇၶမ်ၾႆး ၸဝ်ႈၼိုင်ႈ။
ၸုမ်းၶႄၾႆးတီႈဝဵင်းသီႇပေႃႉၵေႃ့ၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ လႆႈႁူႉဝႃႈပဵၼ်ယွၼ်ႉ တႆႈတဵၼ်းၶဵင်ႇၽြႃး ။ သမ့် ဢမ်ႇမီးဢၼ်ႁွင်းပိုၼ်ႉလႄႈ လၢမ်းမႆႈပႃးဝတ်ႉၵျွင်းၼႆဢေႃႈ။ ႁဝ်းၵႂႃႇၸွႆႈၶႄၾႆးတေႃႇထိုင်မွၵ်ႈ 11 မူင်းၼႆႉ တေႃႉ တႄႉ ယိုတ်းၾႆးလႆႈၵူၺ်း။ ပဵၼ်ၵျွင်းလူင်ၵမ်းလဵဝ်ယဝ့်ၶႃႈ။ ၸဝ်ႈသၢင်ႇဢွၼ်ႇပႃးၼိုင်ႈလူႉတၢႆၵိုၵ်းၵျွင်းဢေႃႈ။ ၵျွင်းထႅင်ႈလင်ၼိုင်ႈ ဢၼ်ၸမ်ၵၼ်ၼၼ့်ၵေႃႈ လၢမ်းမႆႈမူတ်းဢေႃႈ ”- ဝႃႈၼႆ။
ၸဝ်ႈသၢင်ႇဢၼ်လွၼ်ႇၵႂႃႇၼႆ့ ၸိုဝ်ႈ ၸဝ်ႈလႅင်း ဢႃယု 11 ၶူပ်ႇ ၸိုဝ်ႈပေႃႈ လုင်းဢၢႆႈၸၢႆး ယူ့ဝၢၼ်ႈၼႃးမူၼ်း ဢိူင်ႇမၢၼ်ႈပဵတ်ႈ ၸႄႈဝဵင်းသီႇပေႃ့ ၸိုင်ႈတႆးပွတ်းႁွင်ႇ။ ၾႆးမႆႈမၼ်းၸဝ်ႈ ၶႅမ်ႈပႅတ်ႈတင်းတူဝ်။
ၵျွင်းဢၼ်ၾႆးမႆႈလူ့သုမ်းၵႂႃႇၼႆ့ ပဵၼ် 2 လင်တိတ်းၸပ်းၵၼ်ဝႆ့ ၸိုဝ်ႈ ဝတ့်ၸၢမ်ၽိူၵ်ႇ ဢမ်ႇၼၼ်ႁွင့် ဝတ့်ၵျွင်း မၼိရတၼႃႇ ။ ပဵၼ်ၵျွင်း သိူဝ်ႇပႅၼ်ႈၵင်ႈပႅၼ်ႈ မုင်းလဵၵ်း ။ ပဵၼ်ၵျွင်းသဝ်တိၼ်သုင်လင်ၼိုင်ႈလႄႈ ပဵၼ်ၵျွင်း ၸၼ်ႉလဵဝ်ၸပ်းပိုၼ်ႉလိၼ်လင်ၼိုင်ႈ ။ လွင်ႈလူ့သုမ်း တင်းမူတ်းမီးမွၵ်ႈ 63 သႅၼ်ပျႃး။ တေႃႇထိုင် 11 မူင်း 50 မိၼိတ့် ၸင်ႇၶႄၾႆးလႆႈ။ ၸဝ်ႈၵွၼ်းဝတ့်ၸၢမ်ၽိူၵ်ႇပဵၼ် ၸဝ်ႈရေႇဝတ ဢႃယု 28 ပီ ဝႃသႃလႆႈ 7 ဝႃႇ လႆႈႁူႉၼင်ႇၼႆ ။
သင်ႇၶႃႇတူၼ်ၼိုင်ႈတီႈဝဵင်းသီႇပေႃ့ လၢတ်ႈတီႈၽူႈတွႆႇႁွၵ်ႈဝႃႈ- “ ၵျွင်းလင်ၼႆ့ ပဵၼ်ၵျွင်းၵဝ်ႇၵႄႇ လီသေးလၢႆ ယူႇဢေႃႈ။ ၸဝ်ႈသၢင်ႇဢွၼ်ႇဢၼ်လွၼ်ႇၵႂႃႇၼႂ်းၾႆးၼၼ့် – လႆႈႁူႉဝႃႈ ၸုမ်းၸွႆႈၶႄၾႆးၶဝ် ပေႃးၸွႆႈၵူၼ်းဢွၵ်ႇၵျွင်းမူတ်းယဝ်ႉၽွင်းၾႆးမႆႈၼၼ်ႉ ။ မၼ်းၸဝ်ႈၵေႃႈလွတ်ႈယဝ်ႉ။ လႅပ်ႈတေမၼ်းၸဝ်ႈသမ်ႉၸႂ်ႁွႆႈၶူဝ်းၶွင်မၼ်းၸဝ်ႉသေဢၼ်ဢၼ်လႄႈၶိုၼ်းလႅၼ်ႈၶဝ်ႈမိူဝ်းဢဝ်ၼႆဝႃႇၼၼ်ႉ။ ၸင်ႇဝႃႈၺႃးၾႆးႁုပ်ႇမႆႈတၢႆၵိုၵ်းၵျွင်း။ တီႈၵျွင်းၼၼ်ႉ ၶဝ်တေယူႇႁူမ်ႈၵၼ် 4 ပႃးၼႆ့ဢေႃႈ။ မိူဝ်ႈၵူႈပွၵ်ႈ ပေႃးမီးပွႆးမီးလၢမ်းတႄ့ ႁဝ်းယၢမ်ႈမိူဝ်းလႄႇယူႇ လႆႈႁၼ် ၸဝ်ႈသၢင်ႇမီးယူႇမွၵ်ႈ 20 ပၢႆၼႆ့ဢေႃႈ ” – ဝႃႈၼႆ။
ၵျွင်းၸၢမ်ၽိူၵ်ႇၼႆႉ မိူဝ်ႈၽွင်း ၸုမ်းယိပ်းၵွင်ႈၵၢင်ႇပိုတ်းယိုဝ်းၵၼ်ႁၢဝ်ႈႁႅင်း ၼႂ်းၸႄႈဝဵင်းသီႇပေႃႉ ၼၼ်ႉၵေႃႈပဵၼ်တီႈၵူၼ်းဝၢၼ်ႈပၢႆႈၽေးသိုၵ်းမႃးသွၼ်ႈယူႇသဝ်းတီႈၼိုင်ႈ။
ပေႃးဝႃႈ လိူၼ်လပ်းလိူၼ်မူၼ်း ဝၼ်းသိၼ်ယႂ်ႇသိၼ်လူင်ၼႆၸိုင် ၵူၼ်းဝၢၼ်ႈၸၢမ်လႅင်ၸိူဝ်းၼႆ့ၵေႃႈ မႃးၶိုၼ်ႈၵျွင်းလွင်းမွၵ်ႇၵၼ်ႇတေႃးဝႆႈသႃ ဢဝ်သိၼ်ထွမ်ႇထမ်း။ ၵူၼ်းၶဝ်ႈလႆႈ ဢမ်ႇယွမ်း 300 ၵေႃႉ ။ ဝတ့်ၸၢမ်ၽိူၵ်ႇၼႆ့ ပဵၼ်ဢွင်ႈတီႈဢၼ် ၵူၼ်းပၢႆႈၽေးသိုၵ်း ၵႆ့မႃးသွၼ်ႈႁူမ်ႈတီႈၼိုင်ႈ။
