Thursday, May 30, 2024

ဝဵင်းလႃႈသဵဝ်ႈ ပိုတ်ႇပၢႆႉၶဝ်ႈဝဵင်း ပႃးလိၵ်ႈတႆး – ႁၢင်ႈၵွင်တႆး သွင်ၾၢႆႇ

Must read

မၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 76 ပီၼႆႉသေ တီႈဝဵင်းလႃႈသဵဝ်ႈ ပိုတ်ႇပၢႆႉၶဝ်ႈဝဵင်း တႅမ်ႈဝႆႉ 3 ၽႃ သႃ ပႃးႁၢင်ႈၵွင်တႆးလႄႈ ႁၢင်ႈၼမ်ႉတဝ်ႈလိၼ် တင်းသွင်ၾၢႆႇ။

ပိုတ်ႇပၢႆႉၶဝ်ႈဝဵင်းလႃႈသဵဝ်ႈ
Photo by – ၵူၼ်းပိုၼ်ႉတီႈ/ ပိုတ်ႇပၢႆႉၶဝ်ႈဝဵင်းလႃႈသဵဝ်ႈ ၼႂ်းဝၼ်းၸိူဝ်ႉၸၢတ်ႈၸိုင်ႈတႆး 76 ပီ

ပူၼ်ႉမႃး ဝၼ်းတီႈ 7/2/2023 ယၢမ်းၵၢင်ၼႂ် ယူႇတီႈ သင်ၶၸဝ်ႈ၊ ၵူၼ်းမိူင်းပိုၼ်ႉတီႈလႄႈ ႁွင်ႈၵၢၼ်လူင်ပွင်ၸိုင်ႈ တႂ်ႈသိုၵ်း မၢၼ်ႈ ၵုမ်းၵမ် ႁူမ်ႈၵၼ် ပိုတ်ႇပၢႆႉၶဝ်ႈဝဵင်း တီႈဢိူင်ႇမႄႈႁၢၼ်ႇ ၾၢႆႇၸၢၼ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ တီႈပၢႆႉၼၼ်ႉ တႅမ်ႈဝႆႉ 3 ၽႃသႃ တေပဵၼ်လိၵ်ႈတႆး၊ လိၵ်ႈမၢၼ်ႈလႄႈ လိၵ်ႈဢိင်းၵလဵတ်ႈ ၸိူဝ်းၼႆႉ။

- Subscription -

ၽူႈတူင်ႉၼိုင် ၼႂ်းတူင်ႇဝူင်းတႆး ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယူႇတီႈ ၵေႃလိၵ်ႈလၢႆးသေ ဢွၼ်ႁူဝ်ၸတ်းႁဵတ်း ဝၢင်းၽႅၼ်ၶပ်းၶိုင်မႃး ၸဵမ်မိူဝ်ႈပီ 2019 ၼၼ်ႉယဝ်ႉ။ ဢွင်ႈတီႈပိုတ်ႇၵႂႃႇၼႆႉ တေပဵၼ်တီႈသဵၼ်ႈတၢင်းၶွႆႈ လုၵ်ႉတၢင်းဝဵင်းလိူဝ်ႇ – သီႇပေႃႉ ၶိုၼ်ႈမႃး။ တီႈပၢႆႉၼၼ်ႉ တေတႅမ်ႈလိၵ်ႈဝႆႉ 3 ၽႃသႃ။ ယဝ်ႉၵေႃႈ တီႈႁိမ်းၶၢင်ႈပၢႆႉ ၼၼ်ႉ တေမီးပႃးႁၢင်ႈၵွင်တႆး – ႁၢင်ႈၼမ်ႉတဝ်ႈထႅင်ႈ တင်းသွင်ၾၢႆႇ။ ၵူၺ်းၵႃႈ တင်းမူတ်းသဵင်ႈၵႂႃႇငိုၼ်းၵႃႈႁိုဝ်တႄႉ ႁဝ်းၶႃႈ ပႆႇႁူႉႁူဝ်ယွႆႈမၼ်းၶႃႈ” – ဝႃႈၼႆ။

တီႈပၢႆႉၼၼ်ႉ တႅမ်ႈဝႆႉ လိၵ်ႈတႆး “ဝဵင်းလႃႈသဵဝ်ႈ ႁပ်ႉတွၼ်ႈယူႇ” ။ ၾၢႆႇမၢၼ်ႈသမ်ႉ တႅမ်ႈဝႆႉ “လားရှိးမြို့ ကြိုဆိုပါ၏” လႄႈ လိၵ်ႈဢိင်းၵလဵတ်ႈသမ်ႉ တႅမ်ႈဝႆႉ “WECOME TO LASHIO” ။ တၢင်းၶၢင်ႈသွင်ၾၢႆႇ ၼၼ်ႉ တေမီးႁၢင်ႈ ၵွင်တႆး (ၵွင်ၵူၼ်ႈယၢဝ်း) လႄႈ ႁၢင်ႈ ၼမ်ႉတဝ်ႈလိၼ်ထႅင်ႈ။

ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ပဵၼ်ဝဵင်းယႂ်ႇ ဝဵင်းၼိုင်ႈ ယဝ်ႉၵေႃႈ ႁူဝ်ၵူၼ်းယူႇသဝ်းၼမ် ၼပ်ႉႁူဝ်သႅၼ်။ ပၢႆႉၶဝ်ႈဝဵင်း ဢၼ်ပႃးလိၵ်ႈတႆးၼႆႉ တေမီးသွင်ဢွင်ႈတီႈ ဢၼ်လုၵ်ႉတၢင်းဝဵင်းမူႇၸေႊ ၶဝ်ႈမႃးတၢင်းဝဵင်းလႃႈသဵဝ်ႈ တီႈၼိုင်ႈ။ ၼၼ်ႉတႄႉ ယူႇတီႈၾၢႆႇလိူမ်ႈလႆႇၶဝ် ႁဵတ်းဝႆႉ။ ယဝ်ႉၵေႃႈ တီႈဢိူင်ႇမႄႈႁၢၼ်ႇၼႆႉ ထႅင်ႈတီႈၼိုင်ႈ ဝႃႈၼႆ။

သဵၼ်ႈတၢင်းလူင် ဢၼ်ၵၢႆႇၸူးတၢင်းဝဵင်းလႃႈသဵဝ်ႈၼႆႉ မိူၼ်ၼင်ႇ မူႇၸေႊ – လႃႈသဵဝ်ႈ၊ ၼမ်ႉတူႈ – လႃႈသဵဝ်ႈ၊ တၢင်ႉယၢၼ်း – မိူင်းယႆ – လႃႈသဵဝ်ႈ၊ ဝဵင်းလိူဝ်ႇ – လႃႈသဵဝ်ႈ ၸိူဝ်းၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း