မိူဝ်ႈဝႃးဝၼ်းတီႈ 9/2/2023 ၵၢင်ၼႂ် 10 မူင်းၶိုင်ႈၼၼ့် ၵူၼ်းၸၢႆးၵေႃႉၼိုင်ႈ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၺႃးၽၼ်းၸွမ်းၵွၵ်းႁူဝ်ႁၢဝ်ႈႁႅင်း လႄႈၸွမ်းတူဝ်ၶိင်း လိူတ်ႈဢွၵ်ႇၼမ်ႁႅင်း ထိုင်တီႈဢမ်ႇတွင်းဢမ်ႇလၢတ်ႈသင်လႆႈ ။
ၸုမ်းၸွႆႈတူင်ႇဝူင်းၵူၼ်း သူၺ်ႇလႅင်ႇမႅတ့်တႃႇၵေႃႉၼိုင်ႈလၢတ်ႈ တီႈၽူ့တွႆႇႁွၵ်ႈဝႃႈ – “ ၸႂ်ႈယဝ့် မီးၵူၼ်းထူဝ်းမႃးလၢတ်ႈဝႃႈ ၵူၼ်းၸၢႆးၵေႃႉၼိုင်ႈ ၺႃးပိူၼ်ႈၽၼ်းၼႆလႄႈ ႁဝ်းၵႂႃႇၸွႆႈဢဝ်တူဝ်မၼ်းသူင်ႇထိုင်ႁူင်းယႃဢေႃႈ။ႁၼ်မၼ်းမီးယူႇတီႈ ႁိမ်းၵျွင်းသိၼ်ႇတွင်ႇတိတ့်ၶႂႃ့ ႁိမ်းဝၢၼ်ႈတွင်ၼဝ်ႈၼၼ့်ဢေႃႈ။ မိူဝ်ႈႁဝ်းၵႂႃႇႁၼ်မၼ်းၼၼ့် မၼ်းသမ့်ပေႃး ဢမ်ႇလၢတ်ႈသင်လႆႈယဝ့်ၶႃႈ။ ဢႃႇရူင်ႇမၼ်းဢမ်ႇ ႁူႉသင်ယဝ့်။ မၼ်းၵူၺ်းလၢတ်ႈလႆႈဝႃႈ မၼ်းၺႃးၽၼ်းလႄႈ မၼ်းလႅၼ်ပၢႆႈမႃး ဝႃႈၼႆၵူၺ်း။ ပဵၼ်တီႈလႂ် ႁိမ်းလႂ်ၼႆ မၼ်းဢမ်ႇလၢတ်ႈလႆႈ မၼ်းၵူၺ်း ၸီ့ၼႄၵႂႃႇတီႈၼၼ်တီႈၼႆႈ ႁဵတ်းၼႆၵွႆးဢေႃႈ။ ပိူၼ်ႈမႃး ႁႅမ်မၼ်းၽၼ်းမၼ်းလၢႆၵေႃႉၼႆၵေႃႈ ဢမ်ႇလၢတ်ႈၼႄႁဝ်း ။ ပိူၼ်ႈဢဝ်သင်တီႈမၼ်းၵႂႃႇလၢႆလၢႆၼႆၵေႃႈ တိုၼ်းဝႃႈထၢမ်ဢမ်ႇလႆႈၼၼ့်ၶႃႈယဝ့် ။ ၺႃးၽၼ်းတီႈႁူဝ်မၼ်းဝႆ့မွၵ်ႈ 3 ႁွႆး ယဝ့်ၵေႃႈလႅပ်ႈမၼ်းတေဢဝ်မိုဝ်းမၼ်းႁႄ့ၽွင်ႈၼေႈ လင်မိုဝ်းမၼ်းၵေႃႈႁၢၵ်းဢေႃႈၼၼ့်။ယဝ့်ၵေႃႈ တီႈပုမ်မၼ်းၵေႃႈ ႁွႆးၽႃ့ႁွႆးမိတ်ႈပေႃးလၢႆးလူင်ဝႆ့ဢေႃႈ ” – ဝႃႈၼႆ။
ၵူၼ်းၸၢႆးဢၼ်ၺႃးၽၼ်းၼႆ့ ဢႃယု မီးမွၵ်ႈ 40 မိူဝ်ႈလဵဝ်ၸုမ်းၸွႆႈတူင်ႇဝူင်းၵူၼ်း ၸွႆႈသူင်ႇထိုင်ႁူင်းယႃသေ တိုၵ့်ပိုၼ်ၽၢဝ်ႇႁႃ ပီႈၼွင့်မၼ်းဝႆ့ယူႇ ။ ငဝ်းလၢႆးမၢတ်ႇၸဵပ်းႁႅင်းဝႆႉ ဝႃႈၼႆ။
ၸုမ်းၸွႆႈတူင်ႇဝူင်းၵူၼ်းသူၺ်ႇလႅင်ႇမႅတ့်တႃႇၵေႃႉၼိုင်ႈသိုပ်ႇလၢတ်ႈဝႃႈ- “ လွင်ႈပိူင်ပဵၼ်ၸိူင့်ၼႆတႄ့ ယၢမ်ႈမီးမႃးယူႇ ၵူၺ်းၼႃႇ ႁႂ်ႈပေႃးထိုင်တီႈလိုမ်းတူဝ်လိုမ်းၶိင်းတႄ့ ဢမ်ႇမီး။ ဢၼ်မိူဝ်ႈလဵဝ်တႄ့ ပေႃးဢမ်ႇ ႁူႉသင်ယဝ့်ၼႃႇ။ပေႃးတူၺ်းမၼ်းတႄ့ လႅပ်ႈလႅၼ်ႈပၢႆႈမႃးတၢင်းၵႆၼႃ။မိူဝ်ႈလဵဝ်ၼႆ့ လွင်ႈႁူမ်ႇလူမ်ႈဢမ်ႇမီးသင်ယဝ့်လႄႈ ၶႅၼ်းတေႃႈၵူၼ်းမိူင်းယႃႇဝႆ့မဝ်မၢင် ႁႂ်ႈမေႃဝႆ့ၾၢင့်ၵၼ်ၼၵ်းၼႃၵၼ်ၵူႈၶႃႈဢေႃႈ ၶႂ်ႈသင်ႇထိုင်ၸိူင့်ၼႆၶႃႈ” – ဝႃႈၼႆ။
မိူဝ်ႈဝၼ်းတီႈ 30/1/2023 တီႈဢိူင်ႇၼႃးယွင်း ဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း ၵူၼ်းၵိၼ်ၸၢင်ႈလဵင်ႉပႄႉ ၽိတ်းမေႃးၵၼ်တင်း ၼွင်ႉၸၢႆးမႄႈလဵင်ႉၸဝ်ႈပႄႉ ထိုင်တီႈတႅင်းၵၼ် တၢႆ တီႈဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ